Bakıda fəlaiyyət göstərən tikinti şirkətlərinin bir çoxunun əhaliyə problem yaratdığı məlumdur. Əksər hallarda sahibkarlar mənzil sahiblərinə elə vəziyyət yaşadırlar ki, sözlə ifadə olunması çətindir.
Son dövrlər Bakının müxtəlif yerlərində “xruşşovka” layihəli binaların sökülməsinin şahidi oluruq. Yasamal rayonu ərazisində də belə proses gedir. Lakin ciddi narazılıq şəraitində. Yasamalda “xruşşovka” layihəli binanın yerləşdiyi ərazidə tikinti şirkəti ilə sakinlər arasında narazılıq yaranıb.
Bu günlərdə Bakıda bir qrup sakin “Smartdom" tikinti şirkətinin özbaşınalığına etiraz aksiyası keçirdiyi barədə məlumat yayılıb. Yasamal rayonu A.M. Şərifzadə və İ.Talıblı küçələrinin kəsişməsində yerləşən 192 və 24 A, 26, 28 saylı binaların sakinləri onlarla razılaşdırılmamış, həmçinin ərazidəki binaların sakinləri köçürülməmiş binaların ətrafının hasarlanmasından şikayət edirlər. Sakinlər bildirir ki, "Smartdom" MMC tikinti şirkəti Şərifzadə 192 ünvanında yerləşən 112 mənzilli binanı alaraq söküb, yerində yeni bina inşa edəcək. 1, 74 hektar torpaq sahəsində yeni binanın tikintisinə sakinlərlə qarşılıqlı razılaşmadan sonra başlanılmalı olsa da, tikinti şirkəti artıq ərazinin bir hissəsini hasarlamağa başlayıb. Məsələni araşdırmaq üçün sözügedən binanın sakinlərindən biri ilə əlaqə saxladıq.
“Biz vəziyyətlə bağlı Prezident İlham Əliyevə müraciət etmişik”
26 saylı binanın sakini Sakin Nişad Mehdiyev “Bakı-Xəbər”ə bildirdi ki, şirkət ərazidə yerləşən binalardan yalnız birinin sakinləri ilə müqavilə bağlayaraq onlar köçürülüb, digər binaların sakinləri isə Allah ümidinə qalıb. N.Mehdiyev qeyd etdi ki, şirkət onlarla müqavilə bağlamadığı və razılığa gəlmədiyi halda sakinləri köçürülən binanı, həyətdəki qarajları sökərək yeni binanın tikintisinə başlamağa hazırlıq işləri görür: “Burada yaşayan sakinlər bu həyətdən istifadə edirlər. Biz 47 ildir ki, bu binada yaşayırıq. İndi tikinti şirkəti bizə narahatlıq yaradır. Yolumuzu bağlayır, binanı hasara alır. Biz məsələ ilə bağlı Dövlət Şəhərsalma və Arxitektura Komitəsi yanında Bakı Şəhər Memarlıq və Şəhərsalma Baş İdarəsinə də müraciət etmişik. Bizim şəhərsalmaya göndərdiyimiz narazılıq məktubuna rəsmi cavabda da qeyd edilir ki, “Smartdom” MMC yalnız qarşılıqlı razılaşma əsasında, sənədləşmə işləri tam başa çatdıqdan sonra yeni yaşayış binasının tikintisinə başlaya bilər. Buna nəzarət isə Yasamal Rayon İcra Hakimiyyətinə tapşırılıb.
Bunlar 192 saylı binanı götürüb yerində çoxmərtəbəli bina tikmək istəyirlər. biz də deyirik ki, 192 nömrəli binanı götürsələr 24 A, 26, 28 saylı binalar boş qalacaq. Heç kəs də bu binaların taleyi ilə maraqlanmayacaq. Bunlar düz məhəllənin ortasını hasarlayıb gəliş-gediş yerini bağlayıblar, uşaqlar əvvəl məktəbə ara yolla gedirdi, amma indi məcbur olub maşın yoluna çıxırlar. O binada söküntü çoxdan gedir. Bu öz yerində. Şirkət istəyir ki, bu boyda sahədə cəmi bir dənə bina tiksin. Şirkət bir binanı götürür, layihədə isə dörd binadır. Bunlar bir binanı götürürlər, qalan binaları yarımçıq qoyurlar. Bizi taleyin ümidinə buraxıblar. Deyirlər ki, Yasamal Rayon İcra Hakimiyyətinin başçısı Elşad Həsənov özü icazə verib biz də tikirik. Şəhərsalmadan cavab gəlsə də və orada mülküyyətçilərlə razılaşdırma məsələsi qeyd edilsə də, bunlar nəzərə alınmır. Şirkətin isə sənədləri tam olmadığı üçün onlara söküntü-tikinti işləri aparılmasına icazə verilmir. İdarənin qərarında göstərilib ki, ərazidəki dörd binanın sakinləri ilə razılaşdırıldıqdan sonra tikintiyə başlanılmalıdır, amma şirkət buna əhəmiyyət vermək istəmir. Cənab Prezidentin qanunsuz tikinti işlərinin aparılması ilə bağlı məmurlara və sahibkarlara son xəbərdarlıqdan sonra da bu işlər davam etdirilir”.
Müsahibimiz qeyd etdi ki, rəsmi sənəddə də göstərilir ki, Dövlət Şəhərsalma və Arxitektura Komitəsi yanında Bakı Şəhər Memarlıq və Şəhərsalma Baş İdarəsinin razılığı, rəyi olmadan bir dənə də olsun bina tikilməməlidir. “Bizim həyəti hasarlamaqla “Smartdom” şirkəti yolumuzu kəsib, uşaqlarımız məktəbə maşın yolu ilə gedirlər, bu da böyük təhlükədir. Biz bütün hallarda çətin durumda qalmışıq. Biz vəziyyətlə bağlı Prezident İlham Əliyevə müraciət etmişik. Yasamal rayon İcra hakimiyyətinə də müraciət etmişik, bütün sənədlərdə də sakinlərin imzası var”.
N.Mehdiyev deyir ki, sakinlərin tək arzusu onların da yaşayış binasının da alınması, söküntüyə cəlb olunması və əhalinin mənzillə təmin olunmasıdır. “Bizim tələbimiz ancaq odur ki, şirkət alırsa 4 binanın hamısını alsın və biz kənarda qalmayaq. Mütləq şirkət sahibi, sahibkar mülkiyyətçilərlə razılaşmalıdır. Biz başqa şey istəmirik ki. İstəyirik ki, bizimlə razılaşsınlar, müqavilə bağlasınlar. Fəaliyyət haqqında qanunun 4-cü maddəsində qeyd edilir ki, mülküyyətçi özü istədiyi qiyməti qoya bilər. Əvvəldən özləri dedilər ki, gəlsinlər 3 min manatdan pullarını verək. Bu cür hörmətsizlik olmaz. İnsanlar işə gedərkən bütün binaları dolanır. Şirkətin rəhbəri camaatı razı salmalıdır. Kiməsə arxayın olub camaata hörmətsizlik etmək olmaz”-deyə N.Mehdiyev qeyd etdi.
N.Mehdiyev ümid edir ki, sakinlərin Prezidentə etdiyi müraciət tezliklə prosesin onların xeyrinə olmasına gətirib çıxaracaq.
İradə SARIYEVA
