Son dövrlər əlillik dərəcəsi olan şəxslərin müəyyən bir qisiminin əlilliyə görə aldıqları pensiyanın kəsildiyinə dair şikayətlər çoxalıb. Tovuz rayonunun Yuxarı Öysüzlü kəndindən “Bakı-Xəbər”ə müraciət edən II qrup əlil Hüseynov Nicat Mayıl oğlu da şikayət edir ki, anadangəlmə əlil olmasına baxmayaraq, 6 aydır pensiya üzünə həsrətdir.
2001-ci ildən 2021-ci ilin oktyabrına qədər əlilliyə görə pensiya aldığını deyən 31 yaşlı N.Hüseynovun sözlərinə görə, o pensiyadan başqa ümid yeri yoxdur, onu da keçən ilin payızından ala bilmir. “Tovuz rayonunun Yuxarı Öysüzlü kəndində yaşayıram, anadangəlmə ikinci qrup əliləm. 2001-ci ildən 2021-ci il oktyabrın 5-ə qədər əlilliyə görə pensiya alırdım. Oktyabrın 5-də mənim əlillik müddətim bitdi. Respublika Endokrinologiya Mərkəzindən tutmuş Tovuz rayon Mərkəzi xəstəxanasına qədər 6 ay ərzində müayinə olunmuşam və müalicələr götürmüşəm. Bu bir günün xəstəliyi olmadığı üçün müalicəyə tabe olan xəstəlik deyil. Külli miqdarda vəsait hesabına bu xəstəlik müalicə oluna bilər. Endokrin piylənmə, II tip şəkərli diabetd\, yüksək təzyiq ömürlk mənimlə yol yoldaşıdır, ayaqlarımda erroziya, damarlarımda çəkilmə, ürək-qan damar sistemində narahatlıqlar var, bir sözlə, tibbi dildə çatdıra bilmədiyim bir sıra xəstəliklərdən əziyyət çəkirəm. Demək olar ki, tənəffüs sistemində də ciddi problem var. Bu xəstəliklər mənim həyat fəaliyyətimi sıfıra endirib. Pensiyam kəsiləndən sonra bütün sənədlərimi aidiyyəti yerlərə, orqanlara təqdim edirəm, 5 aydır mənim əlillik dərəcəmi bərpa etmək mümkün deyil. Baxmayaraq ki, respublika qanunvericiliyində nəzərdə tutulmuş bir çox ünvanlara müraciət etmişəm, o cümlədən də Əmək və Əhalinin Sosial Müdafiəsi Nazirliyinə müraciət etmişəm. Bu yaxınlarda Nazirliyə təkrar rəsmi müraciət göndərdim, təəssüf ki, hələ bir nəticə yoxdur. Biz cəbhəyanı kənddə yaşayırıq, əlsiz-ayaqsız, əlacsız insanlarıq, gözümü dikdiyim 180 manat pensiya idi, onu da kəsdilər. Əvvəl 130 idi, indi 180 olub. O pensiyanı da kəsdilər və Allahın ümidinə qalmışıq, qonşular olmasa bilmirəm nə edərik, axırımız necə olar. Xəstə anamla birgə yaşayırıq, onun aldığı pensiya heç dərmanlarına da yetmir. Anamın özünə baxan lazımdır. Bir ana bir bala çətin vəziyyətdə yaşayırıq. Ərzaq qıtlığı çəkirik. Mən pensiya alan vaxtlar birtəhər idarə edirdik.
Baxmayaraq ki, cəbhəyanı bölgədə yaşayırıq, amma əlaqədar qurumlar cəbhəyanı bölgədə yaşamağımızı, əlilliyimizi, gücsüzlüyümüzü nəzərə almırlar. Çox təəssüflər olsun ki, əlaqədar qurumlar mənim vəziyyətimi nəzərə almadan əsaslandırılmamış cavablar verirlər. Hətta mənə Əmək və Əhalinin Sosial Müdafiəsi Nazirliyinin Tibbi-Sosial Ekspert Komissiyasının özünü təqdim etməyən əməkdaşı deyir ki, sizə baxış keçirilib, amma pensiya düşmür. Dedim siz falçılıq edirsiniz, məni görmədən necə bu qərara gəlmisiniz? Əlilliyi olan insanlara belə absurd yanaşmalar sərgiləyirlər, sanki vətəndaşları sosial üsyana hazırlayırlar. Mən belə düşünürəm”.
