Naxçıvanda ləğv edilmiş yol şirkətlərinin başında kimlər dayanır?..
Vasif Talıbovun tarixcəsi korrupsiya ilə çirklənmiş yol şirkətərini kim bağladır?
Hamıya bəllidir ki, Naxçıvan Muxtar Respublikası Vasif Talıbovun idarəçiliyi dönəmində mini "Şimali Koreya"nı xatırladırdı. Arzuolunmaz jurnalustləri, xəbər agentliklərini, qəzetləri, hətta şəxsləri Vasif Talıbovun tapşırığına əsasən elə hava limanındanca geri qaytarırdılar. Vasif Talıbovun xoşlamadığı qəzetlər Naxçıvanda yayılmırdı. O qəzetlərin hansılar olduğunu oxucularımız çox yaxşı bilirdi.
Muxtar Respublikada bütün sahələr yalniz Vasif Talıbovun zövqünə uyğun olaraq fəaliyyət göstərirdi. Vasif Talıbovun zövqü isə, maşallah olsun, çox qeyri-adi idi. Ölkədə "Naxçıvan xanı" kimi ad qazanmış bu personanın yaxşı iştahası və qəti tənqidi xoşlamamaq mərəzi var idi. Hətta bir müəllimənin dilindən zorla bir iradı "kəlbətinlə dartaraq" onu Naxçıvandan sürgün etdirmişdi ki, o xanım məni tənqid edib, xanımda cəsarətə bax...
Belə ki, bir gun Vasif Talıbov yeni məktəbin açlışında iştirak edib, sonra bir neçə sinfə girib muəllim və sagirdlərlə "səmimi söhbət" edib. Bilmirəm, təsadüfənmi, yoxsa məktəb rəhbərliyinin təxribati nəticəsindəmi, Talıbov muəllimi təlimat almayan bir sinfə girib. Müəllimdən təkidlə soruşub ki, bu yeni məktəbdə hansısa qüsur görürsünüzmü? Əvvəl müəllimə deyib ki, hər şey əladır. Amma Vasif müəllim (hərcənd ki, mənim müəllimləri təhqir etmək fikirim yoxdur, bir Allah bilir...) təkid edib, müəllimənin "saqqızını oğurlaya" bilib... Xanım da çəkinə-çəkinə deyib ki, Vasif müəllim, kanalizasiya məsələsini bir təhər ötüşdürərik, o düzələn işdi, qüsur deyil, amma belə müasir məktəbə istilik sistemi də çəksələr lap əla olar. Müəllimə və həyat yoldaşı bir həftənin içində işdən qovulur. Onlar gəlib Bakıda iş, kirayə mənzil tapandan sonra bəlli olub kı, bu sürgünün səbəbi məhz o tənqid imiş...
İsə bax, Vasif Talıbov məktəb açır, nə kanalizasiyası var, nə də istilik sistemi, amma hesab edir ki, məktəbin heç bir qüsuru yoxdu. Qeyri-adi zövq bax budur...
İndi hamı bu ləğv edilən yol şırkətlərinin adını Google-də axtarır ki, bunların suçu nəymiş, nə qələt ediblər ki, belə cəza alıblar? Axtarmayin, bu, Vasif Talıbovun "yol buketi" şirkətləridir. Onlar haqqında heç kim heç nə bilmirdi və heç nə də yaza bilməzdi. Məhz bu səbəbdən bu şirkətlər haqqında media məkanında yalnız nadir pozitiv informasiyalar var.
Hətta bu şirkətlərdən birində çalışan bir mühəndislə həmsöhbət olmaq şərəfinə nail ola bildik. Naxçıvanda "Vasif Talıbov xofu" hələ də nə qədər güclüdürsə, həmin şəxs nə öz adının, nə də şirkətin adının çəkilməsini istəmədi. Etika xatirinə biz onun və çalışdığı şırkətin adını hallandırmırıq.
Həmin mühəndis deyir ki, bu şirkətlərin adını mətbuatda, hətta pozitiv mənada çəkməyi Vasif Talıbov qadağan eləmuşdi. Özü də niyyətini bir atalar sözü ilə ifadə edirdi: "Dədəmin ölməyi məni narahat eləmir, amma Əzrail qapımı tanıyacaq".
