Nə qədər yazılsa da, deyilsə də Bakıda avtomobillərin parklanması problemi həllini tapmır. Əksinə, problem daha da mürəkkəbləşir. Bakıda zatən avtomobillərin parklanması ilə bağlı ciddi problemlər var. Onsuz da yer tapmaq müşküldür. Bu tərəfdən də obyekt sahibləri işi qəlizləşdirir.
Problem ondadır ki, obyekt sahibləri bir növ obyektin qabağını zəpt edir və həmin yerdə yalnız müştərilərə və orada işləyənlərə avtomobili saxlamağa icazə verilir. Digərlərinə isə maşın saxlamaq olmaz.
Məsələn, Nərimanov rayonunun Əhməd Rəcəbli küçəsində avtomobillərin park edilməsi müşkülə çevrilib. Çünki bu küçədə əsasən iş mərkəzləri yerləşdiyindən, bütün küçələr zəbt olunub. İş mərkəzlərinin qarşısında boş yerlər ola-ola oradakı sahibkarlar kənardan gələn avtomobillərin saxlanmasına birmənalı şəkildə qadağa qoyub. Hansı ki, adıçəkilən küçə hərəkətin, gediş-gəlişin sıx olduğu küçədir. Günün müxtəlif saatlarında sıxlıq yaşanır. Ancaq oradakı sahibkarlar müxtəlif əşyalar qoymaqla digər avtomobillərin orda parklanmasına imkan vermir. Küçədə avtomobillərin parklanmasına konkret şəxslər nəzarət edir. Onlar kənar avtomobillərin ora daxil olmasına icazə vermir. Görünən odur ki, qanunsuz parklanma ilə bağlı cərimələr müəyyən edilsə də, müəyyən sahibkarlar buna məhəl qoymur. Yeri gəlmişkən, bu ilin birinci rübünün yekunlarına həsr olunan müşavirədə Prezident İlham Əliyev qeyd etdi ki, “çirkli sahibkarlar” Bakını bərbad günə qoyublar. Düzdür, Prezident bunu deyərkən şəhərdə yöndəmsiz tikinti işlərini nəzərdə tutdu. Ancaq o cür sahibkarlar həm də yolları zəbt edirlər. Belə vəziyyət təkcə Əhməd Rəcəbli küçəsində deyil. Digər mərkəzi küçələrdə də bənzər hallar var.
Obyekt sahiblərinə bu səlahiyyəti kim verib?
Mais Ağayev: “Küçədəki qanunsuz parklama yerlərinin hamısı ləğv edilib”
Məsələ ilə əlaqədar Bakı Nəqliyyat Agentliyinin mətbuat katibi Mais Ağayev bildirdi ki, Əhməd Rəcəblidəki qanunsuz parklama yerləri artıq ləğv edilib: “Küçədəki qanunsuz parklama yerlərinin hamısı ləğv edildi. Otel, mehmanxana və digər obyektlərin qarşısında bu cür qanunsuz hallar aradan qaldırıldı. Növbəti dəfə belə hallara yol verilərsə, İnzibati Xətalar Məcəlləsinin müvafiq maddələrinə uyğun olaraq inzibati tənbeh tədbirləri görüləcək”.
İlqar Hüseynli: “Bu, düppədüz qanunsuzluqdur”
Ekspert İlqar Hüseynli isə məsələ ilə bağlı bildirdi ki, belə özbaşınalıqların qarşısını almaq üçün kompleks tədbirlər görülməlidir: “Bir sıra sahibkarların sözügedən qanunsuz əməlləri ilə bağlı dəfələrlə məsələ qaldırmışıq. Ancaq təəssüflər olsun ki, hələ də belə hallar qalmaqdadır və problem həllini tapmır. Belə baxanda, bütün obyektlərin qarşısındakı yerlər Bakı Şəhər İcra Hakimiyyətinin ərazisi hesab olunur. O cümlədən, dayanacaqlar. Təbii ki, dayanacaq üçün şərait yaradılıbsa. Hansısa sahibkarın bu məqsədlə kənar avtomobillərin ora daxil olmasına məhdudiyyət qoymağa səlahiyyəti yoxdur. Bu, düppədüz qanunsuzluqdur. Çünki bunun mülk sahiblərinə hər hansı aidiyyəti yoxdur. Hansısa obyektin, ticarət mərkəzin qarşısında parklama ilə bağlı qadağanedici işarə yoxdursa, o zaman istənilən vətəndaş avtomobilini orada park edə bilər. Qanun hamı üçün eyni olmalıdır. Ancaq bizdə əksinədir. Obyekt sahibləri qanunun fövqündə olmağa çalışırlar. Belə hallar davam edirsə, o zaman vətəndaşlar məhkəmələrə müraciət etməlidir. Müvafiq qurumlara şikayət etməlidilər ki, bu özbaşınalıqların qarşısı alınsın. Bir sözlə, belə qanunazidd halların qarşısı alınmalıdır”.
Vidadi ORDAHALLI
