Azərbaycanda bəzi məscid imamları vəzifəsindən kənarlaşdırılacaq. Belə ki, ali və orta ixtisas dini təhsili olmayan imamlara həm dövlət tərəfindən verilən maddi yardım kəsiləcək, həm də onlar vəzifələrini itirəcəklər.
Bu “Dini etiqad azadlığı haqqında” Qanunla tənzimlənir. Həmin Qanun 4 may 2021-ci ildə qəbul edilib.
“Əvvəllər hansısa xarici ölkədə mədrəsə və ya dini təhsil alanlar məscidlərə imam təyin edilirdi, ancaq indi…”
Təhsilsiz din xadimlərinin vəzifə və yardımın itirilməsi barədə fikir bildirən ilahiyyatçı Tural İrfan bildirdi ki, bu qərarı doğru sayır: “Çünki əvvəllər hansısa xarici ölkədə mədrəsə və ya dini təhsil alanlar məscidlərə imam təyin edilirdi. Onlar da mənfi təbliğatla məşğul olurdular. Din xadimləri ilə bağlı ali təhsil məsələsinin tətbiq olunması önəmlidir. Ancaq burada bir həssas məqam var. Belə ki, Azərbaycanda ali dini təhsil Bakı İslam Universiteti tərəfindən verilib. Hansı ki, bu universitet bir neçə il əvvəl bağlandı. Məlumat üçün qeyd edim ki, bu təhsil ocağının 4000-ə yaxın məzunu var. Bakı Dövlət Universitetinin ilahiyyat fakultəsində isə təhsil alanlar isə təcrübə deyil, maarifləndirici təhsil verilir. Nəzər yetirsək görərik ki, bu gün imam və axundların böyük əksəriyyəti Bakı İslam Universitetinin məzunları olub. Onu da nəzərə almaq lazımdır ki, Təhsil Nazirliyi qeyd etdiyim ali təhsil ocağının diplomlarını tanımaqdan imtina edib. Bakı İslam Universitetinin məzunları harda işləyirlərsə, işdən çıxarılırlar. Bu səbəbdən də hesab edirəm ki, ilahiyyat sahəsində yaşanan bu problem paralel şəkildə həllini tapmalıdır. Qafqaz Müsəlman İdarəsi ilə Dini Qurumlarla İş Üzrə Dövlət Komitəsi arasında vaxtilə narazılıqlar yaşanıb. Buna görə də Komitə Təhsil Nazirliyi ilə birləşərək Qafqaz Müsəlmanlar İdarəsinin nəzdində olan Bakı İslam Universitetinin diplomlarını ləğv etdirir. Ancaq nəzərə almaq lazımdır ki, bu hal dövlətə zərərdir. Maraqlıdır, məscidlərə hansı ali təhsilli imam və axundları yerləşdirəcəklər?”.
Həmsöhbətimiz onu da əlavə etdi ki, bu yaxınlarda imam və axundların əmək haqqı artıb. Bu peşə sahiblərinin təyinat məsələsi Dini Qurumlarla İş Üzrə Dövlət Komitəsinə verilib. Ancaq onların hansı formada məscidə təyin olunacağı hələ müəyyən olunmayıb: “Hesab edirəm ki, milli təfəkkürlü, xaricə bağlı olmayan ali təhsilli ilahiyyatçılar məscidlərə yerləşdirilməlidir. Əvvəlki şəxslər də məscidlərdən uzaqlaşdırılmalıdır”.
Günel CƏLİLOVA
