Son vaxtlar Sumqayıtda sahibsiz itlər həddən artıq çoxalıb. Sürü halında mikrorayonlarda, binaların həyətində, parklarda, küçələrdə, ictimai yerlərdə itlərdən, nəinki məktəblilər, hətta böyüklər də çəkinir.
İşə tələsən sakinlər və məktəbə gedən şagirdlər itlərin kütləvi hücumuna məruz qalırlar.
Elə ən qorxulusu da hücum edən itin quduz olması təhlükəsidir. Ekspertlər qeyd edirlər ki, quduz itin dişləməsindən sonra insanda quduzluq qeydə alınır və ciddi müalicə olunmazsa, onda kəskin aqressiyanın yaranmasına, ən son nəticədə isə ölümə səbəb olur.
Sumqayıt şəhər sakinləri qeyd edir ki, Sumqayıtda il ərzində it dişləməsi çox baş verir: “Bu məsələ yalnız ölüm faktı olduqda gündəmə gəlir. Bir neçə il əvvəl Sumqayıtda 10-cu mikrorayon ərazisində it dişləməsindən 20 gün sonra 5 yaşlı şəhər sakini Mikayılzadə Zeynəb Elçin qızı quduzluq nəticəsində vəfat edib. O, xəstəxanaya yerləşdirilsə də, xilas etmək mümkün olmayıb. Hücum edən it onu üz və alın nahiyəsindən dişləyib. Bundan başqa, bir nəfər kişi də itlərin hücumuna məruz qaldığı üçün ölüb. Sumqayıtda insan həyatı, əsasən də azyaşlılar üçün təhlükə mənbəyinə çevrilən sahibsiz itlər zərərsizləşdirilməli, torlar vasitəsilə tutulub ərazidən uzaqlaşdırılmalı və sığınacaqlarlarda yerləşdirilməlidir”.
Sakinlər onu da qeyd edir ki, küçə itləri ilə bağlı aidiyyəti qurumlara dəfələrlə müraciət ediblər. Lakin onların müraciətinə heç bir reaksiya verilməyib.
Ekspertlər vətəndaşlara küçə itlərinin olduğu yerlərdən mümkün qədər uzaq durmağı məsləhət görür. Amma bu da çıxış yolu deyil. Əlbəttə, itləri öldürmək də qeyri-insani bir hərəkətdir. Küçə itlərinin çox olduğu yerlərdə insan həyatı, əsasən də azyaşlılar üçün təhlükə mənbəyinə çevrilən sahibsiz itlər zərərsizləşdirilməli, torlar vasitəsilə tutulmalı, ərazidən uzaqlaşdırılmalı və sığınacaqlarlarda yerləşdirilməlidir. Əslində Sumqayıt İcra Hakimiyyəti rəsmi şikayəti gözləmədən bununla bağlı bir tədbir görməlidir. Çünki İcra Hakimiyyətində işləyənlər də bu şəhərdə yaşayır və problemdən xəbərdardır.
“Sahibsiz itlər arasında quduzluğa tutulmuşlar üstünlük təşkil edir”
Sosioloq Aytəkin Kamranqızı bildirdi ki, məktəblərin ətrafında sahibsiz heyvanların sayı çoxalıb: “Sahibsiz itlər arasında quduzluğa tutulmuşlar üstünlük təşkil edir. Hazırda 4472 orta məktəbdə təhsil alan 1,5 milyon şagirdin həyatı, sağlamlığı təhlükə altındadır və məktəblərdə bunun qarşısının alınması üçün heç bir şərait qurulmayıb. Təəssüf ki, bir çoxları çıxış yolu kimi itləri öldürməyi təklif edir, amma məktəblilərin, azyaşlıların yanında bunu etmək çox təhlükəlidir. Bundan başqa, itləri öldürməklə saylarını azaltmaq mümkün deyil. İtlər bir neçə vaxtdan sonra balalayır və sayı daha da artır. Odur ki, öldürmə taktikasının mənası yoxdur”.
Günel CƏLİLOVA
