Fərqanə Nağıyeva: “İrandan idxal olunan məhsullarda GMO-lar ciddi tədqiq olunmalıdır”
Məlum olduğu kimi, İrandan idxal olunan turşu lavaş, ərik qurusu, şirin çörək (keks) istehlaka yararsız olub. Azərbaycan Qida Təhlükəsizliyi Agentliyinin (AQTA) müfəttişləri tərəfindən götürülmüş nümunələrin laborator müayinəsi nəticəsində məhsul partiyalarının normativ sənədlərin tələblərinə cavab vermədiyi aşkarlanıb.
Faktla bağlı müvafiq qərar qəbul olunaraq məhsul partiyaları məhv edilib. Bununla yanaşı, İrandan idxal olunan şokoladlı konfet və kreker məhsullarında da uyğunsuzluq aşkarlanıb. Onu da qeyd edək ki, sınaq nəticəsinə əsasən, məhsulların tərkibində genetik modifikasiya olunmuş orqanizmlər (GMO) aşkarlanıb. Aşkar olunmuş faktla bağlı qanunvericiliyə uyğun olaraq məhsul partiyaları məhv edilib.
Danılmaz faktdır ki, bu gün bazarda, marketlərdə İran məhsulları kifayət qədərdir. Onların keyfiyyətinə nə dərəcədə güvənmək olar? Bu istiqamətdə hansı işlər görülməlidir?
“Geni dəyişdirilmiş məhsulların ölkəmizə daxil olmasının qarşısını yalnız mükəmməl ekspertiza ilə almaq mümkündür”
Qida eksperti Fərqanə Nağıyeva "Bakı-Xəbər"ə şərhində bildirdi ki, İranda geni modifikasiya olunmuş qidalar istehsal edilir: “İrandan idxal olunan məhsullarda GMO-lar ciddi tədqiq olunmalıdır. Dəfələrlə İrandan gələn mallara qadağa qoyulub. Geni dəyişdirilmiş məhsulların ölkəmizə daxil olmasının qarşısını yalnız mükəmməl ekspertiza ilə almaq mümkündür”.
Ekspertin sözlərinə görə, keyfiyyətsiz qida insan ömrünü qısaldar, insanları xəstəliklərə düçar edər: “AQTA -nın bu sahədəki fəaliyyəti çox əhəmiyyətlidir. AQTA yalnız malların adını müəyyənləşdirməklə kifayətlənməməlidir: Yaxşı olar ki, həmin məhsulların satıldığı ünvanları da açıqlasın. Ümumiyyətlə, İran məhsullarının satıldığı yerlərə nəzarət daha da artsın. Məlumdur ki, İranda heyvan genlərinin bitkiyə köçürülməsi baş verir. Amma buna baxmayaraq, İrandan Azərbaycana çoxlu sayda qida məhsulu gətirilir. İdxalın qarşısını almaq üçün yerli istehsalın səviyyəsini artırmaq lazımdır. Yerli istehsal hər cəhətdən üstündür. Çünki yerli istehsalda orqanik gübrələrdən istifadə olunur”.
Günel CƏLİLOVA
