Məlum olduğu kimi, Mənzil İnşaatı Dövlət Agentliyinin satışa çıxatdığı 442 mənzillə bağlı cəmiyyətdə ciddi ictimai müzakirələr aparıııb. Vətəndaşlar iddia edirdilər ki, cəmi bir neçə saniyənin içərisində mənzili hamıdan əvvəl əldə etmək yalnız hakerlərin xidmətindən istifadə etməklə mümkün ola bilərdi. Artıq məlum olub ki, prosesə doğrudan da kibercinayətlə məşğul olan dəstənin müdaxiləsi olub.
Dövlət Təhlükəsizlik Xidməti və Mənzil İnşaatı Dövlət Agentliyinin mətbuat xidmətləri birgə məlumat yayıb. Yayılan bəyanatla tanış olduqda məlum olur ki, kompüter sistemlərinə və məlumatlarına qanunsuz müdaxilə edən şəxslər məsuliyyətə cəlb ediliblər:
“Azərbaycan Respublikası Mənzil İnşaatı Dövlət Agentliyinin növbəti layihəsi – Yasamal Yaşayış Kompleksinin ikinci mərhələsində 442 mənzilin 30.03.2022-ci il tarixində güzəştlə satışı prosesi yerinə yetirilərkən kənardan müxtəlif şəxslər tərəfindən informasiya texnologiyaları sahəsində xüsusi kompüter proqram təminatlarından istifadə edilməklə mənzillərin seçimi prosesinə müdaxilə halları müşahidə edilmiş, Agentliyin şəffaf fəaliyyətinin təcəssümü kimi bu məsələnin araşdırılması üçün aidiyyəti üzrə Azərbaycan Respublikası Dövlət Təhlükəsizliyi Xidmətinə müraciət edilmişdir.
Dövlət Təhlükəsizliyi Xidmətində ilkin araşdırmalar aparılaraq faktla bağlı Azərbaycan Respublikası Cinayət Məcəlləsinin 273.3.1 və 273.3.2-ci (qabaqcadan əlbir olan bir qrup şəxs tərəfindən kompüter sisteminə və kompüter məlumatlarına təkrar qanunsuz müdaxilə) maddələri ilə cinayət işi başlanılmışdır.
Müəyyən edilmişdir ki, Azərbaycan Respublikası vətəndaşları Məmmədov Elçin Elman oğlu, Hacıyev Ruslan Afiz oğlu, Hüseynov Firudin İlqar oğlu, Lətifzadə Yunis İltimas oğlu, Abdullayev Tərlan Tahir oğlu və Məmmədov Cavid Fəhrad oğlu digərləri ilə əlbir olub ayrı-ayrı qruplar halında Mənzil İnşaatı Dövlət Agentliyinin “Güzəştli mənzil” informasiya sisteminə daxil olmaq, oradakı məlumatları dəyişmək hüququ olmadan maddi maraq zəminində onlara müraciət etmiş şəxslərin güzəştli şərtlərlə mənzil əldə etmələrini təmin etmək məqsədilə xüsusi kompüter proqram təminatları hazırlayıb və ya uyğunlaşdırıb tətbiq etməklə 30.03.2022-ci il tarixində “Güzəştli mənzil” informasiya sisteminə daxil olub və kompüter məlumatlarını qəsdən təkrar dəyişdirib qanunsuz müdaxilə etmiş, bu hərəkətləri ilə hüququ olan vətəndaşların ümumi və bərabər əsaslarla güzəştli mənzil əldə etmək imkanını məhdudlaşdırmaqla və dövlət orqanlarının normal fəaliyyətinə mane olmaqla əhəmiyyətli zərər vurmuşlar.
Həmin şəxslər Cinayət Məcəlləsinin 273.3.1 və 273.3.2-ci maddələrində nəzərdə tutulan cinayət əməllərini törətməkdə şübhəli bilinərək təqsirləndirilən şəxs kimi cinayət məsuliyyətinə cəlb edilmişlər. Cinayət işi üzrə araşdırmalar davam edir.
Hazırda Azərbaycan Respublikası Dövlət Təhlükəsizliyi Xidməti və Azərbaycan Respublikası Mənzil İnşaatı Dövlət Agentliyi tərəfindən qeyd olunan məsələlərlə bağlı zəruri hüquqi prosedur tədbirlər yerinə yetirilir. Dövlət tərəfindən güzəştli mənzil satışı prosesinə kibercinayətlər yolu ilə və ya digər qanunsuz müdaxilə halları və belə əməllər nəticəsində vətəndaşların seçimindən yayındırılmış mənzillərə dair obyektiv hüquqi qiymət verilməsi təmin ediləcəkdir.
Araşdırmaların nəticələri barədə ictimaiyyətə əlavə məlumat veriləcəkdir”.
Bu məlumatdan məlum olur ki, yaranmış narazılıq heç də satışı həyata keçirən qurumdan qaynaqlanmayıb. Görünən budur ki, agentlik işini şəffaf qurub və istənilən manipulyasiyaların araşdırılmasında özü maraqlıdır. Bəyanatın məğzindən görünür ki, müvafiq orqanların apardığı bu araşdırmalara MİDA özü təşəbbüs göstərib və ilkin nəticələr də göstərir ki, baş verən nöqsan və manipulyasiyalar MİDA-dan qaynaqlanmır. Ayrı-ayrı işbazların qanunsuz əməlləridir.
“Azərbaycan uzun illərdir beynəlxalq müstəvidə ardıcıl humanitar siyasət yürüdür”
Hüquqşunas Mehman Muradlı “Bakı-Xəbər”ə açıqlamasında bildirdi ki, MİDA-nın keçirdiyi son hərrac doğrudan da ciddi narazılıq doğurmuşdu: “Dövlətin aztəminatlı ailələr üçün hazırladığı layihə elə dövlət qurumlarının özünə bir inamsızlıq yaradırdı. İttihamlara tuş gələn də MİDA idi. Çünku prosesi o həyata keçirib. İnsanlar haqlı olaraq sual edir: 442 mənzil cəmi 5 saniyənin içində necə satıla bilər? Belə qənaətlər vardı ki, maxinasiyanın edilməsində MİDA-nın öz əli var. Ancaq bugünkü bəyanatdan görürük ki, bu işin araşdırılması ilə bağlı əlaqədar qurumlara müraciəti elə MİDA-nın özü edib. Artıq həbslər varsa, deməli, proses tam çılpaqlığı ilə aydınlaşacaq. Ancaq hesab edirəm ki, MİDA bundan ciddi nəticə çıxarıb, bu prosesin daha təkmil olmasına çalışacaq. Çünki əks təqdirdə, başqa işbazlar yenə də dövlətin humanizmə söykənən layihəsini sabotaj etmiş olacaq. Hesab edirəm ki, bu, işini internet üzərindən quran başqa dövlət qurumlarına da bir xəbərdarlıq olmalıdır ki, təhlükəsizliklə bağlı məsələlərə xüsusi önəm versinlər. Əks təqdirdə hansısa cinayətkarların əməlinin qurbanı sadə vətəndaşlar olacaq”.
Məhəmmədəli QƏRİBLİ
