Aprelin 18-də bir qrup Qarabağ müharibəsi veteranı "Azərsığorta" Dövlət Sığorta Şirkətinin binası qarşısında etiraz aksiyası keçirib.
Onlar, əlilliyin verilməsinə baxmayaraq, qanunla nəzərdə tutulan sığorta pulunu ala bilmədiklərindən şikayət ediblər.
Şikayətçilər qeyd edir ki, məlum problemlə bağlı onları aldadırlar: “Hər dəfə bizi aldadırlar. Gah deyirlər, aprelin 14-də gəlin, gah deyirlər 15-də. Sonuncu dəfə aprelin 18-də veriləcəyini vəd etdilər. Ancaq həmin gün bizi Dövlət Sosial Müdafiə Fonduna göndərirlər, onlar da “Azərsığorta”ya. Bizim müalicəyə ehtiyacımız var, amma pul vermirlər. Prezidentin sərəncamı var və biz bu pulu almalıyıq”
Qeyd edək ki, müharibə veteranları vaxtaşırı aksiyalar keçirirlər, dövlət məmurlarının onların problemlərinə məhəl qoymamasından, hüquqlarını pozmasından şikayətlənirlər.
“Azərsığorta” - Elnur Hüseynquluyev: “Dövlət icbari şəxsi sığortası sahəsində sığorta ödənişlərinin verilməsi ilə bağlı vətəndaşların tələblərinin yerinə yetirilməsi şirkətin səlahiyyətlərinə aid deyil”
“Azərsığorta”nın mətbuat katibi Elnur Hüseynquluyev “Bakı-Xəbər”ə açıqlamasında qeyd etdi ki, dövlət icbari şəxsi sığortası sahəsində sığorta ödənişlərinin verilməsi ilə bağlı vətəndaşların tələblərinin yerinə yetirilməsi şirkətin səlahiyyətlərinə aid deyil: “Belə ki, “Dövlət icbari şəxsi sığortası sahəsində idarəetmənin təkmilləşdirilməsi ilə bağlı bəzi tədbirlər haqqında” Azərbaycan Respublikası Prezidentinin 18 may 2021-ci il tarixli 1340 nömrəli Fərmanına əsasən, Şirkətin dövlət icbari şəxsi sığorta sahəsindəki səlahiyyətləri 2022-ci il yanvarın 1-dən Əmək və Əhalinin Sosial Müdafiəsi Nazirliyinə həvalə edilib.
Habelə, həmin Fərmanın 2.7-ci bəndinə əsasən Şirkət 2022-ci il yanvarın 1-dək sığortaolunanlara sığorta ödənişlərinin verilməsini həyata keçirməlidir. Göründüyü kimi, Fərman sığorta olunma müddətindən asılı olmayaraq sığortaolunanlara, o cümlədən hərbi qulluqçulara sığorta ödənişinin həyata keçirilməsi üzrə səlahiyyətimizi qeyd olunan tarixdən sonra dayandırıb.
Qeyd edilən Fərmana əsasən, vətəndaşlara Əmək və Əhalinin Sosial Müdafiəsi Nazirliyinə müraciət edilməsi rəsmi olaraq bildirilsə də, onlar hələ də sığorta ödənişini Şirkətdən almalı olduqlarını hesab etdiklərindən belə anlaşılmazlıqlar yaranıb. Həmçinin qeyd edim ki, mövcud problemin həlli ilə bağlı aidiyyəti dövlət orqanlarına tərəfimizdən müvafiq məlumatlar verilib.
Onu da xatırladım ki, 14.10.2020-ci ildən 27.12.2021-ci il tarixədək “Azərsığorta” Dövlət Sığorta Şirkəti tərəfindən yüngül və ağır xəsarət növləri üzrə, həmçinin I, II və III qrup əlillik dərəcələrinə görə ümumilikdə 12 mindən çox İkinci Qarabağ Müharibəsi qazilərinə sığorta ödənişi həyata keçirilib”.
Rasim İsgəndərov: “Müharibə iştirakçılarının sığorta pulu onları incitmədən verilməlidir”
Hərbi ekspert Rasim İsgəndərov bildirdi ki, 2007-ci ildən bu yana yaralanan və əlil olan hərbi qulluqçulara birdəfəlik sığorta ödənişi verilib, onlar bu vəsaiti alıblar və 27 sentyabrda başlayan Vətən savaşında əlil olanlar da alır: “1991-97-ci illərdə Qarabağ müharibəsində yaralanan qazilərə isə bu pulun verilməsində problemlər yaşanır. Ölkə başçısının tapşırığı ilə Əmək və Əhalinin Sosial Müdafiəsi Nazirliyi şəhid ailələrinə birdəfəlik sığorta pulunu ödədi. Birdəfəlik ödənişin məbləği şəhid ailələri üçün 11 min manat, I qrup Qarabağ əlilləri üçün onun 80 faizi - 8800 manat, II qrup Qarabağ əlilləri üçün 60 faizi – 6600 manat, III qrup Qarabağ əlilləri üçün isə 40 faizi - 4400 manatdır. Onu da hələ tam şəkildə ödəməyiblər. Müharibə veteranlarının sığorta pulunun verilməməsi arzuolunmaz haldır”.
Həmsöhbətimiz onu da əlavə etdi ki, Qarabağ savaşı əlillərindən təxminən 700-800 nəfər məhkəmə yolu ilə bu vəsaiti alıb, ancaq digərləri qalıb. Halbuki, müharibə iştirakçılarının sığorta pulu onları incitmədən verilməlidir.
Günel CƏLİLOVA
