Adil Qeybulla: “Ölkəmizdə orqan transplantasiyası ilə bağlı çoxlu problem yaşanırdı, bu əsasən psixoloji səbəblə bağlı idi”
Məlum olduğu kimi, Azərbaycanda ilk dəfə meyit donorun orqanları transplantasiya edilib.
Azərbaycan Respublikası Səhiyyə Nazirliyinin tabeliyindəki Orqan Donorluğu və Transplantasiyası üzrə Koordinasiya Mərkəzinə Kliniki Tibbi Mərkəzdə müalicə alan pasiyentə beyin ölümü diaqnozunun qoyulmasına dair məlumat daxil olub, Orqan Donorluğu və Transplantasiyası üzrə Koordinasiya Mərkəzi tərəfindən orqan donorluğu və transplantasiyası prosesinin təşkili və əlaqələndirilməsi üzrə aidiyyəti tədbirlər həyata keçirilib. Qeyd edək ki, beyin ölümü diaqnozu qoyulmuş vətəndaşın orqanlarının transplantasiyasına ailəsi razılıq verib. Məlumat üçün bildirək ki, meyit donordan götürülmüş qara ciyər Mərkəzi Gömrük Hospitalında, tibb üzrə fəlsəfə doktoru Mircəlal Kazıminin rəhbərlik etdiyi peşəkar tibbi heyət tərəfindən hepatit B və hepatit D-yə görə qara ciyər sirrozundan əziyyət çəkən, canlı donoru olmayan 12.10.2002-ci il təvəllüdlü Şərifova Mənzər Yaşar qızına köçürülüb. Bununla da, orqan donorluğu və transplantasiyası sahəsində müasir Azərbaycan səhiyyə tarixində ilkə imza atılıb.
Orqan transplantasiya Azərbaycan səhiyyəsinin inkişafından xəbər verir. Maraqlıdır, bunun Azərbaycan əhalisinə psixoloji və mental olaraq hər hansı bir təsiri olacaqmı?
“Hazırkı vəziyyətdə ölkəmizdə orqan transplantasiyasının həyata keçirilməsi müsbət haldır, donor bankı məhz bunun hesabına yarana bilər”
Professor, tibbi ekspert Adil Qeybulla “Bakı-Xəbər”ə açıqlamasında bildirdi ki, Azərbaycanda orqan transplantasiyasının həyata keçirilməsi müsbət hadisədir. Bu sahədə çoxlu problemlər yaşanırdı: "Məlumdur ki, bizdə beyin ölümü keçirən insanlardan orqan götürmək mümkün deyildi. Çünki insanlar psixoloji olaraq buna razı deyildi. Hər hansı bir səbəbdən həyatını itirən insanların meyitini yarmağa belə icazə verilmirdi. Bu, psixoloji səbəblə bağlıdır. Hazırkı vəziyyətdə ölkəmizdə orqan transplantasiyasının həyata keçirilməsi müsbət haldır. Donor bankı məhz bunun hesabına yarana bilər. Başqa cür bu mümkün deyil. Məndə olan məlumata görə, Azərbaycanda son iki ildə 100-ə yaxın şəxs könüllü donor olmaq üçün müraciət edib. Bu istiqamətdə insanların düşüncəsi dəyişir. Başqa birinin həyatda qalması üçün bu addım alqışlanmalıdır”.
Günel CƏLİLOVA
