Almaniyanın “Porşe” avtomobil şirkəti rəsmi açıqlama yayaraq, elektromobillərə keçidin yanlış olduğunu və benzinlə işləyən mühərriklərə qayıtdığını bəyan edib. Şirkət bildirib ki, daxiliyanma mühərriklərinin yeni modellərinin yaradılmasına 800 milyon avro sərmayə qoymaq fikrindədir.
Qeyd edək ki, dünənə qədər “Porşe” konveyerlərindən çıxan avtomobillərin maksimin 20%-i ənənəvi yanacaqla işləyəcəyini qeyd edirdi. İndi isə konsernin rəhbərləri bu siyasətin ciddi səhv olduğu qənaətinə gəliblər.
Onların fikrincə, benzin mühərrikləri hələ uzun müddət bazarda qalacaq. Ona görə, 2030-cu ildən sonra da “Cayenne”və “Panamera” modelləri üçün V-8 mühərriklərinin istehsalını davam etdirəcəklər. “Ford”, “General Motors”, “Volkswagen” və “Volvo” şirkətləri də eyni mövqedən çıxış edirlər.
Maraqlıdır, bu, elektromobillərə keçiddə geri dönüş yarada bilərmi? Azərbaycanın avtomobil bazarında bu tendensiya necə əks olunacaq?
Aslan Əsədov: "Xüsusi istehsalda müəyyən dəyərləndirmə etmək olur, qarşılıqlı fikir mübadiləsi aparılır, ancaq..."
Nəqliyyat eksperti Aslan Əsədov "Bakı-Xəbər"ə açıqlamasında qeyd etdi ki, kütləvi və xüsusi istehsal mövcuddur: "Kütləvi istehsalla xüsusi istehsalın fərqi ondan ibarətdir ki, yaradıcı potensial dəyərləndirmək olmur. Xüsusi istehsalda müəyyən dəyərləndirmə etmək olur, qarşılıqlı fikir mübadiləsi aparılır. Bu səbəbdən də elektromobillər, elektriklə işləyən nəqliyyat vasitələrin hər bir detalı xüsusi qayğı istəyir, bu da insanlar arasında narazılıga səbəb olur. Qeyd edilən maşınları kütləvi istehsalla dəyərləndirmək olmaz. Ancaq ümumi istehsalda bu kimi problemlər yaşanmır".
Həmsöhbətimiz onu da əlavə etdi ki, Azərbaycan alıcısı yüksək dərəcədə analiz etmək qabiliyyətinə malikdir. Məhsulun keyfiyyətini və digər məqamları nəzərdən keçirir.
Eldəniz Cəfərov: "İri avtomobil sənayeçiləri alıcıları itirmək istəmir"
Nəqliyyat eksperti Eldəniz Cəfərov hesab edir ki, dünyada hələ də ənənəvi daxiliyanma mühərrikli avtomobillərə tələbat çoxdur: “İri avtomobil sənayeçiləri də bu alıcıları itirmək istəmirlər. Onu da qeyd edim ki, bəzi markaların modelləri əsasən idman üslublu avtomobillərdir və onların elektrik mühərrikli olması heç də əlverişli sayılımır. Yəni alıcıları itirə bilərlər. Məlumdur ki, elektromobil istehsalı çox böyük vəsait tələb edir. Burada ekoloji standartlardan söhbət gedir. Eyni zamanda bəzi ölkələrdə avtomobil istehsal etdikdən və növbəti mərhələdə avtomobilin zəmanət müddəti bitəndən, yəni köhnəldikdən sonra onların elektrik akkumulyatorlarının utilizasiyası məsələsi də həmin sənayeçilərin üzərinə qoyulub. Sənayeçilər bunu çox böyük maliyyə itkisi kimi dəyərləndirirlər. Lakin bu o demək deyil ki, avtomobil istehsalçıları elektromobildən tam imtina edirlər. İstehsal davam edir, dünyanın bütün aparıcı avtomobil istehsalçısı şirkətlərinin hamısının bir neçə elektrik mühərrikli modelləri mövcuddur və satışdadır. Sadəcə, bu şirkətlər bəzi modellərin elektromobilə keçidini təmin etməyəcəklər".
Günel CƏLİLOVA
