“Azəristiliktəchizat”ın istilik tariflərini 15 qəpikdən 22-25-ə qaldırmaq niyyəti var. Səhmdar cəmiyyətin sədrinin vəzifələrini müvəqqəti icra edən İlham Mirzəliyev iddia edib ki, guya əhali tariflərin qaldırılmasına razıdır: “Biz istehlakçılar arasında sorğu keçirib monitorinq aparmışıq. Tarifi 15 qəpikdən 22-25 qəpiyə qaldırmaq olar, əhali buna razıdır”.
İlham Mirzəliyev həmçinin qeyd edib ki, xarici ekspertlər də tariflərin artırılmasını tələb edir.
“Bizim xarici ekspertlərlə görüşlərimiz olur. Onlar tariflərin artırılmasını təklif edir. Biz isə başqa yol seçmişik. Xidmətin keyfiyyətinin yüksəldilməsi, istilik haqlarının 100 % yığılması və xərclərin optimallaşdırılması ilə istilik təsərrüfatının normal fəaliyyətini təmin etmək istəyirik. Amma istilik təchizatı sosialyönümlü olduğu üçün tariflərin artırılması barədə müraciət etməmişik və artım gündəmdə deyil”, - deyə İ.Mirzəliyev bildirib.
Qeyd edək ki, Mirzəliyevun məlum iddiasını sosial şəbəkə istifadəçiləri tənqidlə qarşılayıb və əhali hesab edir ki, qurum rəsmisi bahalaşmaya, tarifi artırmağa fürsət gəzir.
“Əhali “Azəristiliktəchizat”ın rəhbərinin son çıxışından çox narazıdır”
“Azəristiliktəchizat”ın rəhbərliyinin istilik tariflərini qaldırılmasına guya əhalinin razı olduğunu sosial şəbəkədə kəskin tənqid edən İSBAM sədri Samir Adıgözəlli “Bakı-Xəbər”ə bildirdi ki, “Azəristiliktəchizat” əhalinin ən çox narazı olduğu qurumdur. Şəhər təsərrüfatının ən iflic sahəsi kimi insanların narazılığına səbəb olan qurumun heç qış boyu düz-əməlli istilik vermədiyini deyən S.Adıgözəllinin sözlərinə görə, “Azəristiliktəchizat”ın tariflərin qaldırılması ilə bağlı əhali arasında moniotorinq keçirdiyini deməsi ciddi narazılığa səbəb olub: “Belə yalan informasiyaların rəsmi şəxslər tərəfindən verilməsi dövlət tərbiyəsinə uyğun olan iş deyil. Bu qurum harada, nə vaxt əhali arasında sorğu keçirib, monitorinq aparıb ki, bundan bizim xəbərimiz yoxdur. Səmimi olun və gerçək monitorinq keçirin, görək istilik verdiyiniz əhalinin neçə faizi “Azəristiliktəchizat”dan razıdır? Qış boyu soyuq havada verdiyiniz istiliklə heç əl isitmək olmur, nəinki ev. Əvvəla, qış boyu keyfiyyətli istilik verilmir. Yəni illərdir ki, əhali bu problemdən əziyyət çəkir. Qurum həqiqətən də monitorinq aparsaydı açıq görərdi ki, camaat arasında onların fəaliyyətindən nə qədər narazılıqlar var. Bu qış aylarla məktəblərdə, bəzi yaşayış binalarında istilik olmadı. “Azərsu” və “Azəriqaz”la “Azəristiliktəchizat”ın arasında borc qalmaqalları varsa, buna camaat neynəsin? “Azəristiliktəchizat” borcunu xalqın kürəyindən niyə çıxarmalıdır? Biz istiliyi də xaricdən alırıq ki, deyək buna da vergi, gömrük rüsumları qoyulub, ona görə tarifləri artırırlar? Bu ki, ölkənin daxilində olan məsələdir? Hökumət də əhalini başa düşməlidir. Bu kimi qurumların tarifləri artırmaq istəyi əhali arasında, xüsusən də aztəminatlı təbəqlərdə narazılıq yaradır”.
S.Adıgözəlli qeyd etdi ki, “Azəristiliktəchizat” istismar müddəti başa çatmış qazanxanaların avadanlıqlarının, borularının yenilənməsi işini yerinə yetirsin, bunları etmək üçün pulları yoxdursa hökumət qarşısında məsələ qaldırıb vəsaiti təmin etsinlər. “Mən ciddi şəkildə araşdırdıb gördüm ki, “Azəristiliktəchizat” böyük bir ştat cədvəli var. Bu qədər ştata nə ehtiyac var? Daxili yeyintiləri azaldıb pulları səmərəli xərcləmək lazım idi. Görsənən odur ki, təmir-bərpa, yeni avadanlıqlar alınması üçün ayrılan vəsaitlər düzgün xərclənməyib. Düzgün xərclənsəydi qazanxanalar bu vəziyyətdə olmazdı. XXI əsrdə yaşayırıq istilik təminatımız sıfır vəziyyətdədir. Yaxşı ki, camaatın çoxu kombi işlədir, bu vasitə ilə qışda evini isidir. Hava bir az günəşli olan kimi “Azəristiliktəchizat” istiliyi ya kəsir, ya da tam zəiflədir. Belə şey olar? Vəziyyət belədir. Çox təəssüfdlər olsun ki, ayrı-ayrı sahələr üzrə məmurlarımızın, bəzi rəsmilərimizin bu cür məntiqsiz çıxışları əhali arasında ciddi narazılığa səbəb olur. Çünki işlərinin öhdəsindən gəlmək, məsuliyyətlərini dərk etmək əvəzinə elə düşünürlər ki, qiymət artımı çıxış yoludur. Amma çıxış yolu əhalinin cibi deyil. Bu qurum rəsmisi nə üçün əhalinin adından istifadə edir? Əhali “Azəristiliktəchizat”ın rəhbərinin son çıxışından çox narazıdır. O cür fikirlər bildirmək yolverilməzdir”-deyə S.Adıgözəlli qeyd etdi.
İradə SARIYEVA