Bir müddət əvvəl Tibbi-Sosial Ekspert Komissiyasına çağırıldığını deyən N.Hüseynovun orada kamerasını çəkiblər, təzyiqini ölçüblər. N.Hüseynov təzyiqölçmə prosesindən də narazıdır, deyir ki, düzgün ölçülməyib. “Mənim məlumatlarım bu komissiyada var, rəsmən sənədlərimizi də təqdim etmişik. Qeyri-rəsmi heç bir addım atmırıq. Biz dövlətçiliyimizə sədaqətli insanlarıq. Özü də şəhid ailəsiyik. İkinci Qarabağ müharibəsində şəhidlər vermişik. Üzr istəyirəm, mən yoldan keçənə nağıl danışan adam deyiləm, təxribatla məşğul olmuram. Ulu öndərimizin yadigarı cənab Prezidentə, onun siyasətinə həmişə böyük sayğı və inamla yanaşmışam. İstəyim budur ki, aidiyyəti qurumlar II qrup anadangəlmə əlilliyə görə pensiyamı bərpa etsin, o pensiyadan başqa güman yerim yoxdur.
Həkimlərin söylədiyi kimi mənə düşən haqqımı tələb edirəm ki, pensiya təminatım aparılsın. Başımı sallayıb kənd şəraitində yaşayıram, heç kimlə işim yoxdur, xalqımı, dövlətimi sevirəm”.
N.Hüseynov qəzetimiz vasitəsilə Prezident İlham Əliyevə, Birinci vitse-prezident Mehriban Əliyevaya və başqa rəsmi şəxslərə müraciət edərək, ona köməklik göstərilməsini istəyir.
Əlbəttə, hazırda ağır durumda olan Nicat Hüseynovun pensiyasının bərpa edilməsi vacibdir, ümid edirik ki, bərpa ediləcək də.
Qeyd edək ki, yazını çapa hazırladığımız ərəfədə N.Hüseynov redaksiyamıza vatsapp vasitəsilə bildirdi ki, əlaqədar qurumlara videomüraciətini də göndərib. Onu da sizə təqdim edəcəyik.
Tovuz rayonunun Yuxarı Öysüzlü kənd sakini, II qrup anadangəlmə əlil Nicat Hüseynovun pensiyasının hansı səbəbdən kəsildiyini araşdırmaq üçün Dövlət Tibbi-Sosial Ekspertiza və Reabilitasiya Agentliyinə sorğu göndərdik.
Agentlik: “Əyani müayinənin nəticəsinə əsasən şəxsin əlilliyi ilə bağlı müvafiq qərar veriləcək”
Agentlikdən sorğumuza cavab olaraq bildirildi ki, Tovuz rayon sakini Hüseynov Nicat Mayıl oğlunun əlilliyinin qiymətləndirilməsi tibb müəssisəsi tərəfindən elektron sistemə daxil edilmiş göndəriş əsasında aparılıb: “Müəyyən edilib ki, göndərişdə diaqnostik müayinə nəticələri ətraflı qeyd olunmayıb. Həmçinin, ekspertiza əhəmiyyətli göstəricilər dəqiqləşdirilməyib.
Bu baxımdan qanunvericiliyə uyğun olaraq 28.03.2022-ci il tarixində şəxsin göndərişi səhiyyə müəssisəsinə geri göndərilib.
Bununla belə, vətəndaş 07.04.2022 tarixində Dövlət Tibbi-Sosial Ekspertiza və Reabilitasiya Agentliyinin yerli tibbi sosial ekspert komissiyasının eksperti tərəfindən əyani müayinə edilib. Əyani müayinənin nəticəsinə əsasən şəxsin əlilliyi ilə bağlı müvafiq qərar veriləcək”.
İradə SARIYEVA
