Binəqədi rayonu Rəsulzadə qəsəbəsi, İlham Hacıyev küçəsində çoxsaylı həyət evinin üzərindən cəmi yarım metr məsafədən 110 voltluq yüksək gərginlikli elektrik xətti keçir. Bu isə həm evlər, həm də orada yaşayanların həyatı üçün təhlükəlidir.
Sakinlər deyir ki, bir neçə ay əvvələ qədər rahat yaşayıblar. Problem yaxınlıqda çoxmərtəbəli binanın tikilməsindən sonra başlayıb. Tikinti şirkətinin “Azərenerji” ASC-yə müraciətindən sonra yüksək gərginlikli elektrik naqilləri inşaat ərazisindən uzaqlaşdırılıb. Olansa həyət evlərində yaşayan sakinlərə olub. Nəticədə sözügedən xətləri həyət evlərinin üzərindən keçiriblər. Sakinlər şikayət edir, amma məhəl qoyan yoxdu. Üzü yaya gedir və bu səbəbdən naqildə istilikdən genişlənmə artır. Genişlənmə nəticəsində isə naqillər aşağı düşür. O cümlədən, küləkli havalarda bu daha təhlükəlidir. Naqillərin bir-birinə toxunması kifayətdir ki, böyük yanğın baş versin. Digər tərəfdən, iri qabaritli avtomobilin ərazidən keçməsi naqillərə toxunma risqini artırır. Bütün bunlar sakinləri həyatı üçün ciddi təhlükə deməkdir. Hər an yanğın baş verə bilər. Əslində bu çox təhlükəlidir. Sabah bu səbəbdən böyük bir faciə baş versə kim cavab verəcək?
Əraziyə cavabdeh olan Abşeron Elektrik Şəbəkəsindən deyiblər ki, sözügedən problem yaxın günlərdə həll olunacaq. Yaxşı, hər an hansısa bədbəxt hadisə baş verərsə necə olacaq? Əvvəldən olmazdımı ki, problem o həddə çatmadan həll edilsin?
“Problem mərkəzləşmiş qaydada idarəetmədə, şəhərsalmada, arxitekturada buraxılan səhvlərlə bağlıdır”
Məsələyə münasibət bildirən iqtisadçı alim, professor Əli Əlirzayevin fikrincə, belə özbaşınalıqların kökündə şəhərsalma işlərinin bərbad vəziyyətdə olması dayanır: “Bütün bunlar onu göstərir ki, şəhərsalma qaydalarına əməl edilmir. Bu təkcə Rəsulzadə qəsəbəsinə xas olan problem deyil. Ümumiyyətlə, şəhər bu gündədir. Kimin kefinə düşürsə, küçənin ortasında çoxmərtəbəli bina inşa edir. Tez-tələsik oradakı kommunikasiya xətləri köçürürlər. Nəticədə belə xoşagəlməz problemlər yaranır. Halbuki, burada insan həyatından söhbət gedir. Texniki səhvlərdən tutmuş, layihələndirməyə qədər bir sıra məsələlərdə qaydalar gözlənilmir. Axırda da belə çıxılmaz situasiyalar yaranır. “Azərenerji” rəhbərliyi bilməli idi ki, bu, oradakı insanların həyatı üçün ciddi təhlükə yaradır. O səbəbdən yüksək gərginlikli xətlər evlərdən yüksəkdə olmalıdır. Ən vacibi, belə xətlərin altında ev olmamalıdır. Ancaq Bakıda o qədər ev tikiblər ki, mühafizə zolağı üçün yer qalmayıb. Bax, problem həm də bundadır. Heç bir normativ gözləmədən həyət evinin yanında böyük bina tikirlər. Sonra elə şərait yaradırlar ki, oradakı sakinlər məcbur olub çıxıb getsinlər. Deməyim odur ki, problem mərkəzləşmiş qaydada idarəetmədə, şəhərsalmada, arxitekturada buraxılan səhvlərlə bağlıdır. Reallıq ondan ibarətdir ki, Bakıda şəhərsalma qaydalarına əməl olunmur. Bakı Şəhər İcra Hakimiyyətindən tutmuş, rayon icra strukturlarına qədər hamı bu işin içindədir. Məmurları və onlarla əlbir olan sahibkarları insanların həyatı maraqlandırmır. Onları ancaq pul qazanmaq maraqlandırır”.
Bu səbəbdən professor hesab edir ki, sözügedən məsələ köklü şəkildə həll edilmədən bütün bunlara son qoymaq çətin olacaq.
Vidadi ORDAHALLI
