Artıq növbəti bələdiyyə seçkiləri tarixə çevrildi, amma əksər bələdiyyə üzvlərinin fəaliyyəti heç də keçmişdə qalmadı. Ölkənin əksər bələdiyyə üzvləri dəyişməz qaldı, yəni yenidən seçildi.
Məsələn, Masazır bələdiyyəsi də belələrindəndir. Masazır qəsəbəsində əhalidən soruşanda ki, kimləri bələdiyyə üzvü seçdiniz, suala sualla cavab verirlər ki, bəyəm bələdiyyə seçkiləri keçirildi? Masazır qəsəbəsində çoxları inad edir ki, hələ bələdiyyə seçkiləri olacaq, keçirilməyib.
Əlyar Veyisov: "Bələdiyyə və dövlət qurumları elə bilirlər ki, Masazır qəsəbəsində yalnız bir küçə var - Əlağa Vahid küçəsi"
Qəsəbədə bizi ilk qarşılayan sakin, Əlyar Veyisov bizimlə söhbətində bildirdi ki, gənclik illərindən bu kəndə köçüb: "Fəhlə babayam, evimi də 90-larda özüm tikmişəm. 30 ildən çoxdur bu qəsəbədə yaşayıram. Bu illər ərzində mənim yaşadığım küçəyə iki dəfə asfalt döşənib. Hər ikisində də qonşulardan pul yığıb, yolu özümüz asfaltlamışıq. İndi də hazırlaşırıq, məhəllə yollarına asfalt döşəyən özəl şirkətlər var. Asfaltı Əlağa Vahid küçəsindən qaşıyıb yığırlar KAMAZ-a. Həmin asfaltı aparıb yeniden bişirib gətirib bizə satırlar. Təzə asfaltın kubmetri 8-10 manatdır. Köhnə asfaltdan hazırlanan materialın bir maşınını 200 manata verirlər. İndi Masazırda əhali məhəllə yollarını yalnız həmin özəl şirkətlər vasitəsi ilə öz cibinin pulu ilə abadlaşdırır. Bələdiyyə və dövlət qurumları isə elə bilirlər ki, Masazır qəsəbəsində yalnız bir küçə var - Əlağa Vahid küçəsi. Bu küçə tez-tez təmir edilir, kənarları da hündür hasarlarla məhdudlaşdırılıb. Bu hasarları ona görə tikiblər ki, Masazır kəndinin qalan tərəflərini dövlət məmurları görməsin. Çunki hasarın o tayında həyat başqadır. Kənarları al-əlvan çiçəklərlə bəzədilən Əlağa Vahid küəsinin kənarı ilə çəkilən barının o tayında yağış yağanda palçıq dizə çıxır. Əhali yağış yağanda evdən iki ayaqqabı ilə çıxmalı olur. Qaloş və ya rezin çəkmələrlə Əlağa Vahid küçəsinə qədər gəlirlər. Burada isə ayaqqabını dəyişib təmizini geyinib, şəhərə gedirlər. Ona görə də yağış yağanda Əlağa Vahid küçəsinin hər tinində qaloş və rezin çəkmələr görə bilərsiniz. Onları şəhərə gedən sakinlər soyunub qoyub".
Ə.Veyisov deyir ki, onun evinin çıxarışı yoxdur, qeyri-qanuni tikilidir, amma hər il gəlib ondan 25 manat əmlak vergisi alırlar: "Qonşumun "kupça"sı var, ona vergisi barədə SMS ilə məlumat verirlər, amma mənim vergimi gəlib qapıda alırlar, qəbz verirlər. Oğlum savadlıdı, deyir ki, bizə əmlak vergisi düşmür, "kubça"mız yoxdur, amma gəlib mənə elə dil tökürlər gətirib verirəm".
Qəsəbə sakini Müşfiq Xankişiyevdən soruşduq ki, bələdiyyə yığdığı vəsaitin necə və hara xərcləndiyi barədə sakinlərə hesabat verməlidi, verirmi?
M. Xankişiyev dedi ki, onlar yığdığı vergi ilə yalnız maaş alırlar: "Bələdiyyə üzvləri hərəsi adına bir bələdiyyə ştatı yazdırıb, heç bir iş görmürlər, amma maaş alırlar. Masazırda bələdiyyə qəbir və ev yerləri satmaqla məşğuldur. Nə iş görüblər ki, nədən də hesabat versinlər? Yalnız vergini yığıb maaş alıblar, vəssalam.
