Bakıətrafı ərazilərdə yaşayan minlərlə insan su və kanalizasiya problemindən əziyyət çəkir. Bunlardan biri də adı məşhur olan Mərdəkan qəsəbəsidir.
Məsələ ondadır ki, Xəzər rayonu Mərdəkan qəsəbəsinin 60 faizində su yoxdu. Qəsəbənin elə küçələri var ki, orada yaşayanlar susuzluqdan daha çox əziyyət çəkir. Qəsəbənin Sergey Yesenin küçəsinin sakinləri suya olan tələbatını təmin etmək üçün aralıdakı bulaqlardan su daşıyır. Hər gün adıçəkilən küçə sakinləri plastik qablarda su daşıyırlar. Ancaq bəzən elə olur ki, orada da su olmur. Kanalizasiya sistemi olmadığına görə sakinlər həyətlərində quyu qazmalı olurlar. Qəsəbədə yaşayanlar deyir ki, əsl müsibət hələ qabaqdadır. Yay aylarında su ilə bağlı problem daha kəskin formada özünü göstərir.
Sakinlər deyir ki, əslində qəsəbədə su xətti var, sadəcə onlara su verilmir. Həmin su bağlara verilir. Qəsəbədəki restoranlarda daimi su var, amma sakinlərə çatanda su yoxdu. Sakinlər haqlı olaraq gileylənirlər ki, XXI əsrdə də “baçoklarla” su daşıyarlar?
Məlumat üçün qeyd edək ki, 2019-cu ildə Prezident İlham Əliyev tərəfindən, Mərdəkan qəsəbəsi də daxil olmaqla, Xəzər rayonunda su təchizatı və kanalizasiya sisteminin yenidən qurulması işlərinin davam etdirilməsi ilə bağlı sərəncam imzalanıb. Bunun üçün “Azərsu” ASC-yə ilkin olaraq 3 milyon manat vəsait ayrılıb. Ancaq əfsuslar olsun ki, işlər çox ləng gedir. “Azərsu” ASC-dən verilən məlumata görə, qəsəbənin təxminən 40 faizində mərkəzləşmiş su xətti çəkilib. Mərhələ-mərhələ işlər görüldükcə, Yesenin küçəsinə də növbə çatacaq. Kanalizasiya sisteminin yenilənməsinə gəldikdə isə, qurumdan bildiriblər ki, bu, çox vaxt aparan layihələrdir. Su xətləri çəkiləndən sonra kanalizasiyaların çəkilməsinə baxılacaq.
“Belə bir qəsəbədə suyun olmaması anlaşılan deyil”
Məsələyə münasibət bildirən ekspert Rəsul Cahangirli Mərdəkan qəsəbəsində su çatışmazlığının olmasını bir sıra obyektiv və subyektiv amillərlə əlaqələndirdi: “Bunun bir səbəbi onunla bağlıdır ki, şəhərsalma ilə bağlı layihələrdə ilkin olaraq kommunikasiya xətlərinin çəkilməsinə önəm verilməyib. Problem əsasən bununla bağlıdır. Üstəlik, son 20 ildə Bakının digər ətraf qəsəbələrində olduğu kimi, Mərdəkanda da necə gəldi evlər tikilib. Başqa bir tərəfdən, su təchizatında yaşanan problemlərdə subyektiv amillərin də öz rolu var. Subyektiv amillər ondan ibarətdir ki, qəsəbədə çoxsaylı villa və bağlar var. Həmin dəbdəbəli imarətlərin çoxu da varlı şəxslərə, məmurlara məxsusdur. Nədənsə, onların mənzillərində su təchizatı ilə bağlı hansısa problem olmur. Kəsintisiz olaraq su verilir. Sadə qəsəbə sakinləri isə zülm çəkirlər. Bütövlükdə, Mərdəkan kimi qəsəbədə belə problemlərin olması utancvericidir. Ona görə ki, Mərdəkan ölkənin seçilən kurort zonalarındandır. Belə bir qəsəbədə suyun olmaması anlaşılan deyil”.
O baxımdan ekspert hesab edir ki, bu istiqamətdə ciddi tədbirlər görülməlidir.
Vidadi ORDAHALLI
