Elxan Əliyev: “Mərmər materiallı daş yer üçün deyil, divar üçün nəzərdə tutulub, ancaq…”
Paytaxta qar yağanda yaşlılar onu təmizlik, sağlamlıq, bolluq-bərəkətliliyin nişanəsi kimi dəyərləndirirlər. Doğrudan da hər tərəfin təmiz və ağappaq qarla örtüldüyünü görəndə, bir anlığa bütün eyiblərin yox olduğunu düşünürük. Amma qarın özü ilə hansı problemlər gətirdiyini fikirləşəndə dərhal sevinc hisslərimiz qəm-qüssə ilə əvəzlənir.
Axı paytaxtımızın qarlı qış günlərində ortaya çıxan problemləri saymaqla qurtarmır. Hər zaman olduğu kimi, bu il də qarın yağması ilə paytaxtda həyat iflic vəziyyətinə düşdü. Qar Bakı şəhərinin problemlərinin üstünü örtmədi, onları üzə çıxartdı. Yolların buz bağlaması, küçələrin, səkilərin, pilləkənlərin vaxtında qardan təmizlənməməsi və s. problemlər şəhər sakinlərini əlavə əziyyətə saldı.
Hamını narahat edən əsas problemlərdən biri həm piyada, həm də nəqliyyatın hərəkət etdiyi yolların vəziyyəti ilə bağlıdır. Qar dayansa da, küçələrin və səkilərin buzu təmizlənməyib. Buzu təmizlənməyən, şüşə kimi olan səkilər piyadaların qəniminə çevrildi. Buna səbəb isə yol kənarında olan gözəllik salonları, dönərxana, kafe–restoranlar və digər iaşə obyektlərinin qarşısının mərmər metlaxla döşənməsidir. Qar yağan kimi həmin obyektlərin qarşısı şüşə kimi buz bağlayır. O ərazidən keçmək istəyən şəxslər isə yıxılır və müxtəlif dərəcəli xəsarətlər alır. Məlumat üçün bildirək ki, 24 fevral tarixində 90 nəfər Səhiyyə Nazirliyi Elmi-Tədqiqat Travmatologiya və Ortopediya İnstitutuna müraciət edib, 15 nəfər əməliyyat üçün stasionara qəbul edilib. Yıxılmalara səbəbsə, əsasən, yol kənarındakı obyektlərin qarşısındakı mərmər metlaxların şüşə kimi buz bağlamasıdır. Piyadalar da səkilərdə yeriməyin avtomobil şütüyən yollarda gəzməkdən daha təhlükəli olduğunu deyirlər. Onlar bildirir ki, qar yağan kimi Bakıda nəinki səkilər, piyada keçidləri, parklarda da hərəkət təhlükəli olur: “Piyada keçidini, səkini piyadaların təhlükəsizliyi üçün yaradıblar. Amma piyadalar qarlı havada səki ilə, piyada keçidləri ilə gedəndə, parklarda hərəkət edəndə sürüşüb xəsarət ala bilərlər. Çünki sözügedən yerlərdə yerə döşənilən daşlar xizək kimi sürüşkəndir”.
Sərnişinlər qeyd edir ki, bu hal daha çox Yasamal rayonu Zahid Cəlilov, Şəfaət Mehdiyev və digər ərazilərdə müşahidə olunur. Bildirirlər ki, Yasamal Rayon İcra Hakimiyyəti və bələdiyyəsi bu kimi halların yaşanmaması üçün hər hansı bir tədbir görmür.
“Restoran, şadlıq evi, ticarət mərkəzi açan şəxslər obyektin qarşısına, yəni səkiyə istədikləri rəngdə, istədikləri materialda daş döşəyirlər, bu, şəhərsalma qaydalarına ziddir”
Sosial sahə üzrə ekspert Elxan Əliyev “Bakı-Xəbər”ə açıqlamasında qeyd etdi ki, paytaxtın əksər yerlərində yerə daş döşənərkən qarlı-yağışlı hava şəraiti nəzərə alınmayıb: “Bakıda bəzi parklarda, səkilərdə, iaşə obyektlərinin qarşısında buzlu havada gəzmək piyadalar üçün təhlükə yaradır. Səbəb yerə döşənilən daşların sürüşkən olmasıdır. Bu gün paytaxtda belə ərazilər çoxdur. Mərmər materiallı daş yer üçün deyil, divar üçün nəzərdə tutulub. Həmin yerlərdə layihələndirmə düzgün aparılmayıb. Ona görə də, bu gün mərmər döşənən yerlərdə qar yağan kimi piyadalar hərəkət edə bilmir. Belə yerlərdə yaşlı insanlar da, uşaq da yıxılaraq xəsarət ala bilər. Əslində piyada keçidlərində, səkilərdə, iaşə obyektlərinin qarşısında, parklarda yerə döşənilən daş bişirilmiş, üstü diyircəkli daşlar olmalıdır. Aidiyyəti qurumlar bu məsələni diqqətə almalıdır”.
Ekspert onu da əlavə etdi ki, bu gün paytaxtda digər problemi iaşə obyektləri yaradır: “İndi şadlıq evləri, restoranlar inşa olunarkən səkidə piyadaların hərəkəti nəzərə alınmır. Əslində hansı obyekt inşa olunur-olunsun, səkiyə döşənilən daş eyni olmalıdır. Amma bu gün biz fərqli mənzərə ilə rastlaşırıq. Restoran, şadlıq evi, ticarət mərkəzi açan şəxslər obyektin qarşısına, yəni səkiyə istədikləri rəngdə, istədikləri materialda daş döşəyirlər. Bu, şəhərsalma qaydalarına ziddir. Səkiyə döşənilən daşın rəngi, materialı səkinin bir hissəsində bir cür, digər hissəsində başqa cür ola bilməz. Amma şəhərdə iaşə obyekti istifadəyə verən şəxslər buna məhəl qoymurlar. Bir də görürsən, təmirdən sonra səkinin daşlarını söküb yerə mərmər döşəyirlər. Bişmiş romb şəkilli, üzəri diyircəkli daşlar səki, piyada keçidi, parklar üçün daha münasibdir. Səkiyə döşənilən daş hansısa obyektin görünüşünə xələl gətirirsə, uyğunsuzluq yaradırsa buna görə yerə sürüşkən materialdan daş döşənilə bilməz. Bu kimi halların qarşısı alınmalıdır”.
Günel CƏLİLOVA
