Azərbaycanda tanınmış iş adamı, ölkənin ən böyük tikinti şirkətlərindən biri olan AAAF İnşaat MMC-nin rəhbəri Tofiq Heydərov özünün sosial şəbəkə hesabında yaydığı açıqlamada ozünə və biznesinə edilən qanunsuzluqlardan danışıb.
Təsis etdiyi şirkətlərdən biri olan AAAF İnşaat MMC-nin qarşılaşdığı problemləri yazan T.Heydərovun bildirdiyinə görə, AAAF İnşaat MMC regionlarda inşa etdiyi idman zallarından başqa əsasən Xırdalan şəhərində 4 böyük layihənin inşasına başlayıb: “AAAF park” (519 000m2), AAAF tələbə şəhərciyi (280 000 m2), “Abşeron city” (65 800 m2) və AAAF (Bakı-Sumqayıt şossesi. 94 000 m2)”. T.Heydərov AAAF İnşaat MMC-nin İqtisadiyyat Nazirliyi yanında Dövlət Vergi Xidmətinin yüksək vəzifəli şəxsinin, həmçinin Abşeron Rayon İcra Hakimiyyətinin böyük təzyiqləri ilə üzləşdiyini qeyd edir:
“AAAF İnşaat MMC-yə qarşı yaradılan süni maneələr bütün qurumlar tərəfindən olsa da, bu gün əsas Abşeron İcra Hakimiyyəti və Dövlət Vergi Xidmətinin istintaq idarəsi haqqında yazacam: Xırdalanda “AAAF park” layihəsindən başqa, digər üç layihə Abşeron İcra Hakimiyyətinin keçmiş başçısı Zakir Fərəcova, Vergi İstintaq İdarəsinin əməkdaşı Pərvin Əliyevə və digər şəxsə məxsus olan layihələrdir. Dəfələrlə müraciət etməyimə əhəmiyyət verməyən bu insanlar özlərini firon kimi aparmağa davam edirlər. Borclarını ödəmək əvəzinə, hər zaman tutduqları mövqedən istifadə etməklə məni belə borclu çıxarmağı bacarırlar.
Şirkətlərimizə 2012-ci ildən başlayaraq əsassız müdaxilələr sayəsində AAAF İnşaat MMC-nin 50 faiz təsisçi payı və direktor vəzifəsi vergi istintaq idarəsinin əməkdaşı olan Pərvin Əliyevə verilib. Bu gün bu layihələrdən yaranan külli miqdarda vergi və digər borclar ödənilmədiyindən MMC çıxılmaz bir vəziyyətə düşüb. 8 ildir ki, MMC-nin hesabları bağlıdır, öhdəliyində isə minlərlə ailənin mənzillərinin təhvil verilməsi kimi böyük çətinlikləri var.
Bundan başqa, AAAF İnşaat MMC tərəfindən razılaşdırılmış qaydada tikilən mənzillərin müəyyən hissəsi mənzil fonduna verilmişdir. Əlavə olaraq isə zirzəmi və mansard mərtəbələrin idmançılara və idmana xərclənməsi tikintinin böyük sahəsini təşkil etmişdir. Bu sahələrin vergi borclarının ödənilməsinin bizə yüklənilməsi ədalətsizlikdir. İcra Hakimiyyətindən mənzil fonduna verilən evlər barədə arayış verilsə də, vergilərdən bu borcların yalnız bir qismi silinmişdir”.
T.Heydərov Abşeron rayon İcra Hakimiyyətinin sabiq başçısı İradə Gülməmmədovanın şirkətə yaratdığı problemləri də qeyd edib: “Ən acınacaqlısı “Gənclər Şəhərciyi” layihəsidir ki, on milyonlarla vəsait xərclədiyimiz halda tikinti əsassız olaraq hörmətli İradə xanım tərəfindən dayandırılmışdı. Mənə ən çox təsir edən odur ki, biz bu layihəni cənab Prezident İlham Əliyevin sahibkalara müraciətindən sonra başlamışdıq. O zaman vəziyyət yaxşı deyildi, bütün təşkilatlara vətəndaşların işlə təmin olması tapşırığı verilmişdi. Biz də dövlətimizə dəstək olaraq iş adamlarını cəlb edib gözəl layihələrə start vermişdik. Amma bütün sənədlər qaydasında olduğu halda, belə addımın atılması xainlikdən başqa bir şey deyil”.
Tofiq Heydərovun açıqladığı fikirlərdən maraqlı nəticələr çıxarmaq olar. İş adamı qeyd edir ki, edilən təzyiqlərun fonunda biznesinin tən yarısını hansısa məmurun adına keçirib və uzun illər birgə fəaliyyət göstəriblər. Sual olunur: Tofiq Heydərov ölkədə tanınmış olan bir iş adamı kimi bu müraciəti niyə zamanında deyil, adlarını çəkdiyi məmurlar vəzifələri ilə vidalaşanda sonra edir?
Hüquqşunas Şəmsəddin Əliyev “Bakı-Xəbər”ə açıqlamasında bildirdi ki, dövlət başçısı hər zaman çıxışlarında sahibkarların işinə məmur müdaxilələrini sərt tənqid edib: “Bu o anlama gəlir ki, iş adamlarının fəaliyyətinə şəraitin yaradılması üçün ən ali iradə mövcuddur. Hətta yersiz yoxlamaların qarşısının alınması ilə bağlı da bir çox qanunlar qəbul edilib. Amma ictimai fikirdə belə rəy var ki, iş adamları hansısa iri məmurların çətiri altında fəaliyyət göstərirlər. Bunu iş adamları ona görə edir ki, yaranan problemləri məmurların köməyilə həll edirlər. Onların arasındakı razılaşmalar adətən rəsmiyyətdən kənar olurdu. Yəni centlemen razılaşması. Adətən belə hallar çox olur ki, “krışalıq” edən məmurun mövqeyi zəifləyən kimi həmin məmurlardan imtina etməyə, əməkdaşlığa son qoymağa çalışırlar. Bu məsələdə iş adamının özünün də təqsiri var. Niyə bu məsələni vaxtında ictimailəşdirmədi? Belə çıxır ki, vaxtında bir yerdə yeyib-dağıblar, indi faktları açıqlayırlar. Belə faktlar varsa, niyə məhkəməyə və hüquq-mühafizə qurumlarına müraciət etmirlər? Mən bu cür açıqlamalarda səmimilik görmürəm. Əgər belə bir hal baş veribsə, burada hər iki tərəf məsuliyyət daşıyır”.
Məhəmmədəli QƏRİBLİ