Bu şirkətlərə ayrılan və xərclənən vəsaitin hesabatı qəpiyinə qədər Vasif Talıbova məruzə edilirmiş. Bu şirkətlər Naxçıvan Muxtar Respublikasının büdcəsini talamaq üçün bir vasitəyə çevrilibmiş. Həmin mühəndis deyir ki, bu şirkətlərə ayrılan pulla Naxçıvan Muxtar Respublikasının bütün ərazisini 2 metr asfaltla örtmək olardı. Amma indi Naxçıvanın əksər kənd yolları ilə qışda camaat rezin cəkmə ilə güclə gəzir.
İndi ləğv edilən şirkətlərin əvəzinə yeni rəhbərlik özünə yaxın adamlara komanda verəcək ki, yeni yol sirkətləri açsınlar və onlarla əməkdaşlıq etsinlər. Bəlkə də artıq açıblar. 40-200 manat nizamnamə fondu ilə yeni MMC açmağa nə var ki, ikinin vurma cədvəlindən də asandır...
Yeni rəhbərlik köhnə MMC-lərlə guya ona görə işləmək istəmir ki, onların fəaliyyət tarixçəsi korrtupsiya ilə çirkləndirilib. Görəsən yeni rəhbərliyin ətrafının açdığı yeni yol sirkətlərinin fəaliyyət tarixçəsi necə ilə korrupsiya ilə çirklənəcək?
Artıq Vasif Talıbov yoxdu, cənablar... Yoxsa siz də "arzuolunmaz" jurnalustlərin və qəzetlərin Naxçıvan səfərinə qadağa qoyacaqsınız? Xoşunuza gəlməyən şəxsləri ya sürgünə, ya da dəlixanaya gondərəcəksiniz?
Naxçıvan Muxtar Respublikasında qeydiyyatda olan yeddi yol təmir istismar şirkəti fəaliyyətini dayandırır.
Fəaliyyətini dayandırdığını elan edən şirkətlər "Ordubad Yol Təmir İstismar", "Sədərək Yol Təmir İstismar", "Şahbuz Yol Təmir İstismar", "Babək Yol Təmir İstismar", "Kəngərli Yol Təmir İstismar", "Şərur Yol Təmir Tikinti İstismar" Məhdud Məsuliyyətli Cəmiyyətləridir (MMC).
Onların hansı səbəbdən ləğv olunması barədə məlumat göstərilmir.
Yalnız o məlumdur ki, kreditorlar tələblərini 2 ay ərzində sözügedən şirkətlərin hüquqi ünvanlarına bildirə bilərlər.
Qeyd edək ki, "Babək Yol Təmir İstismar" MMC 2007-ci ildə dövlət qeydiyyatına alınıb. Nizamnamə kapitalı 200 manat olan MMC-nin qanuni təmsilçisi Əsgərov Arif Əsgər oğludur.
"Ordubad Yol Təmir İstismar" MMC 2017-ci ildə dövlət qeydiyyatına alınıb. Nizamnamə kapitalı 200 manat olan MMC-nin qanuni təmsilçisi İsazadə Türkan İsa oğludur.
"Sədərək Yol Təmir İstismar" MMC 2008-ci ildə dövlət qeydiyyatına alınıb. Nizamnamə kapitalı 40 min manat olan MMC-nin qanuni təmsilçisi Zamanov Malik Vəliyev oğludur.
"Şahbuz Yol Təmir İstismar" MMC 2007-ci ildə dövlət qeydiyyatına alınıb. Nizamnamə kapitalı 200 manat olan MMC-nin qanuni təmsilçisi Dadaşov Səbuhi Bəşir oğludur.
"Kəngərli Yol Təmir İstismar" MMC 2008-ci ildə dövlət qeydiyyatına alınıb. Nizamnamə kapitalı 100 manat olan MMC-nin qanuni təmsilçisi Mehdiyev Çingiz Mehman oğludur.
“Şərur Yol Təmir Tikinti İstismar" MMC 2007-ci ildə dövlət qeydiyyatına alınıb. Nizamnamə kapitalı 200 manat olan MMC-nin qanuni təmsilçisi İbrahimov Mikayıl Məmməd oğludur.
Sonda qeyd edək ki, ilbəli Naxçıvana təyyarə biletlərinin bahalaşdırılması da yeni rəhbərliyin işinə yarayir. Amma ehtiyatlı olun, Paşinyanın beyninin qurdu tərpənər, Zəngəzur dəhluzini açar, 10-15 manatla gedərik Naxçıvana! Onda nə edərsiniz?
Akif NƏSİRLİ
