Göyçayın Qarayazı kəndində olan orta məktəb binası sözün əsl mənasında təhlükə saçır. Çünki havaların istiləşməsi ilə ilanlar binanı özlərinə yuvaya çeviriblər. Müəllimlər və şagirdlər məktəbdə qorxa-qorxa dərs keçirlər.
Köhnəlmiş binada eyni anda 309 şagird 2 növbə ilə təhsil alır. Həmin məktəbdə çalışan müəllimlərin sözlərinə görə, hər il olduğu kimi bu ildə yaz aylarında məktəb binasında ilanlara tez tez rast gəlinir. Bəzən elə olur ki, ilan təhlükəsinə görə şagirdlər onlara verilən tənəffüs fasiləsindən belə istifadə etməkdən qorxurlar. Müəllim və valideynlər qeyd edir ki, onlar məlum problemlə bağlı dəfələrlə aidiyyəti qurumlara müraciət etsələr də, onlara heç bir reaksiya verilməyib.
11 saylı Ərazi Maliyyə Hesablaşma Mərkəzi: “Həmin məktəbin daxili və xaricinə ilan əleyhinə xüsusi məddələr səpilib”
Məsələ ilə bağlı Ucarda yerləşən Təhsil Nazirliyinin 11 saylı Ərazi Maliyyə Hesablaşma Mərkəzindən bildirildi ki, həmin məktəbin daxili və xaricinə ilan əleyhinə xüsusi məddələr səpilib: “Ehtiyac olarsa yenidən həmin maddələrin səpilməsi diqqətdədir. Qarayazı kənd tam orta məktədi təmir-bərpa işləri üçün 2019-2023 ilərin planına da salınıb”.
Nizami Hüseynov: “Bir təhsil ocağında ilan varsa, orda şagirdlər hansı bilik əldə edəcək?”
Təhsil eksperti Nizami Hüseynov bildirdi ki, ölkə ərazisində hələ də təmirsiz, istifadəyə yararsız məktəblər var. Dövlət başçısı tərəfindən prioritet məsələ kimi məktəb tikintiləri əsas götürülsə də, bu işdə ləngimələr var: “Ucqar kəndlərdə bu tip təhsil ocaqlarına daha çox rast gəlinir. Dövlət bununla bağlı müvafiq proqramlar həyata keçirir. Hər il ölkə başçısının sərəncamı ilə modul tipli məktəblər tikilir. Bu modul tipli məktəblərin, ən azından, təmirsizlər bərpa olunana kimi istifadəsi mümkündür. Həmçinin modul tipli məktəb formasında tədrisin davam etdirilməsi nəzərdə tutulur. Şagirdlərin dərs oxumaq imkanları daha da yaxşılaşdırılmalıdır. Tədrisin təşkili və reallaşdırılmasına uyğun daha çox təhsil ocaqları olmalıdır. Şagirdlərin sağlığı və təhlükəsizliyi əsas məsələdir. Bir təhsil ocağında ilan varsa orda şagirdlər hansı bilik əldə edəcək? Müəllim və şagirdlərin fikri ancaq ilanlarda olacaq. Bu elə bir məsələdir ki, düzələr deyib keçmək olmaz. Aidiyyəti qurumlar dərhal reaksiya verməli və yaranmış vəziyyəti həll etməlidir. Dərman səpməklə problem həll olunan deyil. Ya şagirdlərin dərsi başqa məktəbdə davam etməlidir, ya da məktəb əsaslı şəkildə təmir olunmalıdır”.
Günel CƏLİLOVA
