Qeyri Hökumət Təşkilatlarına Dövlət Dəstəyi Agentliyinin maliyyə dəstəyi və Hemofiliyalı Xəstələrin Respublika Assosiasiyasının təşkilatçılığı ilə Hemofiliya və Digər Qeyri İnfeksion Genetik Xəstəliklərə Həsr Edilmiş Elmi – Praktik Konfrans keçirilib. Bu barədə baki-xeber.com-a Hemofiliyalı Xəstələrin Respublika Assosiasiyası məlumat verilib. Hemofiliyalı Xəstələrin Respublika Assosiasiyasının sədri Ayaz Hüseynov, Prezident Administrasiyasının Qeyri-hökumət təşkilatları ilə iş və kommunikasiya şöbəsinin sektor müdiri Vüsal Quliyev, TƏBİB-in Tibbi fəaliyyətinin Təşkili Departamentinin müdiri Teymur Mirzəbəyli, İcbari Tibbi Sığorta üzrə Dövlət Agentliyin İdarə Heyəti sədrinin müşaviri Nelli Veysova, QHT-lərə Dövlət Dəstəyi Agentliyinin icraçı direktoru Aygün Əliyeva, Akademik M.Ə.Mirqasımov adına Respublika Klinik Xəstəxanasının direktoru Azər İsmayılov, Milli Hematologiya və Transfuziologiya Mərkəzinin icraçı direktoru Valeh Hüseynov Konfransın giriş hissəsində hemofiliya və digər koaqulopatiyalı (qanın laxtalanma pozğunluğu) vətəndaşlara dövlət qayğısı haqqında məlumat vermişlər və gələcək perspektivləri qeyd etmişlər.
Milli Hematologiya və Transfuziologiya Mərkəzinin icraçı direktoru cənab Valeh Hüseynovun sədrliyi ilə Konfransın çıxışçıları - genetiklər, hematoloqlar, pediatrlar, mama ginekoloqlar tərəfindən hemofiliya və digər genetik qan xəstəliklərinin törətdiyi fəsadlar və Azərbaycanın Milli Genofondunun Sağlamlığının qorunmasına dair maraqlı mövzular müzakirə edildi.
Konfransın əsas mövzusu hemofiliya və digər irsi qan xəstəlikləri olduğu üçün hemofiliyanın statistikası , müasir müalicəsi haqqında Respublika Klinik Xəstəxanasının Hematologiya şöbəsinin müdiri hematoloq Dr. Naida Hüseynzadə və Milli Hematologiya və Transfuziologiya Mərkəzinin Pediatrik Hematologiya şöbəsinin müdiri Dr. Sevil Cəlilova məlumat verdilər, həkim -genetik Dr. Ağa Rza Ağayev irsi xəstəliklərin səbəbi barədə elmi əsaslara söykənərək konfrans iştirakçılarını geniş məlumatlandırdı və sağlam uşaqların doğulması üçün profilaktik tədbirlərin vacibliyi barədə Mərkəzi Klinikanın Mama-ginekologiya və İVF şöbəsinin müdiri mama ginekoloq Dr. Mahirə İsmayılova və Hemofiliya və digər genetik xəstəliklərin aradan qaldırılmasında köməkçi reproduktiv texnologiyaların rolu və Hamiləlikdə koaqolopatiyalar EGE Hospital Qadın xəstəlikləri və doğum uzmanı, Dr. İlhamə Eldarova Azərbaycanda ilk dəfə olaraq bu mövzuları müzakirəyə çıxardılar.
Ümumdünya Səhiyyə Təşkilatının Azərbaycandakı Nümayəndəliyinin mütəxəssisi Dr. Tural Qulu və Şirvan şəhər xəstəxanasının Xəstə xidmətləri şöbəsinin müdiri Dr. Təranə Cəlilova Bakı şəhərindən başqa Azərbaycanın digər bölgələrində hər hansı fövqalade hallar baş verdikdə, məsələn COVİD 19, müharibələr zamanı tibbi xidmətin təşkili və əlçatanlığının vacibliyi haqqında və statistik məlumatları təqdim etdilər.
Qeyd edək ki, Azərbaycanda qeyri infeksion genetik qan xəstəliklərinin təxmini sayı əhalinin 0,0003%-ni təşkil edir və müalicələri Dövlət Proqramları çərçivəsində həyata keçir.
Ülviyyə GÜLBABAQIZI
