Paytaxtla yanaşı, bölgələrdə də kanalizasiya sistemi qurulsun deyə hər il dövlət büdcəsindən milyonlarla vəsait ayrılır. Hətta bu məqsədlə beynəlxalq qurumlardan kreditlər alınır. Ancaq görünən odur ki, bölgələrdə sözügedən məsələ ilə bağlı çox ciddi problemlər var.
Məsələn, Yevlax kimi bir şəhərin mərkəzində ötən əsrin 60-cı illərində qurulan kanalizasiya sistemi bərbad vəziyyətdədir. Şəhərin Axmaz adlanan ərazisində üfinət iyindən qalmaq olmur. Səbəb kanalizasiyanın açıq şəkildə arxlar vasitəsilə küçələrdən axıdılmasıdır. Sakinlər deyir ki, bəzi küçələrdə kanalizasiya küçənin düz ortasıyla axdığından, bura nə təcili yardım, nə də yanğınsöndürən gələ bilir. Bu səbəbdən sakinlər həm də infeksion xəstəliklərin içində yaşayır. Sakinlər pəncərəni açıb otağın havasını dəyişə bilmirlər. Ona görə ki, otağa təmiz hava yox, üfünət iyi dolur. Orada yaşayanlar bir növ pis qoxuya öyrəşiblər, amma kənardan evə kimsə qonaq gəlirsə, o dəqiqə bunu hiss edir. Yaşlı sakinlər deyir ki, neçə illərdir kanalizasiya mərkəzi küçələrə axır. Dəfələrlə rəsmi qurumlara müraciət etsələr də nəticə dəyişməyib. İki il əvvəl onlara deyiblər ki, şəhərdə yeni kanalizasiya xətləri çəkiləcək və arxların üstü bağlanacaq.
İki il əvvəl Prezident İlham Əliyevin sərəncamı ilə Prezidentin Ehtiyat Fondundan “Azərsu” ASC-yə 5 milyon manat köçürülüb. Ancaq hələlik ortada ciddi nəticə yoxdur. Azərsu ASC-dən bildirilib ki, Yevlaxda kanalizasiya sistemi 60-cı illərdə qurulduğu üçün bəzi ərazilərdə qəzalı vəziyyətdədir. Elə ərazilər var ki, orada mərkəzləşdirilmiş kanalizasiya sistemi yoxdur. Yəni vətəndaşların çəkdiyi xəttdir. Qurumdan bildiriblər ki, dövlət investisiyası hesabına mərhələlərlə su xəttləri yenilənəcək. Ancaq qurumdan kanalizasiya xəttlərinin nə zaman yeniləcəyi ilə bağlı konkret bir söz deyilməyib. Bu gedişlə Yevlax sakinləri daha bir neçə il gözləməli olacaqlar.
“Yevlaxda yaşananlar onu göstərir ki, vəsaitlər təyinatı üzrə xərclənmir”
Məsələyə münasibət bildirən iqtisad üzrə fəlsəfə doktoru Firdovsi Şahbazovun fikrincə, nəinki Yevlaxda, ümumiyyətlə bölgələrdə kanalizasiya sistemləri yenidən qurulmalıdır: “Əslində şəhərlərdə bu kimi məsələlərə xüsusi önəm verilməlidir. Ancaq əfsuslar olsun ki, bölgələrdə infrastruktur qurularkən kanalizasiya şəbəkəsinə elə də diqqət göstərilməyib. Şəhəhlərdə əhali artdıqca, bununla bağlı problemlər daha da kritik həddə çatıb. Yevlax sıradan bir rayon deyil. O baxımdan belə bir rayonda kanalizasiya şəbəkəsinin bərbad gündə olması biabrçılıqdır. Əslində su və kanalizasiya sistemi birgə istiqamətləndirilməlidir. Ancaq görünən odur ki, bizdə bu belə deyil. Sözügedən sahədə ciddi problemlər var. Regionlarda problem həm də odur ki, kanalizasiya şəbəkəsi ilə bağlı mərkəzləşmiş kollektor şəbəkəsi yoxdur. Hər il su və kanalizasiya sistemlərinin qurulması ilə bağlı milyonlarla vəsait ayrılır. Ancaq görünən odur ki, bu sahədə ciddi korrupsiya halları var. Yevlaxda yaşananlar onu göstərir ki, vəsaitlər təyinatı üzrə xərclənmir. Fikrimcə, idarəçilik düzgün qurulsa, belə olmayacaq”.
Ən nəhayət, ekspert çıxış yolu kimi kommunal təsərrüfatların seçkili qurum olan bələdiyyələrə həvalə olunmasını məqsədəuyğun saydı.
Vidadi ORDAHALLI
