Mətbuatda yayılan məlumata görə, AAAF Park Yaşayış Kompleksindən mənzil alıb evsiz qalanlar Abşeron rayon İcra Hakimiyyətinə şikayətə gəlib. 22 bina, 2200-ə yaxın mənzil 8 ilə yaxındır təhvil verilmir.
Dia.az-ın məlumatına görə, şikayətə gələnləri qəbul edən Abşeron rayon İcra Hakimiyyətinin başçısı Abdin Fərzəliyev payçılarla şirkətin sahibi Tofiq Heydərov arasında görüş təşkil edəcəyini vəd edib.
Vergilər Nazirliyinin məlumatına görə, şirkətin 28 milyon manata yaxın borcu var. Sakinlər deyir ki, AAAF Park vergi borcuna görə binaları tikə bilmədiyini iddia edir.
AAAF Park Yaşayış Kompleksindən şikayət edən vətəndaşlar neçə ildir ki, aldıqları mənzillərə köçüb yaşaya bilmirlər.
AAAF Park Yaşayış Kompleksindən şikayətlə bağlı şirkətin rəsmi saytında qoyulan əlaqə nömrəsi isə işlək deyil.
Əlaqə telefonu işləmədiyi üçün şikayətlərə şirkətin mövqeyini öyrənə bilmədik.
“AAAF Parkın kifayət qədər qaranlıq işləri var, bu qədər şikayətçinin də olması onu göstərir ki, şirkətdə şəffaflıq yoxdur”
İqtisadiyyat üzrə ekspert Akif Nəsirli bizimlə söhbətində bildirib ki, istənilən fəaliyyət növündə boşluqlar varsa, dünyanın harasında olursa olsun, bu boşluqlardan istifadə edənlər tapılacaq. O qeyd etdi ki, bu boşluq istəyir ABŞ-da, istər İngiltərədə, İtaliyada, yaxud Azərbaycanda olsun, fərqi yoxdur, mütləq sui-istifadəçilər tapılacaq: “Bu boşluqdan sui-istifadə edib az zəhmətlə pul qazanmağa çalışan vətəndaşlar tapılacaq. Ona görə də, ümimiyyətlə mənzil tikintisi sahəsində həm qanunvericilik bərbad vəziyyətdədir, burada çox ciddi boşluqlar var, digər tərəfdən, bu sahədə hökumətin səmərəli nəzarəti yoxdur. Bu məsələləri aradan qaldırmaq üçün birinci növbədə bu sahəni tənzimləyən qanunvericilik aktlarına ciddi dəyişikliklər edilməlidir, o boşluqlar aradan qaldırılmalıdır. Özülü atılan binaların layihəsində nə qədər mənzil varsa, ölkə daxilində onun hamısının reyestri aparılmalıdır. Bu reyestrdə həm də dövlətin aidiyyəti qurumu tərəfindən mənzilin tikilmə sürəti izlənilməlidir. Bu halda nə tikinti şirkətləri vətəndaşı aldada, nə də vətəndaşın evini gecikdirə bilər. İndiki halda isə bu sahəyə dövlət nəzarəti çox zəifdir. Bu sahəni özbaşına buraxıblar. İcra başçıları da hərəsi öz ərazisində həmin şirkətlərə torpaq satmaqla, onları himayə etməklə yanaşı, bazarda özlərinin payını götürməyə çalışırlar. Ona görə də belə hərc-mərcliklər, baçıpozuqluqlar yaranır. Bakıda bir tərəfdən vətəndaşlar uzun illər boyu əziyyət çəkir evsiz qalır, digər tərəfdən, tikinti müddəti uzanır və uzanan müddətdə də şəhərin tozlanması, çirklənməsi, ekoloji cəhətdən ciddi zərbələrin dəyməsi müşahidə olunur. Yəni bu sahədə boşluqları aradan qaldırmaq üçün ilk növbədə qanunvericiliyə dəyişiklik edilməlidir. İkinci növbədə qanuna edilən yeni dəyişikliklərlə müəyyən edilməlidir ki, mənzillərin ciddi reyestri, qeydiyyatı aparılsın. Hökumət bilməlidir ki, hansı şirkət hansı binanın, yaşayış kompleksinin tikintisinə nə vaxt başlayıb, həmin bunada tikinti neçə müddətdə gedib, vəziyyət hər an nəzarətdə olmalıdır ki, vəziyyət necədir. Bu sahəyə ciddi nəzarət olmasa, biz hələ uzun müddət belə neqativ hallarla rastlaşacağıq. Hətta bir neçə il əvvəl bir mənzilin bir neçə nəfərə satılması fırıldaqları vardı. MTK-lar bu istiqamətdə çox özbaşınalıqlar edirlər. Bu özbaşınalıqların da səbəbi qanundakı boşluqlardır”.
A.Nəsirlinin fikrincə, digər tərəfdən, hökumət tikinti şirkətlərinin qarşısına texniki tələblər qoymalıdır. O qeyd etdi ki, artıq dünyada illərlə ev tikmək məsələsi yoxdur, çoxmərtəbəli binaların tikilməsi artıq aylarla hesablanır, yəni tikinti 5, 10,11 aya bitməlidir. Hətta Çində tikinti şirkətləri layihədə ayla yox, tikintinin müddətini həftə ilə göstərirlər. Yəni aylar artıq hesablanmır.
A.Nəsirlinin sözlərinə görə, bu sahəyə dövlət nəzarəti mütləq olmalıdır, çünki bu dövlətin ümumi yaşayış sahəsidir. Bu fərdi ev deyil, bir damın altında minlərlə adam yaşayır. “Tikintinin keyfiyyətinə nəzarət edilməli olduğu kimi texniki tərəfinə də, vətəndaşlarla münasibətlərə də nəzarət edilməlidir. Amma azacıq müşahidə etmək kifayət edir ki, iri tikinti şirkətlərinə nəzarətin olmadığı aydın görsənsin. Görünən odur ki, AAAF Parkın da fəaliyyətinə ciddi nəzarət olunmayıb. Zaman-zaman mətbuatda AAAF Park tikinti şirkəti barədə kifayət qədər şikayətlər yer alıb. Bu tikinti şirkətinin fəaliyyətində ciddi noqsanlar var. Bu qədər binalar, komplekslər tikən şirkət niyə vergidən yayınmalıdır, niyə vergi verməməlidir ki? AAAF Parkla bağlı kütləvi vətəndaş narazılığı onu göstərir ki, bu şirkət şəffaf işləmir. Bir neçə il əvvəl bir mənzili bir neçə vətəndaşa, mansardları ev adı ilə satması faktları var. Xırdalanda götürüb bütün mansardları ev adı ilə satıblar. Halbuki, mansardlar yaşayış üçün yararlı deyil, qeyri-yaşayış sahəsi kimi istifadə oluna bilər. AAAF Parkın kifayət qədər qaranlıq işləri var, bu qədər şikayətçinin də olması onu göstərir ki, şirkətdə şəffaflıq yoxdur, vergidən yayınma var. Konkret vergi borcu var bu şirkətin. Şirkət rəhbəri ilə şikayətçilərin görüşdürülməsi öz yerində, amma AAAF-ın fəaliyyəti kökündən araşdırılmalıdır. Şirkətdəki əyintilər aradan qaldırılmalıdır, ya vətəndaşlara dəyən zərər ödənilməlidir, ya da haqq etdikləri mənzillər onlara verilməlidir” - deyə A.Nəsirli qeyd etdi.
İradə SARIYEVA
