Masallı rayon Mərkəzi Kitabxanasında təşkil olunan tədbir məhz dünyada “ağ ölüm” kimi tanınan narkomaniyaya qarşı mübarizə məqsədini daşıyırdı. “Narkomaniya bəşəriyyət üçün təhlükə mənbəyidir” adlı tədbirdə kitabxananın direktoru Ə.Nəzərov çıxışında bildirdi ki, yaşadığımız cəmiyyətdə bəşəriyyət üçün böyük fəsadlar törədən narkomaniya irqindən, yaşından, dinindən asılı olmayaraq, bütün xalqları, millətləri düşündürən ən ağrılı problemlərdən biridir. İnsan həyatına təhlükə mənbəyinə çevrilən narkomaniya müasir dövrümüzdə geniş vüsət alıb. Sərhəd tanımayan, qlobal xarakter daşıyan narkomaniya indiki zamanda hər bir kəsdən bu mövzuya çox ciddi yanaşmağa tələb edir.
Kitabxana əməkdaşları N.Fərəcova və R.Dadaşov da insanlığa qarşı ən dəhşətli faciə olan narkomaniya ilə bağlı öz fikirlərini dedilər: “Bugünkü gənclik sabahımız, gələcəyimizdir. Dövlətin, millətin, xalqın gələcəyi sağlam, etibarlı gənclikdən çox asılıdır. Buna görə də gənc nəslin sağlam ruhda tərbiyəsi dövlətin və cəmiyyətin əsas vəzifəsi hesab olunur. Narkotik maddələrin gənclərin arasında yayılmasının qarşısını almaq məqsədilə dünyanın bir çox ölkələrinin qəbul etdiyi milli proqramlarda nəzərdə tutulan müddəalar uğurla yerinə yetirilir, həyəcan təbili səslənir. Qəbul edilən milli proqramlara əsasən, təhsil ocaqlarının, ictimai təşkilatların əsas vəzifələrdən biri narkomaniyaya qarşı izahat və təbliğat işinin aparmasıdır. Bəşəriyyət üçün ən təhlükəli bəla olan narkomaniya ilə bağlı problemləri dünya ictimaiyyətinin diqqətində saxlamaq məqsədilə BMT iyunun 26-nı "Narkomaniyaya və Narkobiznesə qarşı Beynəlxalq Mübarizə Günü" elan edib. Məhz həmin gün narkomaniya qarşı kəskin mübarizə aparmaqda atılan addımların hesabatı kimi dəyərləndirilir”.
Zəfər ORUCOĞLU Azərbaycan Jurnalistlər Birliyinin üzvü
