Ağstafa dəmir yol stansiyasının yaxınlığnda yerləşən və piyadaların hərəkəti üçün nəzərdə tutulan keçid qəzalı vəziyyətdədir. Məhz bu səbəbdən hər gün yüzlərlə sakin dəmir yolunun üzərindən keçmək məcburiyyətində qalır.
Məsələ ondadır ki, keçid 93 ildir inşa olunub və indiyə qədər əsaslı təmir olubmayıb. Sakinlər dəmir yolu xəttinin üstündə tikilən bu keçiddən məhz onun qəzalı vəziyyətdə olmasına görə istifadə etməkdən qorxurlar. Kimi dərsə gedir, kimi də işə. Gedib-gələnlərin çoxu beləcə həyatını təhlükəyə ataraq dəmir yolu relslərinin üzərindən keçir. Necə deyərlər, bir əsrə bərabər yaşı olan körpü vətəndaşların təhlükəsizliyini təmin etməkdənsə, onların həyatını təhlükəyə atır. Sakinlər arasında yaşlı olanlar da var. Hansı ki, gözü yaxşı görmür, çevik hərəkət edə bilmir. Sabah qatar yolu keçənləri öldürsə və yaxud da da şikəst eləsə kim cavab verəcək? Burada söhbət tək qatardan getmir. Vətəndaş relsləri keçərkən büdrəyib yıxıla və nəticədə xəsarət ala bilər.
“Vətəndaşların həyatı üçün təhlükə yaradan belə yerlər araşdırılmalıdır”
“Azərbaycan Dəmir Yolları” Qapalı Səhmdar Cəmiyyətindən deyiblər ki, dəmir yollarının ayrı-ayrı hissələrində mərhələli şəkildə əsaslı təmir və yenidənqurma işləri davam etdirilir. Dəmir yolunun mütəxəssisləri Ağstafadakı keçidə baxış keçiriblər. Sözügedən piyada keçidinin yenidən qurulması məsələsi gələcəkdə mümkündür. Belə məlum olur ki, Ağstafa sakinləri hələ gözləməli olacaqlar.
Məsələyə münasibət bildirən iqtisadçı alim, professor Əli Əlirzayev hesab edir ki, insan həyatı üçün təhlükə törədən belə kiçidlərin bərpası dərhal həyata keçirilməlidir: “Çünki piyadaların dəmir yolunun üzərindən keçməsi risq mənbəyidir. Müxtəlif yaş kateqoriyasına aid olan şəxslər ordan keçərək həyatlarını təhlükəyə atırlar. Hadisə bir dəfə olur. Ona görə də hansısa maliyyə məsələsini və digər işi bəhanə edib buna göz yummaq olmaz. Belə götürəndə, “Azərbaycan Dəmir Yolları”QSC üçün bu çətin bir iş də deyil. Dəmir konstruksiyalı yerüstü piyada keçidinin quraşdırılması çətin iş deyil. Düşünmürəm ki, belə keçidlərin tikilməsi və yaxud da təmir olunması böyük vəsait tələb edir. Sadəcə, müvafiq qurumlar buna ciddi yanaşmalıdılar. Vətəndaşların həyatı üçün təhlükə yaradan belə yerlər araşdırılmalıdır. Fərqi yoxdur, belə yerlər Bakıdadır, yoxsa rayonlarda. İstənilən halda buna ciddi yanaşmaq lazımdır”.
Professor onu da əlavə etdi ki, bu kimi hallara nəzarət artırılmalıdır.
Vidadi ORDAHALLI
