Vaxtilə adına mahnılar bəstələnən, yara ən gözəl hədiyyə sayılan Quba alması dardadır. Fermerlər almanın satılmamasından, dəyərinin azalmasından şikayətlənir. Qubalı bağbanlar altı ay əvvəl yetişdirdikləri almanın yarı hissəsini hələ də sata bilməyiblər.
Çünki yerli bazarlardan gələn qiymət və təkliflər onları qane etmir. Fermerlər qeud edir ki, piştaxtalarda ən çox satılan meyvə alma olsa da, onun alıcısını tapmaq çox çətindir.
Maraqlıdır, bu problem necə həll olunmalıdır?
Vüqar Bayramov: “Yerli istehsal məhsulların yeni bazarlara çıxarılmasına ehtiyac var”
Millət vəkili Vüqar Bayramov “Bakı-Xəbər”ə açıqlamasında qeyd etdi ki, aqrar sektor və qeyri-neft sektorunda ixrac imkanlarının genişləndirilməsi vacibdir: “Nəzərə almaq lazımdır ki, daxili bazarla yanaşı, məhsulların ixrac edilməsi fermerlər üçün daha çox gəlirin əldə edilməsinə səbəb olacaq. Bu səbəbdən də yetişdirilən alma və digər kənd təsərrüfatı məhsullarının daxili bazarla yanaşı, ixracının dəstəklənməsi də vacibdir. Bunun üçün texniki və logistik dəstəyin artırılmasına ehtiyac var. Həmin məhsullar ixrac olunarsa onların daha qısa zamanda realizə edilməsinə, eləcə də fermerlərin daha çox gəlir əldə etməsinə şərait yaradar. Bu da fermerlərin məhsul istehsalı ilə bağlı ziyana düşməsinin qarşısını alacaq. Beləliklə, ölkəyə daxil olacaq valyutanın da həcmi artacaq”.
Millət vəkili hesab edir ki, yerli istehsal məhsulların yeni bazarlara çıxılmasına ehtiyac var. Bu da fermerlər üçün yeni gəlir imkanı deməkdir.
Akif Nəsirli: “Almanın keyfiyyəyi yüksək olarsa, daxildə qiymət onu qane etməzsə, ixrac edə bilər”
Liberal İqtisadçılar Birliyinin sədri Akif Nəsirli “Bakı-Xəbər”ə şərhində bildirdi ki, yerli fermerlər hələ də sovet düşüncəsindən ayıla bilməyiblər. Fermerlər qiymətin ucuz olma səbəbini araşdırmalıdır: “Onu da deyim ki, hökumət qiymət siyasəti ilə bağlı tənzimləmə həyata keçirə bilər. Qiymətin ucuz olması müvəqqəti xarekter daşıyırsa hökumət o almaları alıb ixrac edə bilər, başqa ölkələrdə satışını reallaşdırar. Ümumiyyətlə, bazarla işləməyi bacarmaq lazımdır.
Həmçinin, fermerlər məhsul istehsal edərkən onun keyfiyyətinə diqqət etməlidir. Çoxlu zay məhsul yetişdirməkdənsə, keyfiyyətli məhsul istehsalı daha münasibdir. Almanın keyfiyyəyi yüksək olarsa, daxildə qiymət onu qane etməzsə, ixrac edə bilər. Ancaq yerli almaların əksəriyyəti xarici bazar üçün münasib deyil. Çünki onların keyfiyyət göstəricisi aşağıdır. Fermerlər kəmiyyətə yox, keyfiyyətə önəm verməlidir. Düzdür, kəmiyyət də vacib məsələdir, ancaq keyfiyyəti yüksəltsək gəlir də artar”.
Günel CƏLİLOVA
