Dövlət Statistika Komitəsinin yaydığı hesabatdan məlum olur ki, Azərbaycanda çalışan əcnəbilərin sayı kəskin artıb. 2020-ci ildə ölkədə rəsmi iş icazəsi ilə cəmi 5 min 287 nəfər fəaliyyət göstərirdisə, təkcə bir il ərzində bu rəqəm 2 min 411 nəfər və ya 46 faiz artaraq 7 min 698 nəfərə çatıb. Burada diqqəti çəkən məqam odur ki, bu, devalvasiya dövründən bəri ən yüksək göstəricidir.
Statistik rəqəmlərdən aydın olur ki, ölkədə çalışan əcnəbi vətəndaşların say artımı, əsasən, Türkiyə vətəndaşlarının hesabına baş verib. Ötən il boyunca Azərbaycanda rəsmi iş icazəsi ilə çalışan Türkiyə vətəndaşlarının sayı 2 min nəfərdən 4 min 500-ə yüksəlib. Bu, həm də o deməkdir ki, Azərbaycanda rəsmi iş icazəsi ilə çalışanların 59 faizi Türkiyə vətəndaşıdır. Türkiyə vətəndaşlarından sonra Azərbaycanda ən çox britaniyalılar çalışır. Təkcə bu ilin əvvəlinə ölkədə rəsmi iş icazəsi ilə çalışan britaniyalıların sayı 615 nəfər olub. Bu da ölkədəki əcnəbi işçilərin 8 faizi deməkdir. Onların sayı Azərbaycanda rəsmi iş icazəsi ilə işləyən bütün MDB ölkələri vətəndaşlarının sayından (560 nəfər) daha çoxdur. Rəsmi iş icazəsi ilə çalışan əcnəbilər arasında üçüncü yeri Hindistan vətəndaşları tutur. Bu ilin əvvəlinə Azərbaycanda 387 Hindistan vətəndaşı çalışmaqdadır. Son bir ildə onların sayı yüz nəfərə yaxın artıb.
Maraqlıdır, Azərbaycanda bir il ərzində əcnəbi işçilərin sayının belə çox artması nə ilə bağlıdır?
“Başlıca səbəb Qarabağda aparılan yenidənqurma işlərinə Türkiyədən olan işçilərin cəlbi ilə bağlıdır”
Məsələyə münasibət bildirən iqtisadçı alim, professor Əli Əlirzayev bunu bir sıra amillərlə əlaqələndirdi: “Bunun bir səbəbi 2021-ci ildə pandemiyanın zəifləməsi və iqtisadi aktivliyin artması ilə bağlıdır. İstər-istəməz bu, əcnəbi işçilərin fəaliyyəti üçün zəmin yaradır. Ancaq başlıca səbəb Qarabağda aparılan yenidənqurma işlərinə Türkiyədən olan işçilərin cəlbi ilə bağlıdır. Məlum olduğu kimi, Qarabağda və Şərqi Zəngəzurda böyük yol infrastruktur layihələri həyata keçirilir. Ümumilikdə, 9 yol layihəsi həyata keçirilir. Yeni yollar, tunellər çəkilir, körpülər salınır. Çətin dağlıq ərazilərdə bu işlər görülür. Bunda da türk mühəndislər, işçilər fəal iştirak edirlər. Nəzərə almaq lazımdır ki, bu kimi infrastruktur layihələri əmək tutumludur. Bunları həyata keçirmək üçün çoxsaylı işçiyə ehtiyac var. Bir məqama xüsusi diqqət etmək lazımdır ki, ölkədə olan əcnəbi işçi qüvvəsinin böyük hissəsi tikinti sektorunda işləyir. Hindistandan olan əcnəbi miqrantlar əsasən bu sahədə fəaliyyət göstərirlər. Böyük Britaniyadan olanlar isə əsasən neft sektorunda işləyirlər”.
Professor hesab edir ki, Azərbaycanda iqtisadi böyümə genişləndikcə, bu, əcnəbi işçilərin sayının artmasına öz təsirini göstərəcək.
Vidadi ORDAHALLI
