Hər kəsin Sabunçu Xəstəxanası kimi tanıdığı 3 saylı Şəhər Klinik Xəstəxanası barədə tez-tez şikayətlər səslənir. Xəstəxanada göstərilən xidmətin keyfiyyətindən və digər bu kimi məsələlərdən narazı olanlar çoxdur.
Bu arada sözügedən xəstəxana ilə bağlı qəzetimizə şikayət edən Gülər Kərimova orada üzləşdikləri problemlərdən danışdı. Şikayətçi qeyd etdi ki, dializdən əziyyət çəkən xəstələrə laqeyd münasibət var. Bir sıra hallarda dializ prosesi zamanı xəstənin təzyiqi ölçülmür. Bu da xəstənin hər an komaya düşmək risqini artırır. Tibb bacıları işlərinə səhlənkar yanaşır: “Anam dializ xəstəsidir. Həftədə iki dəfə Sabunçu Xəstəxanasına dializə aparırıq. Anamın 61 yaşı var. 20 ildən çoxdur şəkərli diabetdən əziyyət çəkdiyi üçün görmə qabiliyyətini itirib. Demək olar, tamamilə görmür. Görmə qabiliyyətini itirməsi dializ zamanı ciddi problemlərə səbəb olur. Dializ zamanı tez-tez təzyiqi oynayır. Qaydalara görə, bu zaman xəstənin təzyiqi ölçülməlidir ki, komaya düşməsin. Elə tibb bacısı var ki, növbədə olanda buna riayət edir. Təəssüflər olsun ki, digərlərinin bu vecinə deyil. Neçə dəfə özüm müdaxilə etmişəm ki, anam əldən gedir. Tibb bacıları ilə bununla bağlı neçə dəfə mübahisəm düşüb. İrad bildirəndə deyirlər ki, kimə istəyirsən şikayət elə. Bir sözlə, işlərinə çox məsulyətsiz yanaşırlar. Bunlar üçün xəstənin həyatı önəm kəsb etmir. Onu da deyim ki, biz məcburiyyətdən anamızı bu xəstəxanaya gətiririk. Belə baxanda, özəl klinikalarda dializin keyfiyyəti daha üstündür. Sadəcə, buna maddi imkanımız yoxdur”.
Sabunçu Xəstəxanası: “Bizdə bütün xəstələrə qayğı göstərilir”
Məsələ ilə əlaqədar 3 saylı Şəhər Klinik Xəstəxanası ilə əlaqə saxladıq. Xəstəxananadan adını deməyən şəxs deyiilənləri təkziib edərək telefonun dəstəyini yerə qoydu: “Deyilənlər həqiqəti əks etdirmir. Bizdə bütün xəstələrə qayğı göstərilir”.
Aydın Əliyev: “Həmin tibb müəssisəsi barəsində müvafiq tədbirlər görülməlidir”
Məsələyə münasibət bildirən Tibb Universitetinin Farmakologiya kafedrasının dosenti, tanınmış həkim Aydın Əliyev xəstəxanada xəstələrə belə etinasız münasibətin olduğundan təəssüfləndi: “İnsan bədəninin təqribən 4\3-ü mayedir. O üzdən alimlər məsləhət görür ki, insan gündə orta hesabla 2 litr maye qəbul etməlidir. Təbii ki, isti havalarda daha çox maye qəbuluna ehtiyac var. Aydın məsələdir ki, mayelər daha çox təmiz sular şəklində olmalıdır. Bu və ya digər səbəbdən orqanizmə maye yeritmək lazım gəlirsə, o zaman dializə ehtiyac olur. Dializ zamanı isə mütləq qan təzyiqi yoxlanılmalıdır. Çünki xəstədə qan təzyiqi aşağı ola bilər. Təzyiq aşağı olanda da ürəkbulanma və qusmalar olur. Bu zaman təbii ki, xəstə özünü pis hiss edir. Ona görə də dializ zamanı mütləq bu nəzərə alınmalıdır. Əks halda xəstə komaya düşə bilər. 3 saylı Şəhər Klinik Xəstəxanasında bunlara əməl edilmirsə, deməli işlərinə etinasız yanaşırlar. Bu isə yolverilməzdir. Ona görə ki, burada xəstənin həyatından söhbət gedir. İşlərinə soyuq yanaşırlarsa, o zaman həmin tibb müəssisəsi barəsində müvafiq tədbirlər görülməlidir. Yoxsa bunu özbaşına qoymaz. Çünki bu, insan həyatıdır. Bir sözlə, buna nəzarət artırılmalıdır”.
Vidadi ORDAHALLI