Bələdiyyə bir dəstə makler saxlayır. Torpaqları yalnız onlara metr-metr satırlar. Maklerlər də aldıqları torpaqda ev tikib satırlar. Maklerlər həm torpaq alanda bələdiyyəyə pul verirlər, həm də evi tikib başa gətirib satanda bələdiyyəyə "şirinlik" verirlər. Qəbir yerləri də günbəgün bahalaşır.
Mən bələdiyyələrin kiməsə hesabat verdiyini görməmişəm".
Amma "Bələdiyyələrin statusu haqqında" Azərbaycan Respublikasının Qanununda nəzərdə tutulur ki, bələdiyyələr ildə ən azı bir dəfə əhaliyə fəaliyyəti barədə hesabat verməlidir. Hesabat həm də hamı üçün əlçatan olsun deyə, onu bələdiyyə binasının qapısından asmalı, buklet şəklində hazırlayıb paylamalı və internet resurslarında yerləşdirməlidir ki, bütün əhali üçün əlçatan olsun.
Masazır bələdiyyəsinin üzvləri və vəzifəli şəxslərindən heç biri ilə əlaqə saxlaya bilmədik. Bununla yanaşı, əhalinin bu qədər narazılığı olan bələdiyyənin 25 illik fəaliyyətinə dair internet rezurslarında bir dənə də hesabat tapa bilmədik. Ümumiyyətlə, Masazır bələdiyyəsinin internet saytı yoxdur.
İnternet resurslarında Masazır bələdiyyəsi haqqında yalnız aşağıdapkı qısa məlumatı tapa bildik:
- Masazır bələdiyyəsi yarandığı andan ərazinin abadlaşdırılması, daxili küçələrə asfalt və çınqıl döşənməsi, ağac, gül kollarının əkilməsi istiqamətində bir çox işlər görmüşdür. Məktəblərdə və uşaq bağçasında əsaslı təmir işləri aparmış, yeni iki mərtəbəli müasir tələblərə cavab verən poliklinika, bələdiyyə və icra nümayəndəsi üçün inzibati bina inşa edərək sakinlərin istifadəsinə verilmişdir. Mərkəzi Ə.Vahid küçəsi tamamilə yenidən qurulmuş, küçə genişləndirilmiş, divarlar bəzəkli çay daşı ilə üzlənmiş, dekorativ ağac və gül kolları əkilmiş, qəzəlxan Ə.Vahidin abidəsi qoyulmuşdur.
Ünvan: Masazır kəndi, Ə.Vahid küçəsi
Tel: (012) 347-80-24
Sədr: Fətullayev Rüfət Səyavuş oğlu
(012) 347-69-00
Müavin: Nəbiyev Rövşən Allahverdi oğlu
(012) 347-80-24
Müavin: Sadıqov Elşad Hüseyn oğlu
(012) 347-80-24".
Bu qısa məlumatda qeyd edilən telefon nömrələrinin heç birinə zəng çatmır.
Günəş Əliyeva: "Əhali məcbur qalıb darvazasının qabağına tullantı qutusu alıb qoyub. Kimdə tullantı qutusu yoxdur, tullantını küçəyə atır"
Qəsəbə sakini Əliyeva Günəş deyir ki, əvvəllər qəsəbədə sıx tullantı toplanan məntəqələr var idi: "Bələdiyyələr tullantı-toplanış məntəqələrini də boşaldıb, ev yeri - həyət kimi maklerlərə satıb, şərikinə pul qazandılar. İndi 5 km uzunluğunda küçədə cəmi iki tullantı toplanan məntəqə var. Əhali məcbur qalıb darvazasının qabağına tullantı qutusu alıb qoyub. Kimdə tullantı qutusu yoxdur, tullantını küçəyə atır. Ona gorə də bütün qəsəbə zibilin içindədir".
Adının cəkilməsini istəməyən digər qəsəbə sakini deyir ki, mən bələdiyyə sədrinin qəbuluna gedib dedim ki, evimin yanında 2 sot torpaq var, onu sat mənə. Dedi ki, satmağa torpağımız yoxdur. Səhəri günu maklerlər gəlib həmin yerdə ev tikməyə başladılar".
Akif NƏSİRLİ
