Prezident İlham Əliyevin yürütdüyü siyasətin əsasında vətəndaşın maraqları, sosial rifahının yüksək səviyyədə təmin edilməsi dayanır. Cəmiyyətin bütün həssas təbəqələri, xüsusən də şəhid ailələri, müharibə əlilləri Prezidentin qayğı və diqqəti ilə əhatə olunub.
Əhalinin həssas qruplarının, xüsusilə şəhid ailələri və müharibə əlillərinin sosial müdafiəsinin gücləndirilməsi Prezident İlham Əliyevin siyasətinin ana xəttini təşkil edir. 2018-ci il aprelində ölkə Prezidenti seçildikdən sonra onun imzaladığı ilk - 19 aprel 2018-ci il tarixli Fərmanın məhz şəhid ailələri ilə bağlı olması və həmin ailələrə növbəti ciddi dəstək tədbirini nəzərdə tutması da bunu sübut edir. Fərmanla, həmçinin, 2019-cu ilin yanvar ayında imzalanan Fərmanla yeni mühüm sosial müdafiə proqramı icra edildi: 1997-ci il avqustun 2-dək ölkəmizin ərazi bütövlüyü uğrunda döyüşlərdə şəhid olmuş hərbi qulluqçuların, daxili işlər orqanları əməkdaşlarının -12 min şəhidin 18 mindən çox vərəsəsi 11 min manat məbləğində birdəfəlik ödəmə ilə təmin olundu.
Prezident İlham Əliyev, ötən dövrlərdə olduğu kimi, bu gün də şəhid ailələrinin və əlillərin sosial müdafiəsinin gücləndirilməsi istiqamətində böyük qayğı siyasəti həyata keçirir, onların sosial müdafiəsinin gücləndirilməsi istiqamətində müxtəlif işlər görür. 2018-ci ildən 2022-ci ilə qədər ötən 4 il müddətində Prezidentin bu istiqamətdə verdiyi sərəncamlar, qəbul etdiyi qərarlar, fərmanlar mühüm əhəmiyyət daşıyır.
“Cənab Prezidentin bu istiqamətdə həyata keçirdiyi sosial siyasət şəhid ailələrinin və müharibə əlillərinin məmnunluğuna səbəb olub”
Sağlam Cəmiyyət Hərəkatının sədri, sosioloq Elçin Bayramlı “Bakı-Xəbər”ə şərhində bildirdi ki, həqiqətən də son dörd il ərzində ölkədə sosial islahatlar, sosial müdafiə tədbirləri sahəsində çox böyük işlər görülüb, proqramlar həyata keçirilib, güzəştlər edib, güzəştli kateqoriyadan olan vətəndaşlara ən müxtəlif formalarda yardımlar edilib. “Eyni zamanda böyük bir müharibəni qələbə ilə başa vurduq. Dövlətin sosial xərcləri artıdı, həm şəhid ailələrinə, həm qazilərə, müharibə əlillərinə, veteranlara çox yüksək səviyyədə yardımlar edildi, onların sosial müdafiəsinin gücləndirilməsi istiqamətində saysız işlər görüldü. Bundan əvvəl də pandemiya şəraitdə dünyanın ayrı-ayrı ölkələri çox ağır vəziyyətə düşəndə bizdə sosial dəstək imkanları daha geniş oldu və dövlət vətəndaşı ağır vəziyyətdən çıxarda bildi. 2018-ci ildə cənab Prezident növbəti dəfə seçiləndən sonra onun imzaladığı ilk sərəncam məhz şəhid ailələrinə, müharibə əlillərə dövlət qayğısının artırılması ilə bağlıdır. Əvvəlki dövrlərdə olduğu kimi son 4 ildə də bu kateqoriyadan olan ailələrlə bağlı ciddi sosial dəstək tədbirləri həyata keçirilib. Ondan sonrakı dövrlərdə də müharibə əlilləri, vətən uğrunda şəhid olanların ailələri, qaçqın-köçkünlər üçün saysız sosial dəstək layihələri həyata keçirilib. Onların içində bu kateqoriyadan olan şəxslərin və onların ailələrinin kütləvi şəkildə mənzillə, avtomobillə təmin olunması məsələləri var. Onlar üçün xüsusi evlərin, binaların tikilməsi, qazilərin ölkədən kənarda müalicə olunması, onların müxtəlif vasitələrlə təmin olunması, bütün bunlar həmin kateqoriyaya aid olan şəxslərə yönəlik sosial yardım paketləridir. Bundan sonra isə bu kateqoriyadan olanlara verilən müxtəlif yardımların, müavinətlərin məbləği artırıldı. Böyük Vətən müharibəsi əlillərindən tutmuş indiyə qədər olan bütün müharibə iştirakçılarının, əlillərin, veteranların birdəfəlik və aylıq müavinətlərinin məbləği artırılıb. Bundan başqa, Silahlı Qüvvələrin şəxsi heyətinin sosial vəziyyətinin yaxşılaşdırılması, maaşların artırılması ilə əlaqədar çox işlər görülüb”.
E.Bayramlı qeyd etdi ki, şəhid ailələrinin, eləcə də müharibə əlillərinin özünüməşğulluq proqramlarına cəlb olunması kimi sosial layihələr də həyata keçirilib: “Son 4 ildə Prezident İlham Əliyevin şəhid ailələrinin və müharibə əlillərinin sosial müdafiəsinin gücləndirilməsi istqamətində həyata keçirdiyi siyasət təqdirəlayiqdir. Cəmiyyətin bu həssas qruplarının maddi təminatının yüksəlməsi, onlara verilən birdəfəlik və aylıq müavinətlərin artırılması, mənzillərlə, avtomobillərlə təmin olunması yönündə saysız işlər görülüb. Qeyd edim ki, xüsusən də Vətən müharibəsindən sonra Prezident İlham Əliyevin göstərişi ilə şəhid ailələri və müharibə iştirakçıları ilə bağlı geniş istiqamətləri əhatə edən sosial dəstək proqramı həyata keçirilir. Ölkə başçısının müvafiq sərəncamı ilə şəhid ailələri və müharibə əlillərinin mənzillə təminatı proqramı 2021-ci ildə 5 dəfə genişlənib. Cənab Prezidentin bu istiqamətdə həyata keçirdiyi sosial siyasət şəhid ailələrinin və müharibə əlillərinin məmnunluğuna səbəb olub”- deyə E.Bayramlı vurğuladı.
İradə SARIYEVA
