Əli Sultanov: "Bina yaşayış məqsədləri ilə sərəncam alıbsa, yaşayış təyinatı üzrə istifadə olunmalıdır"
Bakıda yaşayış binalarının zirzəmilərində, mərtəbələrində, yaxud binaların həyətində iaşə, xidmət obyektlərinin, mağazaların yaradılması halları geniş yayılıb. Xüsusilə şəhərin mərkəzində yaşayış mənzillərində konkret olaraq klinikalar, kurslar və s. fəaliyyət göstərir.
Bu da nəticə etibarilə binada yaşayan sakinlərin narahatlığına və narazılığına səbəb olur. Bu da istər-istəməz həmin binada yaşayan sakinlərin narazılığına səbəb olur. Ancaq qanunvericiliyə əsasən, yaşayış binasındakı mənzili obyekt kimi icarəyə vermək, təyinatdan kənar istifadə etmək düzgün deyil.
Qeyd edək ki, Dövlət Şəhərsalma və Arxitektura Komitəsinin Kollegiyasının təsdiqlədiyi "Yaşayış binaları. Layihələndirmə normaları"na əsasən, Azərbaycanda insanlara zərərli təsir göstərən bəzi obyektlərin yaşayış binasının zirzəmi, kürsülük, birinci və ikinci mərtəbələrində ictimai təyinatlı obyektlərin yerləşdirilməsinə yol verilmir.
"Bu gün yaşayış binalarında olan mənzillər müxtəlif məqsədlərlə icarəyə verilir, həmin mənzillər ya klinika, ya şirkət, ya da kurs kimi fəaliyyət göstərir"
Əmlak eksperti Əli Sultanov "Bakı-Xəbər"ə şərhində bildirdi ki, əvvəllər yaşayış binalarını inşa edən şirkətlər əsas xərclərini binanın birinci mərtəbəsini sahibkarlara satmaqla qarşılayırdılar: "Bina yaşayış məqsədləri ilə sərəncam alıbsa, yaşayış təyinatı üzrə istifadə olunmalıdır. Təyinatdan kənar istifadə olunması qanuna ziddir. Danılmaz faktdır ki, bu gün yaşayış binalarında olan mənzillər müxtəlif məqsədlərlə icarəyə verilir. Həmin mənzillər ya klinika, ya şirkət, ya da kurs kimi fəaliyyət göstərir. Bu kimi obyektlər yaşayış təyinatlı binalarda olmamalıdır. Qanunla heç bir halda buna yol verilmir. Yaşayış sahəsi olan yerdə digər infrastruktur ola bilməz. Bizdə elə binalar var ki, beşmərtəbə "xruşşovkadır", birinci mərtəbəsi yaşayış evi olub, indi onu hansısa obyektə, tutalım, restorana çeviriblər. İki mərtəbənin arasında nazik beton təbəqədir, aşağıdakı səs-küy ikinci mərtəbədə evin içindədir. Digər məsələ təhlükəsizliklə bağlıdır".
Günel CƏLİLOVA
