Məlum olduğu kimi, 2014-cü ildən "Transit for Baku” layihəsi əsasında hazırlanaraq istifadəyə verilən xidmət 2022-ci il martın 19-dan avtobus məlumatlarının "Google” xəritələrinə inteqrasiyasını dayandırıb. Hazırda sistemin "Grace period” (güzəşt müddəti) prinsipi ilə görünən məlumatları yaxın zamanda "Google” xəritələrdən yığışdırılacaq.
"Transit for Baku”nun saytında yerləşdirilən məlumatda deyilir ki, xidmətin ləğvi Bakı Nəqliyyat Agentliyinin (BNA) düzgün iş prinsipi qurmaması ilə əlaqədardır. Agentlik tərəfindən marşrutlar haqqında məlumatlar gecikdirilir, həmçinin "Transit for Baku”nun sorğuları cavabsız buraxılır.
Maraqlıdır, Google map xəritəsindən Azərbaycanla bağlı məlumatları niyə silir və bunun nə kimi təsirləri olacaq?
Osman Gündüz: “Məlumatların Google xəritələrindən yığışdırılacağı ilə bağlı güzəşt müddəti başa çatanadək…”
İKT sahəsi üzrə ekspert Osman Gündüz bildirdi ki, illər öncə könüllülər Google şirkətinə müraciət edərək, könüllülük çərçivəsində Bakı şəhərinin ictimai nəqliyyat məlumatlarını təqdim etməyə başlayıblar: “Onlar bu xidməti vermək üçün ilkin məlumatları müxtəlif üsullarla əldə ediblər. Yəni ola bilər ki, ictimai nəqliyyatı öz resursları hesabına monitorinq etməklə, müvafiq dövlət qurumu ilə əməkdaşlıq çərçivəsində və ya alo141.az resursundan ilkin məlumatları əldə edib Google standartlarına uyğun emal etməklə Google şirkətinin resurslarına inteqrasiya ediblər. Əslində çox faydalı bir addım atıblar. İctimai nəqliyyatdan istifadə edənlər üçün adıçəkilən xidmət mühüm əhəmiyyət kəsb edir. İndi məlum olub ki, daha doğrusu, TFB komandası açıqlayıb ki, Google bu məlumatları xəritədən yığışdıracaq. TFB komandası səbəb olaraq göstərib ki, komanda artıq məlumatları BNA-dan əldə edə bilmir. Yəni BNA ictimai nəqliyyat məlumatlarının, marşrut dəyişikliklərinin dərcini gecikdirir. Bir proqramçının, startapçının əldə edə biləcəyi, yenidən emal üçün faydalı olan açıq məlumat bazası formasında deyil. Amma onu da qeyd edim ki, alo141.az resursunda bir az zaman keçiməklə, daha çox çalışmaqla, ictimai nəqliyyatı monitorinq etməklə TFB komandası ilkin məlumatları əldə edib, yenidən standartlara salmaqla Google-yə inteqrasiya edə bilərdi. Düşünmək olar ki, TFB komandası bütün bu işləri könüllülük səviyyəsində gördüyündən, BNA ilə ciddi bir işbirliyi olmadığından, əlçatan BNA məlumatları da emal oluna biləcək səviyyədə olmadığından TFB komandası üçün son zamanlar güvənli məlumatları daha effektiv formada əldə etməkdə problemlər yaranıb və nəticədə xidmətin Google resurslarına inteqrasiyası mümkün olmayıb”.
Ekspert hesab edir ki, məlumatların Google xəritələrindən yığışdırılacağı ilə bağlı güzəşt müddəti başa çatanadək BNA tərəfindən zəruri addımların atılması, Google ilə əlaqələrin yaradılması doğru və faydalı olardı.
Eldəniz Cəfərov: “Xəritədə nəqliyyat marşrutlarının ləğvi sərnişinlər üçün ciddi problemlər yaradacaq”
Nəqliyyat eksperti Eldəniz Cəfərov bildirdi ki, xəritədə nəqliyyat marşrutlarının ləğvi sərnişinlər üçün ciddi problemlər yaradacaq. Həmçinin, ictimai nəqliyyatın cəlbedici olmaması əlavə tıxaclar yaradacaq: “Layihənin qapadılması çox pis haldır. Çünki Bakıda ictimai nəqliyyatın hərəkətini, avtobusların sayını, marşrutlar arasındakı intervalları və dayanacağı göstərən başqa bir işlək sistem mövcud deyil. İctimai nəqliyyat sistemində bu kimi problemlər insanların həyatını çətinləşdirir. Bu xəritələrin yığışdırılması, marşrutun göstərilməməsi ictimai nəqliyyata vurulan növbəti zərbə olacaq. İctimai nəqliyyatın cəlbedici olmaması tıxacları artıracaq”.
Günel CƏLİLOVA
