Uşaqların təhlükəsiz mühitdə böyüməsi hər şeydən önəmlidir. Azyaşlıların evdən sonra ən çox vaxt keçirdikləri məkan əsasən bağçalar olur. Elə buna görə də balacaların təhlükəsizliyinin təmin olunmasında əsas məsuliyyət bağçaların üzərinə düşür. Uşaq bağçalarında tez-tez neqativ hallarla rastlaşırıq.
Bunların bəzisi ictimailəşir, bəzisi isə elə bağçanın içərisində “həll olunur”. Bunlar, əsasən, uşaqların döyülməsi, küncə qoyulması, onlarla kobud rəftar və bu kimi məlumatlardır. Belə neqativ hallar həm dövlət, həm də özəl uşaq bağçalarında qeydə alınıb. Bu günlərdə Bakıda yerləşən "Orbita" uşaq bağçasında uşaqların döyüldüyü iddiası ortaya çıxıb. Bu barədə məlumatlar sosial şəbəkələrdə yayılıb. Məlumata görə, videoda döyülən uşağın adı Melisadır. Görüntülər çəkilən zaman Diana adlı müəllimə kameranın işləməyindən xəbərsiz olub.
“Orbita” uşaq bağçası: “Uşaqlara zorakılıq tətbiq edən müəllim işdən azad olunub, bundan əlavə…”
Məsələ ilə bağlı “Orbita” uşaq bağçasından “Bakı-Xəbər”ə bildirildi ki, yoxlama işləri gedir: "Belə bir hadisə bir də təkrar olunmayacaq. Buna görə hər kəsdən üzr istəyirik. Uşaqlara zorakılıq tətbiq edən müəllim Diana Maksimovna Bahəddinova işdən azad olunub. Bundan əlavə, bağçanın digər məsul şəxsləri barədə də intizam tədbirləri görülüb”.
Cavanşir Əliyev: “Bağça müəllimləri işə götürülərkən xüsusi psixoloqların rəylərindən, müayinəsindən, seanslarından keçməlidirlər”
Təhsil eksperti Cavanşir Əliyev “Bakı-Xəbər”ə şərhində bildirdi ki, metodist məktəbəqədər yaşlı uşaqlarla işləyən, onlara müəyyən oyunlarla, ibtidai təhsil elementləri ilə ilkin bilikləri öyrədən şəxsdir. Tərbiyəçi isə həmin uşaqlara nəzarət edən, oyun oynayarkən onların təhlükəsizliyinə, bir-birləri ilə dalaşmamasına, bir sözlə, neqativ halların yaşanmamasına çalışan şəxsdir: “Bağça müəllimləri və ibtidai sinif müəllimləri işə götürlərkən xüsusi psixoloqların rəylərindən, müayinəsindən, seanslarından keçməlidirlər. Bağça müəlliməsi olmaq üçün diplom və 4 illik bakalavr təhsili kifayət etmir. Bir bağça müəlliminin özəlliyi, onun davranışı, onun uşağa qarşı olan diqqəti qayğısı və öz həyatında olan travmalar nəzərə alınmalıdır. Bəzən həyatında travmaları olan, xoşbəxt olmayan, özü şiddət görən bir insan bağçada təlim-tərbiyə işləri ilə məşğul olmağa başlayır. Buna görə də işə götürülməzdən əvvəl müyainələrdən keçmək vacibdir".
Günel CƏLİLOVA
