Lənkəran şəhər Mədəniyyət Mərkəzinin növbəti tədbiri narkomaniyaya qarşı mübarizə ilə bağlı təşkil olunmuşdu. Lənkəran Şəhər İcra Hakimiyyəti, Ailə, Qadın və Uşaq Problemləri üzrə Dövlət Komitəsi, Gənclər və İdman Nazirliyinin birgə əməkdaşlığı sayəsində baş tutan bu tədbir “Sağlam həyat naminə narkomaniyaya yox deyək” şüarı altında keçirildi.
Tədbirin girişındə dünyanı narahat edən ümumbəşəri bəla olan narkomaniyanın fəsadlarından, onun insan həyatında buraxdığı acı izlərdən konkret misallardan nümunə gətirməklə bu bəladan qurtulmaq üçün hər kəsin üzərinə mənəvi məsuliyyət düşdüyünü bildirən Lənkəran Şəhər İcra Hakimiyyəti başçısının müavini, İctimai-siyasi və humanitar məsələlər şöbəsinin müdiri R. Arifqızı maarifləndirmə işinin cəmiyyətin bütün sosial institutları tərəfindən mütəmadi olaraq aparılmalı olduğuna diqqəti çəkdi, həm də bu sahədə ən böyük məsuliyyətin ailələrin üzərinə düşdüyünü dönə-dönə vurğuladı.
Ailə, Qadın və Uşaq Problemləri üzrə Dövlət Komitəsi sədrinin müavini Sədaqət Qəhrəmanova narkomaniya ilə bağlı maarifləndirmə tədbirinin vaxtaşırı təşkilinin əhəmiyyətinə əhatəli toxunub dedi ki, bəşəriyyət üçün təhlükəyə çevrilən bu bəlanın qarşısının alınmasının effektiv yolu insanlar arasında maarifçiliyin geniş şəkildə aparılmasından keçir. Sağlam nəslin yetişməsi üçün müasir gəncləri daha çox idmana, incəsənətə, ictimai əhəmiyyət daşıyan işlərə yönəltmək lazımdır. Ölkə rəhbəri İlham Əliyev və Birinci vitse-prezident Mehriban xanım Əliyeva bütün sahələrə olduğu kimi, elə gələcəyimizin sağlamlığı naminə sözügedən istiqamətə xüsusi qayğı və diqqət göstərirlər.
Tədbirdə başqa danışanlar da oldu. Belə ki, Narkomanlığa və Narkotik Vasitələrin Qanunsuz Dövriyyəsinə qarşı Mübarizə üzrə Dövlət Komissiyasının Milli İnformasiya sektorunun müdiri Raqif Allahverdiyev, Azərbaycan milli futbol komandasının üzvü Qara Qarayev, atletika üzrə Avropa çempionu Nazim Babayev və idmançı Kamil Zeynallı gənclərə narkomaniyanın yaratdığı fəsadlardan, ondan uzaq durmaqdan ötrü idmanla məşğul olmağını tövsiyə etdilər.
Daha sonra lənkəranlı məktəbli və gənclərin iştirakı ilə “Narkomaniyay yox deyək” şüarı altında qaçış marafonu keçirildi. Marafon iştirakçılarına sertifikat və qaliblərə hədiyyə təqdim olundu.
Zəfər ORUCOĞLU Azərbaycan Jurnalistlər Birliyinin üzvü
