Bakı Dövlət Universiteti (BDU) və İsrailin Yerusəlim İbrani Universiteti (HUJI) arasında “Biotexnologiya” ixtisaslaşması üzrə həyata keçirilən beynəlxalq ikili diplom proqramının idarəedilməsini təmin edən Rəhbər Komitənin növbəti görüşü olub. BDU-dan baki-xeber.com-bildirilib ki, Rəhbər Komitənin görüşündə rektor Elçin Babayev və HUJI-nin Kənd təsərrüfatı, qida və ekologiya fakültəsinin dekanı Saul Burdman həmsədrlər qismində çıxış ediblər.
İclasda proqramın fəaliyyəti, perspektivləri, maliyyə və resurs planlaması, idarəolunması, hesabatlılığı, proqram üzrə təhsil alan tələbələrin tədqiqat layihələrinə cəlbi və keyfiyyət təminatı kimi geniş mövzulara toxunulub.
Rəhbər Komitənin HUJI-dən olan üzvləri ikili diplom proqramı tələbələrinin akademik nailiyyətlərinin müqayisəsini və təhlilini apararaq bildiriblər ki, gənclərin məzun olduqdan sonra biotexnologiya, bitki və qida mühəndisliyi kimi hazırda çox aktual olan sahələr üzrə doktorantura təhsilinə və tədqiqata meyilli olmaları çox yaxşı göstəricidir.
Sonda BDU-nun tədqiqatçıları Aygün İsrayılova və Nurlan Əmrahov “Göbələk patogenləri ilə mübarizə strategiyası kimi bitki immun reaksiyasını gücləndirən yeni fitohormon törəmələrinin və elisitorların aşkar edilməsi və tədqiqi” və “Mikroblara qarşı yeni növ maddələrin alınması” mövzularında BDU və HUJI-nin hazırda birgə həyata keçirdiyi tədqiqat layihələrinin cari vəziyyəti barədə təqdimatla çıxış ediblər.
Xatırladaq ki, BDU və HUJI arasında “Biotexnologiya” ixtisaslaşması üzrə həyata keçirilən ikili diplom proqramı 2023-cü ilin sentyabrından başlayıb. Proqramın ilk 10 tələbəsi bu il məzun olmağa hazırlaşır. Qeyd edilən magistr proqramı “Azərbaycan Respublikasında ali təhsil sisteminin beynəlxalq rəqabətliliyinin artırılması üzrə 2019-2023-cü illər üçün Dövlət Proqramı” çərçivəsində maliyyələşdirilir. Günel CƏLİLOVA
