Elməddin Muradlı: "Mən də bununla bağlı AYNA-ya müraciət etmişəm, başqa sakinlərin də müraciətləri var"
Paytaxtda yerüstü ictimai nəqliyyatın vəziyyətinin ağır olduğu indiki şəraitdə, çox təəssüflər olsun ki, bəzi avtobus şirkətləri öz vəzifəsini normal şəkildə icra edə bilmir. İndi elə bir durum yaranıb ki, aidiyyəti şirkətlər öz dəstəyini əsirgəməməlidir, camaatın əziyyət çəkməməsi, yollarda qalmaması, o taksinin, bu taksinin üstünə qaçmaması üçün xəttə daha çox sayda avtobuslar buraxmalıdır.
Amma bəzi avtobus şirkətlərindən bu jestləri görə bilmirik, onlar sanki insanlara qəsdən əziyyət verirlər. "Elmlər Akademiyası" Metrostansiyasından Badamdar şossesi ilə Bayıla gələn və eyni yolla da geriyə qayıdan 53 saylı avtobus marşurutları hazırda xəttədir və sərnişindaşıma işlərini həyata keçirir. Bu müsbət haldır ki, 53 saylı avtobus xəttə çıxır. Amma onun göstərdiyi xidmət əhalini təmin etmir. 53 saylı avtobusun işlədiyi yol açıq olsa da, düz-əməlli işləmir, yenə də camaat yollarda qalır. Ən azından, bu şirkət xəttə buraxılan avtobusların sayını atıra bilər, bununla da sərnişinlər problemdən xilas olar, rahat gedib-gələr. Müvəqqəti çətinlikdir və o çətinliyi aşmaq üçün hər kəs öz sahəsində əlindən gələni etməlidir.
Sərnişinlər mütəmadi olaraq narazılıq edirlər və 53 saylı avtobus marşurutlarında işləyən sürücülər deyir ki, avtobusların sayı azdır, xəttə cəmi 8 avtobus buraxılıb. Bu avtobusların sayı ən azından 12-15 olmalıdır ki, problemi nisbətən yüngülləşdirsin. Bu qədər sərnişin narazılığına rəğmən şirkətin tükü də tərpənmir. Maraqlıdr, bu şirkət nə avtobusların sayını artırır, nə də xətdə olan köhnə-kürüş avtobusların təmirinə, səliqəsinə fikir verir. Bir də görürsən ki, avtobusun təkərləri partladı və sərnişinlər yerdə qaldı. Sentyabrın 11-də "Elmlər Akademiyası" metrostansiyasının qarşısında analoji hadisə baş verdi və sərnişinlər arasında ciddi narahatlıq yarandı.
Təəsvvür edin, 53-ü o qədər adam gözləyir ki, insanların çoxluğuna baxanda adamın gözləri qaralır. Avtobusların sayının az olması nəticəsində camaat yollarda qalıb və taksilərin də qiyməti odu bahasınadır. 1 manatlıq taksilər də artıq qiyməti qaldırıb, 2 manatdan aşağı düşmür. Bir adam evindən çıxıb işə gedirsə, gündəlik ona yol xərci üçün əzından 5-6 manat lazımdır ki, gedib işinə çatsın.
Göründüyü kimi, bəzi avtobus şirkətləri də fürsətdən sui-istifadə edir. Məsələn, 20-ci Sahədən (sentyabrın 12-dən isə Muxtarov küçəsindən) Əl Oyunları Sarayına kimi sərnişinləri daşımaq üçün xəttə "Bakubus" 2 ədəd (sürücülər elə deyir) 5 nömrəli avtobus ayrılıb, o avtobuslar da axsam saat 7-dən sonra işləmir. Yəni belə hallar var və arzu edərdik ki, şirkətlər bunu nəzərə alsınlar və daşıma işini lazımı şəkildə həyata keçirsinlər.
"Həmin şirkətin ümumiyyətlə, cəmi 8 avtobusu var..."
Nəqliyyat üzrə ekspert Elməddin Muradlı "Bakı-Xəbər"ə bildirdi ki, əvvəllər Badamdar yolu da bağlı idi, sürüşmə ilə əlaqədar həmin yol işləmirdi. "AYNA (Azərbaycan Yerütü Nəqliyyat Agentliyi) tərəfindən tələb qoyuldu və o yol da açıldı. Həmin şirkətin ümumiyyətlə, cəmi 8 avtobusu var, 1 avtobus da ehtiyatdadır, camaat çox olanda ehtiyatda olan avtobusu da xəttə buraxır. Yəni şirkətin əlində olan imkan odur. Mən də bununla bağlı AYNA-ya müraciət etmişəm, başqa sakinlərin də müraciətləri var. AYNA-da bildirdilər ki, şirkət rəhbərliyi ilə danışıqlar aparılır. Yəqin ki, digər variantlarla avtobus sayını artırmaq mümkündürsə, edəcəklər".
E.Muradlının sözlərinə görə, amma həmin şirklətin balansında olan avtobusların sayı azdır. "Düşünürəm ki, bunu əvvəldən nəzərə almaq lazım idi. Formula ilə əlaqədar müəyyən avtobusların istiqaməti dəyişəndə sərnişin axını azalırsa və harda sərnişin axını çoxdursa avtobusları müvəqqəti olaraq ora yönləndirmək olardı. Yəni bunu əvvəldən planlamaq lazım idi, amma çox təəssüf ki, bəzi məsələlər unudulur. Bunu da nəzərə almaq lazımdır"-deyə E.Muradlı bildirdi.
İradə SARIYEVA
