Aprelin 19-da Milli Məclisin Səhiyyə komitəsinin iclası keçirilib. İclası acan Səhiyyə komitəsinin sədri Əhliman Əmiraslanov bildirib ki, gündəliyə 6 məsələ daxil edilib.
Komitə sədri bildirib ki, gündəliyin ilk birinci məsələsi - “Onkoloji yardım haqqında” və “Dağınıq skleroz xəstəliyinə tutulmuş şəxslərə dövlət qayğısı haqqında” Azərbaycan Respublikasının qanunlarında dəyişiklik edilməsi barədə (birinci oxunuş) qanununun layihəsidir.
Sonra qanun layihəsini təqdim edən Milli Məclis Aparatının Sosial qanunvericilik şöbəsinin Humanitar məsələlər üzrə qanunvericilik sektorunun əməkdaşı Seymur Əşrəfli bildirib ki, Azərbaycan Respublikası Prezidentinin qanunvericilik təşəbbüsü qaydasında “Onkoloji yardım haqqında” və “Dağınıq skleroz xəstəliyinə tutulmuş şəxslərə dövlət qayğısı haqqında” Azərbaycan Respublikasının qanunlarında dəyişiklik edilməsi barədə
sizlərə təqdim olunan qanun layihəsi onkoloji xəstələrin, eləcə də dağınıq skleroz xəstəliyinə tutulmuş şəxslərin sosial müavinət və (və ya) əmək pensiyası almaq hüququnu müəyyənləşdirir.
Seymur Əşrəfli məlumat qeyd edib ki, son dövrlər Azərbaycanda istər pensiya təminatı, istərsə də sosial sığorta prinsipinin daha da möhkəmləndirilməsi sahəsində vətəndaşlara göstərilən xidmətlərin keyfiyyətinin yüksəldilməsi, innovativ həllərin tətbiqi və elektron xidmətlərə keçidin sürətləndirilməsi, habelə süründürməçilik hallarının qarşısının alınması və şəffaflığın, vətəndaş məmnunluğunun artırılması məqsədi ilə bir sıra islahatlar həyata keçirilib. Eyni zamanda, ölkəmizdə pensiyaçıların etibarlı sosial müdafiəsinə nail olunması, pensiya təminatı sistemində sosial sığorta prinsiplərinin daha da gücləndirilməsi, pensiya təyinatı prosesinin sadələşdirilməsi istiqamətlərdə mühüm əhəmiyyətə malik proqramlar icra edilib, effektiv mexanizmlər formalaşdırılıb.
Qeyd edilib ki, layihə “Əmək pensiyaları haqqında” və “Sosial müavinətlər haqqında” Azərbaycan Respublikasının qanunlarında dəyişiklik edilməsi barədə” qanun layihələrinə uyğunlaşdırma xarakteri daşıyır. Bu sənəd, xəstəlikdən əziyyət çəkən şəxslərin sosial müdafiəsinin gücləndirilməsinə xidmət edir.
Sənədə aydınlıq gətirərək Sosial qanunvericilik şöbəsinin müdiri Adil Vəliyev vurğulayıb ki, “Onkoloji yardım haqqında” qanunun onkoloji xəstələrin sosial müdafiəsi 9 maddəsi yeni redaksiyada verilir. Dəyişikliyə əsasən əlilliyi, o cümlədən sağlamlıq imkanlarının məhdudluğu müəyyən edilmiş onkoloji xəstələrin “Sosial müavinətlər haqqında” Azərbaycan Respublikasının Qanununa uyğun olaraq sosial müavinət və (və ya) “Əmək pensiyaları haqqında” Azərbaycan Respublikasının Qanununa uyğun olaraq əmək pensiyası almaq hüququ vardır”.
Bildirilib ki, həmçinin hazırda qüvvədə olan “Dağınıq skleroz xəstəliyinə tutulmuş şəxslərə dövlət qayğısı haqqında” qanunun 9-cu maddəsinə görə da əlillik, o cümlədən sağlamlıq imkanlarının məhdudluğu müəyyən edilmiş və əmək pensiyası almaq hüququ olmayan dağınıq skleroz xəstəliyinə tutulmuş şəxslərin sosial müavinət almaq hüququ var. Dəyişikliyə görə, əlillik , o cümlədən sağlamlıq imkanlarının məhdudluğu müəyyən edilmiş dağınıq skleroz xəstəliyinə tutulmuş şəxslərin sosial müavinət və (və ya) əmək pensiyası almaq hüququ olacaq.
Dəyişikliyin əsas mahiyyəti onkoloji xəstələrin və dağınıq skleroz xəstəliyinə tutulmuş şəxslərin sosial müavinət və ya əmək pensiyası almaq hüququ olacaq.
İclasda Səhiyyə komitəsinin sədr müavini Rəşad Mahmudov, deputat İlham Məmmədov onkoloji xəstələrin, dağınıq skleroz xəstəliyinə tutulmuş şəxslərin rifahını ilə bağlı öz fikir və təkliflərini bildiriblər.
Birinci oxunuşda müzakirəyə çıxarılan qanun layihəsi deputatlar tərəfindən müsbət dəyərləndirilərək, Milli Məclisin plenar iclasına tövsiyə olundu.
Daha sonra Komitə sədri Əhliman Əmiraslanov iclasda üçüncü oxunuşda olan qanun layihələrini müzakirəyə çıxarıb. Bildirib ki, bunlar “Narkoloji xidmət və nəzarət haqqında” Qanunda dəyişiklik edilməsi barədə və “Hərbi qulluqçuların statusu haqqında”, “Narkotik vasitələrin, psixotrop maddələrin və onların prekursorlarının dövriyyəsi haqqında”, “Hərbi vəzifə və hərbi xidmət haqqında” qanunlarda və Azərbaycan Respublikasının 1994-cü il 23 sentyabr tarixli 887 nömrəli Qanunu ilə təsdiq edilmiş “Azərbaycan Respublikası Silahlı Qüvvələrinin Daxili xidmət nizamnaməsi”ndə dəyişiklik edilməsi barədə” qanun layihələri, həmçinin Cinayət, İnzibati Xətalar və Cinayət Prosessual məcəllələrində dəyişikliklərin edilməsi ilə bağlı qanun layihələridir.
Komitə sədri vurğulayıb ki, bu qanun layihələri komitədə və Plenar iclasda birinci, ikinci oxunuşda baxılıb, irad və təklif olmadan qəbul olunub.
Sonra qanun layihələrinin müzakirələrində komitənin sədr müavini Rəşad Mahmudov, deputatlar Müşfiq Məmmədli, İlham Məmmədov, Məlahət İbrahimqızı, Kamilə Əliyeva və Milli Məclis Aparatının Dövlət quruculuğu, inzibati və hərbi qanunvericilik şöbəsinin İnzibati qanunvericilik sektorunun müdiri Kamalə Paşayeva narkoloji müayinədən, narkotik vasitələrin qanunsuz dövriyyəsindən və sənədlərlə bağlı digər fikirlərini bildiriblər.
Sənəd Milli Məclisin plenar iclasına tövsiyə olunub.
İclasda komitə üzvü Sədaqət Vəliyeva iştirak edib.
