Yasamal rayonu “Qanlı göl” adlanan ərazidə antisanitar vəziyyət hökm sürür. Məişət tullantıları gölün ətrafına atılır. Hələ bu azmış kimi, yük manınlarında daşınan zibillər də həmin əraziyə boşaldılır.
Natəmiz ərazidə yaşayanlar pis qoxuya görə nəfəs ala bilmir. Kanalizasiya xətləri açıq şəkildə ərazidən keçir. Gölün ətrafında iydən dincələ bilməyən sakinlər deyir ki, antisanitar vəziyyət üzündən uşaqları gölün ətrafına gətirə bilmirlər. Çünki üfünət iyindən oturmaq mümkün deyil. Halbuki, belə olmasaydı, o zaman ərazidəki sakinlər normal istirahət edib asudə vaxtlarını səmərəli keçirə bilərdilər. Qabağdan yay gəlir. Bu isə o deməkdir ki, orada ağcaqanad və digər həşəratlar əlindən tərpənmək olmaz. Bütün bunlar sakinlərin narazılığına səbəb olur.
Yasamal rayon Kommunal Təsərrüfat Birliyindən bildiriblər ki, ərazi özəl şirkətə məxsusdur. Bu səbəbdən ərazi üzrə təmizliyə sözügedən şirkət məsuliyyət daşıyır. Ancaq buna baxmayaraq, yaxın dövrdə məsələyə müdaxilə edəcəklərini deyiblər.
“Ən optimal variant təmizlik işlərinə nəzarətin bələdiyyələrə həvalə edilməsidir”
Məsələyə münasibət bildirən ekspert Rəsul Cahangirli belə vəziyyətin yaranmasını idarəçiliyin düzgün qurulmaması ilə əlaqələndirdi: “Qanlı göl”ün ətrafında dəfələrlə oxşar problem yaranıb və hər dəfə qurumlar məsuliyyəti öz üzərlərindən atıblar. Əraziyə özəl qurum cavabdehdirsə, o zaman zəhmət çəkib ərazinin təmizliyinə nəzarət etsin. Bunu etmirsə, o zaman həmin qurumla bağlı ölçü götürülməli və cərimə edilməlidir. Bütün bunlara isə rayon İcra Hakimiyyəti nəzarət etməlidir. Digər tərəfdən, bütün təmizlik işlərini rayon Kommunal Təsərrüfat Birliyinin üzərinə yükləmək doğru deyil. Yaxşı olardı ki, rayon bələdiyyəsi bu işlə məşğul olsun. Nəzərə almaq lazımdır ki, Yasamal Bakının ən böyük rayonudur. Belə bir böyük rayonda kommunal xidmətlər qurumlar arasında bölünməlidir. O zaman eyni qurumun üzərinə yük düşməz. Nəticədə problemlər üst-üstə yığılmaz. Bu səbəbdən ən optimal variant təmizlik işlərinə nəzarətin bələdiyyələrə həvalə edilməsidir. Nəzərə almaq lazımdır ki, paytaxtın digər ərazilərində də bənzər problemlər yaranır. Baxırsan ki, aylarla həllini tapmır”.
Bu baxımdan ekspert hesab edir ki, kommunal təsərrüfatların idarəçiliyi düzgün qurulmalıdır.
Vidadi ORDAHALLI
