Baş nazirin müavini Samir Şərifovun oğlunun toyu yerli mediada trend xəbərə çevrildi. Demək olar, əksər media resurslarında bu məsələ az qala sensasion xəbər başlıqları ilə verildi.
Bir məmurun oğluna toy etməsi ictimai məzmunlu hadisə sayıla bilərmi? Medianın bu hadisəni xüsusi həvəs və məqsədlə tirajlaması media etikasına, media prinsiplərinə nə qədər uyğundur?
Xəyalə Rais: “Bir məmurun övladına toy etməsi ictimai məzmun daşımır və bu bir ailə hadisəsidir, buna görə də onun tirajlanmasını, geniş şəkildə müzakirə edilməsini düzgün saymıram”
Moderator.az saytının baş redaktoru Xəyalə Rais “Bakı-Xəbər”ə açıqlamasında bildirdi ki, belə məsələlərin medianın gündəminə çıxarılması düzgün deyil. “Toy xalqımızın qədim adətidir. Hər bir valideyin övlad böyüdərkən övladının toyunun arzu və xəyalı ilə yaşayır. Kiminin bu arzuları gerçəkləşdirməyə imkanı, gücü çatır, kimidəsə bu alınmır. Samir Şərifov da övladının xoş günündə pula qənaət etməyib, övladına arzusunda olduğu şəkildə toy edib. Bu hadisənin mətbuatda bu qədər işıqlandırılması, müzakirə olunması müsbət hal deyil. Bir məmurun övladına toy etməsi ictimai məzmun daşımır və bu bir ailə hadisəsidir, buna görə də onun tirajlanmasını, geniş şəkildə müzakirə edilməsini düzgün saymıram. Burda bir məsələ var ki, çox adam bu toyu müzakirə edir, xərclənən puldan, ora dəvət edilən ulduzlardan, dəbdəbədən danışırlar. Bu da düzgün məsələ deyil.
Samir Şərifovu qınayan şəxslərin özlərinə belə bir sual verərdim ki, siz istəməzdinizmi ki, övladınızın toyu dəbdəbəli keçsin? Sizin də belə imkanlarınız olsaydı etməzdinizmi? Təbii ki, edərdilər. İmkanı olan hər bir şəxsin arzusudur ki, övladına ürəyi istəyən bir toy etsin. Bu normal haldır və bunu bu qədər şişirtmək, ictimai məzmunlu bir hadisə kimi müzakirə etmək doğru deyil”-deyə X.Rais bildirdi.
Elyar İslamoğlu: “Məmurların övladlarına dəbdəbəli toy etməsi mətbuatın gündəmində yer almalı deyil, bu yaxşı qarşılanmır”
Filologiya üzrə fəlsəfə doktoru, ictimai fəal Elyar İslamoğlu “Bakı-Xəbər”ə bildirdi ki, əslində, hansısa məmurun övladına dəbdəbəli toy etməsi media gündəmində yer almalı deyil. Bunun heç bir ictimai məzmun daşımadığını deyən ekspert hesab edir ki, media bu məsələnin gündəmə çevrilməsinə çalışmalı deyil. “Keçmiş maliyyə naziri Samir Şərifovun oğlunun toyu haqqında məlumatı mən də mediadan oxudum. Hesab edirəm ki, medianın gündəmində belə bir hadisələrin yer tutması, onun ictimai məzmunlu bir məsələ kimi təqdim edilməsi yaxşı hal deyil. Heç bu jurnalist etikasına və medianın əzəli prinsiplərinə uyğun da gəlmir. Mediamızın gündəmini hansısa məmurun övladının toy xəbəri yox, ictimai, sosial, siyasi əhəmiyyətli xəbərlər tutmalıdır. Bu, məsələnin bir tərəfi. Digər tərəfdən, məmurlar çalışmalıdır ki, övladlarına dəbdəbəli toylar etməsinlər və həmin toylar da təntənəli, dəbdəbəli toy kimi medianın gündəminə düşməsin. Çünki belə xəbərlər cəmiyyətdə qıcıq doğurur.
Vətən müharibəsində yüzlərlə subay, nişanlı oğulllarımız şəhid olub, bunlardan sonra məmurların övladlarına dəbdəbəli toylar etməsi və bəzi media qurumlarının da bunu gündəmə çevirməsi cəmiyyətdə xoş qarşılanmır. Çalışmaq lazımdır ki, toylar sadə olsun. Məmurların övladlarına dəbdəbəli toy etməsi mətbuatın gündəmində yer almalı deyil, bu yaxşı qarşılanmır”.
E.İslamoğlu qeyd etdi ki, toyların dəbdəbəli şəkildə keçirilməsi, israfçılığa yol verilməsi dinimizdə də bəyənilmir. “Dəfələrlə Prezident İlham Əliyev məmurlara çağrış edib ki, sadə olsunlar, camaatdan seçilməsinlər, dəbdəbəli məclislər, toylar etməsinlər. Cənab Prezidentin davranışı məmurlara nüminə olmalıdır. Cənab Prezident və Birinci xanım öz doğum günlərini ya azad ərazilərdə qeyd ediblər, ya şəhid ailələri ilə birgə keçiriblər, sadəlikləri ilə hər kəsə nümunə olublar. Amma çox təəssüflər olsun ki, bizim məmurlarımız cənab Prezidentin tapşırıqlarından nəticə çıxarmırlar, onlar yenə də dəbdəbəli toylarla və ad günləri ilə gündəmə gəlirlər.
Əslində, hansısa məmurun özünə keçirdiyi ad günü, övladının toyu gündəm olmamalıdır, media bu hadisəni işıqlandırmamalıdır. Çünki hansı məmurun övladının evləndiyi, toyu olduğu cəmiyyət üçün maraqlı deyil. Amma görünür, bəzi şəxslər cəmiyyətdə qıcıq yaranmasına çox həvəslidir ki, bu hadisəni xüsusi bir xəbər kimi işıqlandırır. Amma yaxşı olar, məmurlar da övladlarının toyunu elə keçirsinlər ki, bu toylar bəzi media qurumları tərəfindən gündəmə çevrilməsin və cəmiyyətdə qıcıq doğurmasın”-deyə E.İslamoğlu bildirdi.
Leyla QARAXNLI
