Mətbuatda yayılan məlumata görə, Qarabağ qazisi Davud Bağırzadə iş problemi sarıdan əziyyət çəkir. Lənkəran rayonundan olan D.Bağırzadə Füzuli və Xocavənd istiqamətində döyüşlərdə yaralanıb.
Qazi bildirir ki, müharibədən əvvəl rahat işləyib ailəsinin ehtiyaclarını özü qarşılaya bilib: "Mən ailəmi dolandırmaq üçün heç vaxt kimdənsə yardım istəməmişəm. Müharibədən əvvəl özüm işləyib, halal zəhmətimlə ailəmi dolandırırdım. İndi səhhətimlə bağlı işləyə bilmirəm. Ehtiyacım var deyə yardım istəyirəm. Mənə 80 manat təqaüd verilir. O da heç dərmanlarıma kifayət eləmir. Hər gün dərman atıram. Lənkəran Şəhər İcra Hakimiyyəti mənimlə bir dəfə də maraqlanmayıb. İş üçün Lənkəran Şəhər İcra Hakimiyyətinə getmişdim. Dedilər ki, iş yoxdur”.
Lənkəran RİH: “İmkan yarandığı təqdirdə qazinin işlə təmin olunmasına köməklik göstəriləcək”
Qazinin şikayəti ilə bağlı Lənkəran Şəhər İcra Hakimiyyətindən bildirildi ki, imkan yarandığı təqdirdə qazinin işlə təmin olunmasına köməklik göstəriləcək: “İcra Hakimiyyəti kimisə işlə təmin edən qurum deyil. Davud Bağırzadə qəbul edilən zaman ona Lənkəran-Astara Regional Məşğulluq Mərkəzinə mürəciət etməsi tövsiyə olunub. Bununla belə, vətəndaşın işlə təminat məsələsi nəzarətə götürülüb və gələcəkdə imkan yarandığı təqdirdə münasib işlə təmin olunmasına köməklik göstəriləcək”.
Elxan Əliyev: “Qazilərin işlə təminatına dövlətin nəzarət mexanizmi olmalıdır”
Sosial sahə üzrə ekspert Elxan Əliyev bildirdi ki, qanunda fiziki məhdudiyyətli insanlar üçün iş yerlərinin ayrılması nəzərdə tutulsa da, praktikada buna demək olar əməl edilmir: “Hərbi biletə “yararsız” yazılması o demək deyil ki, şəxs heç yerdə işləyə bilməz. Biletdə yararsız qeyd edilməsi daha çox fiziki qabiliyyət tələb edən peşələrdə, məsələn, hüquq-mühafizə orqanlarında işləməyi məhdudlaşdırır. Yəni nəzəri baxımdan müəssisələrin əksəriyyətində işlə təmin olunmaq mümkündür. Ziddiyyət burasındadır ki, özəl şirkətlər belə insanları işə götürməkdə maraqlı deyillər, daha çox tam sağlam, enerjili insanları işlətməyi hədəf götürürlər”.
Ekspert onu da əlavə etdi ki, qazilərin işlə təminatına dövlətin nəzarət mexanizmi olmalıdır: “Elə adam var ki, ayağı yoxdur, amma ofis işində işləyə bilər. Hesab edirəm ki, bu məsələ bağlı konkret dövlət siyasəti var, ölkə başçısının, Ali Baş Komandanın iradəsi var. Qazilərimizin işlə təmin edilməsində özəl sektor da aktivlik göstərməlidir”.
Günel CƏLİLOVA
