Bakı küləklər şəhəridir və bu küləyi nəzərə almayanda bəzən ağır fəsadlar ortaya çıxır. Güclü külək olan kimi evlərin damı uçur, fasadına ziyan dəyir, hətta insanların həyatı üçün çox ciddi təhlükə yaranır. Bu kimi hadisələr güclü külək olan kimi müşahidə edilir. Hətta bədbəxt hadisələr belə baş verir.
Araşdırmalara görə, bəzi tikinti şirkətləri ucuza qaçmaq üçün hər vasitəyə əl atırlar. Fəhləni usta kimi işlədirlər, tikinti materiallarının ən ucuzu, yəni ən keyfiyyətsizini istifadə edirlər ki, qazancları daha da çox olsun. Nəticədə də belə hadisələr baş verir.
Ümumiyyətlə, bəzi yaşayış binaları tikinti normalına uyğun deyil. Hətta bəzi binaların bütün standartlara cavab verdiyini sübut edən sənədləri də var, amma...
Ekspertlər bildirir ki, binaların dam örtükləri bəzən standartlara cavab vermir. Belə olanda da dam örtükləri küləyə davam gətirə bilmir və qopur. Bu zaman da ətrafda olan insanlar üçün təhlükə yaranır.
Maraqlıdır, tikinti zamanı keyfiyyətsiz materiallardanmı istifadə edirlər, yoxsa tikinti qaydalarına əməl olunmur? Ümumiyyətlə, tikinti aparılarkən külək amili nəzərə alınırmı? Burada məsuliyyəti kim daşıyır?
Elmar Nurəliyev: “Binaların üzlükləri, dam örtükləri, metal konstruksiyaları, məhəccərləri elə bərkidilməlidir ki…”
Təhlükəsizlik məsələsi üzrə ekspert Elmar Nurəliyev qeyd etdii ki, binaların üzlükləri, dam örtükləri, metal konstruksiyaları, məhəccərləri elə bərkidilməlidir ki, bütün əlverişsiz hava şəraitlərinə uyğun olsun: “Binalar inşa edilərkən layihələndirilmədə bunlar hamısı öz əksini tapır. Ona görə də buna ciddi nəzarət olunmalıdır. Tikinti başa çatdıqdan sonra binanın fasadına vurulan üzlüyün nə qədər davamlı olması yoxlanılmalıdır. Burada tikintini aparan şirkətlərin məsuliyyəti böyükdür. Onlar nəzərə almalıdır ki, onların binalarda istifadə etdiyi materiallar keyfiyyətli olmalı, onlar quraşdırılarkən əlverişsiz hava şəraiti nəzərə alınmalıdır".
Ekspertin sözlərinə görə, müvafiq qurumlar tərəfindən tikinti işi başa çatdıqdan sonra layihəyə uyğun tikilib-tikilmədiyi monitorinq edilməlidir. Əgər layihədən kənarlaşma və təhlükəsizlik standartlarına cavab vermirsə bina təhvil götürülməməlidir: “Binalarda eyvanların şüşəbənd edilməsi də küləkli havada təhlükə yarada bilər. Əlverişsiz havada insanlar belə binaların qarşısından keçərkən ehtiyatlı olmalıdır. Həmçinin vətəndaşlar da məsuliyyətli davranmalı, eyvana lazımsız əşyalardan təmizləməlidirlər”.
Ramil Osmanlı: “Fəsadlar daha çox ictimai dövlət əhəmiyyətli obyektlərdə və çoxmərtəbəli binalarda baş verir”
Daşınmaz əmlak məsələləri üzrə ekspert Ramil Osmanlı bildirdi ki, tikintidə baş verən yeyintilər zamanı materialların azalması, yoxa çıxması belə fəsadlara səbəb olur: “Fəsadlar daha çox ictimai dövlət əhəmiyyətli obyektlərdə və çoxmərtəbəli binalarda baş verir. Hansı ki, tikintisi ya dövlət satınalmaları, ya da ayrı-ayrı özəl şirkətlər tərəfindən həyata keçirilib. Burada səbəb tikinti materiallarının keyfiyyəti ilə yox, tikintinin keyfiyyətilə bağlıdır. Yəni tikintidə istifadə olunmalı materialların müəyyən olunmuş normativlərdən aşağı olması bu cür problemləri ortaya çıxarır. Nəzərə alaq ki, Bakıdakı binalarda istifadə olunan materialların əksəriyyəti xüsusiyyət baxımından ağır materiallardır. Məsələn, ağlay daşların divarda qalması üçün daha keyfiyyətli normativlərdən istifadə olunmalıdır. Amma təəssüf ki, belə deyil. Dövlət satınalmaları həyata keçirilən zaman baş verən yeyintilər müəyyən materialların sonradan yoxa çıxmasına, azalmasına gətirib çıxarır. Bu da ciddi tikinti fəsadlarına yol açır. Yaxud hər hansı özəl şirkət podratçı ilə müqavilə bağlayır və podratçı müqavilə dəyərini artırmaq əvəzinə rəqəmi azaldır, nəticə etibarı ilə gələcəkdə bu, tikintinin keyfiyyətində özünü göstərir”.
Günel CƏLİLOVA
