Aprel ayının 2-dən etibarən 11 ayın sultanı müqəddəs Ramazan ayı başlayıb. Bununla əlaqədar restoranlar oruc tutan vətəndaşlarımız üçün Ramazan menyuları hazırlayıblar. Bu menyulara soyuq və isti yeməklər, desert, müxtəlif içkilər daxil edilir.
Restoran və kafelərdə təklif olunan qiymət paketləri yeməklərə və onların sayına görə dəyişir. Qeyd edək ki, bir restoranda müxtəlif qiymətə bir neçə menyu da təqdim olunur. İmsak menyusunun qiymətləri əksər restoranda ortalama olaraq adambaşına 15 manatdır. İftar menyusu qiymətləri isə minimum 12-25, maksimum isə 80-100 manatadək təklif edilir. Məsələn, “Günaydın” restoranında iftar menyusu bir nəfər üçün 80 manatdır. Daha bahalı iftar süfrələri təklif edən restoranlarla da rastlaşmaq mümkündür. Menyuya müxtəlif salat növləri, isti yeməklər, şorba, içkilər, qarnir və desertlər, meyvələr, xurma və s. daxildir.
Aytəkin Kamranqızı: “Ramazan ayında əksər müsəlman ölkələrində qiymətləri ucuzlaşdırıb daha əlçatan edirlər, bizdə isə…”
Imsak və iftar menyularının qiymətinin artması barədə fikir bildirən sosioloq Aytəkin Kamranqızı deyir ki, iftar menyusu adı altında təqdim edilən menyular müştəriləri cəlb etmək məqsədi daşısa da, adi menyu qiymətlərindən fərqlənmir: “Restoranların iftar menyularına fantastik qiymət qoyması hüquqi baxımdan məsuliyyət yaratmasa da, mənəvi məsuliyyəti var. Ramazan ayında əksər müsəlman ölkələrində qiymətləri ucuzlaşdırıb daha əlçatan edirlər. Bizdə isə bunun əksi müşahidə olunur. 80-100 manat bir adamın iftar menyusu üçün çox bahadır. Onlar iftar menyusuna minimum qiymət qoymalıdırlar ki, savab qazansınlar. Restoranlar qiymət artımını menyuda çeşidin sayının çox olması ilə izah edir. Ancaq onu da nəzərə almaq lazımdır ki, çoxsaylı yeməkləri və müştərilərin adi günlərdə yemədiyi desertləri menyuya yazıb adını iftar menyusu qoymaq düzgün deyil. 30 adda yeməyi bir nəfər iftar süfrəsində yeyə bilməz. Bu, müştərini aldatmaqdır”.
Həmsöhbətimiz onu da əlavə etdi ki, restoranlarda təklif olunan iftar və sahur menyularında çeşidin çox olmasına, böyük təmtəraqa ehtiyac yoxdur. Onun sözlərinə görə, Ramazan ayında çoxlu qida qəbul etmək zərərlidir: “İftar süfrələrində çoxçeşidliliyə gərək yoxdur. Sadə, o qədər baha olmayan menyu ilə də tam sağlam iftar süfrəsini təşkil etmək olar. İlk olaraq su və xurmanı əsas götürürüksə, ondan sonra bir növ şorbalardan istifadə etmək olar. Eyni zamanda mütləq şəkildə mövsümi tərəvəzlərdən ibarət olan lifli qidalar şəklində salat və bir isti yemək kifayət olur”.
Cəmişid Əliyev: “Yüksək qiymətə iftar menyusu təklif edən restoran sahibləri Ramazandan öz şəxsi bizneslərinin möhkəmlənməsi üçün sui-istifadə edirlər”
Ilahiyyatçı Cəmişid Əliyev bildirdi ki, yüksək qiymətə iftar menyusu təklif edən restoran sahibləri Ramazanı xüsusi olaraq öz şəxsi bizneslərinin möhkəmlənməsi üçün sui-istifadə edirlər: “Müqəddəs Ramazan ayı mərhəmət, rəhmət və şəfqət ayıdır. Bu ay insanların könül dünyasında mənəvi paklaşmaq üçün ilahi bir fürsətdir. Təəssüf ki, bəzi iş adamları şəxsi bizneslərinin möhkəmlənməsi üçün bu aydan sui-istifadə edirlər. İftar süfrələrinin restoranlarda təşkil olunması və daha çox müştərinin gözlənilməsi normaldır. Ancaq Ramazan ayını şəxsi mənafeləri üçün istifadə etmək İslamın gətirdiyi qaydalarla ziddiyyət təşkil edir. Çünki Ramazan ayı mənəvi paklaşma, mənəvi mühitin formalaşması üçün çox gözəl bir münbit şəraitdir”.
Günel CƏLİLOVA
