Qarabağ zəfəri yalnız vətəndaşlarımızı deyil, eyni zamanda xaricdə yaşayan soydaşlarımızı ruhlandırdı, canlandırdı. Əlbəttə, dünya azərbaycanlıları müzəffər Ali Baş Komandanın rəhbərliyi ilə rəşadətli Azərbaycan ordusunun qazandığı və xalqımıza bəxş etdiyi qələbədən bəxtiyardır.
Ardıcıl olaraq xarici ölkələrdə yaşayan balaca soydaşlarımız öz həyatlarında Azərbaycan dövlətinin qayğısını hiss edirlər. Ölkəmizin Birinci vitse-prezidenti Mehriban Əliyevanın təşəbbüsü ilə xaricdəki azyaşlı uşaqlar üçün “Qarabağ” Azərbaycan məktəblərinin təsis olunması olduqca mühüm bir hadisədir. Bildirək ki, bu gün həmin məktəblərdə 250 artıq azərbaycanlı uşaq ana dilində təhsil alır.
Xaricdəki uşaq soydaşlarımız üçün təsis edilən "Qarabağ” Azərbaycan məktəbləri hansı missiyaları daşıyır? Sizcə, bu məktəblərin vəzifəsi nədir?
“...Bu, ilk növbədə soydaşlarımızın yaşadıqları ölkələrdə assimilyasiyaya məruz qalmaması üçün əhəmiyyətlidir”
AVCİYA-nın vitse-prezidenti, tarix elmləri doktoru, professor, siyasi şərhçi Məhərrəm Zülfüqarlı "Bakı - Xəbər"ə şərhində bildirdi ki, xarici ölkələrdə yaşayan balaca soydaşlarımız üçün "Qarabağ Azərbaycandır" məktəblərinin yaradılmasının çox ciddi hədəfləri var. Bu təşəbbüsün alqışa layiq olduğunu deyən M. Zülfüraqlı hesab edir ki, "Qarabağ” Azərbaycan məktəbinin yaradılması soydaşlarımıza verilən böyük dəyərdir. Dünyanın bir sıra ölkələrində “Qarabağ” Azərbaycan məktəblərinin uğurla fəaliyyətini davam etdirdiyini deyən M.Zülfüqarlının sözlərinə görə, burada Azərbaycan dili, tarixi, milli rəqs və başqa sahələrin tədris olunduğuna dair məlumatı var. Qarabağ zəfərinin möhtəşəmliyinin azyaşlı soydaşlarımız tərəfindən dərindən qavranılması üçün bu məktəblərin böyük rolu olduğunu vurğulayan M.Zülfüqarlının sözlərinə görə, bu inkişaf etmiş ölkələrin təcrübəsində də var. “Bir sıra inkişaf etmiş ölkələrdə müxtəlif xalqların övladları üçün “Bazar günü məktəbləri” təşkil edilir. Dünyanın ayrı-ayrı yerlərində azərbaycandilli belə məktəblər var. Balaca soydaşlarımız həftədə bir dəfə o məktəblərə gəlib öz ana dilimizlə, tariximizlə tanış olurlar, onlar barədə məlumat əldə edirlər. “Qarabağ” Azərbaycan məktəblərinin yaradılması təşəbbüsü çox müsbətdir və bu ilk növbədə soydaşlarımızın yaşadıqları ölkələrdə assimiliyasiyaya məruz qalmaması üçün əhəmiyyətlidir. Öz ana dilini, tarixini, mədəniyyətini, adət-ənənələrini bilən soydaşımız, harada yaşamasından asılı olmayaraq, azərbaycanlı olduğunu dərk edəcək, başqalarının təsirinə düşüb əriyib itməyəcək, azərbaycanlı kimi yaşayacaq. Bu eyni zamanda soydaşlarımızın uşaqlıqdan Azərbaycan sevgisi ilə böyüməsinə, öz tarixi vətəninə, dövlətinə sadiq qalmasına bir dəstəkdir. Bu, azyaşlı soydaşlarımızın Azərbaycana, dilimizə, tariximizə, mədəniyyətimizə bağlı şəkildə yetişməsinə hədəflənib. Əlbəttə, bu da çox faydalıdır.
Birinci vitse-prezident Mehriban Əliyevanın təşəbbüsü ilə “Qarabağ” Azərbaycan məktəbinin yaradılması xaricdə yaşayan soydaşlarımızın vətənə bağlılığını daha da gücləndirəcək. Azərbaycan həqiqətlərinin dünyaya çatdırılmasında bu məktəblərin ayrıca rolunun olacağı danılmazdır. Bu da Azərbaycanın güclənməsinə bilavasitə töhfə verəcək”.
M.Zülfüqarlının fikrincə, “Qarabağ” Azərbaycan məktəblərini genişləndirmək lazımdır, bu məktəbləri təkcə Avropa ölkələrində deyil, harada Azərbaycan diasporu varsa, harada azərbaycanlılar yaşayırsa orada təşkil etmək zəruridir.
İradə SARIYEVA
