Cavanşir Əliyev: "Ləğv edilən universitetin diplomları hüquqi aspektdən keçərli hesab edilir"
Məlum olduğu kimi, Bakı Asiya Universiteti ləğv olunduğunu elan edib. Məlumat üçün qeyd edək ki, Bakı Asiya Universiteti 2015-ci ildə Təhsil Nazirliyinə müraciət edərək, universitetin fəaliyyətinin müvəqqəti dayandırılması barədə qərar qəbul edildiyini bildirmiş və burada təhsil alan tələbələrin digər ali təhsil müəssisələrində yerləşdirilməsini xahiş etmişdi.
Maraqlıdır, adıçəkilən universitetin məzunlarının diplomları tanınacaqmı?
"Hansısa bir səbəbdən universitet bağlanırsa, tələbələrin hüquqları tam şəkildə qorunmalıdır"
Təhsil eksperti Cavanşir Əliyev "Bakı-Xəbər"ə açıqlamasında qeyd etdi ki, ləğv edilən universitetin diplomları hüquqi aspektdən keçərli hesab edilir: "Çünki həmin diplomlar ali məktəb qanuni surətdə fəaliyyət göstərdiyi müddətdə, yəni ona verilən dövlət lisenziyasının etibarlı sayıldığı müddətdə verildiyi üçün qanuni hesab edilir. Bu etibarlılıq həmin ali təhsil müəssisəsi fəaliyyətini sonradan dondurduğu halda belə qüvvəsində qalır.
Təhsil haqqında dövlət sənədlərinin nümunələri və onların verilməsi Qaydaları”na dair Nazirlər Kabinetinin qərarına əsasən, təhsil müəssisəsi ləğv edildikdə, həmin müəssisənin məzunlarına verilmiş diplomlar, onların əlavələri və ya dublikatları Elm və Təhsil Nazirliyi tərəfindən təqdim edilir.
Ümumiyyətlə, universitetin bağlanması tələbənin günahı deyil. Hansısa bir səbəbdən universitet bağlanırsa, tələbələrin hüquqları tam şəkildə qorunmalıdır. Əsasən xaricdə təhsil alan azərbaycanlıların yarısının diplomu ölkəmizdə tanınmır. Buna səbəb isə bəzən xaricdə təhsil şirkətləri, bəzən isə tələbə məlumatsızlığı olur. Hansı ki, tələbələr lazımi araşdırma etmədən və kifayət qədər məlumat əldə etmədən xaricdə təhsilə müraciət edirlər. Sonda isə illərini boş yerə sərf edirlər və Azərbaycanda tanınmayan və keçərsiz olan diplom əldə edirlər. Nəticə etibarı ilə əmək fəaliyyətini icra edə bilmirlər, iş tapmaqda çətinlik çəkirlər”.
Günel CƏLİLOVA
