Məlum olduğu kimi, Bakıda şəhərdaxili sərnişin daşımaları ilə məşğul olan bir qrup şirkət bu sahədə yaranmış vəziyyət və qiymətlərlə bağlı hökumətə müraciət edib. Gediş haqqının 30 qəpikdən 50 qəpiyə qaldırılması ilə bağlı Tarif Şurasına müraciət edən şirkətlər iddia edirlər ki, bu gün sığorta ilə bağlı çox ciddi problemləri var.
Şirkət rəhbərləri gediş haqqının azlığı ilə yanaşı, nəqliyyatın sığortalanmasındakı problemləri qeyd ediblər :"Bu gün sığorta ilə bağlı çox ciddi problemlərimiz var. Gündə 17-18 saat xətdə olan avtobusda hadisənin olmaması mümkünsüzdür. Hadisəyə görə də cərimə (malus balları) yığılır. Ümumiyyətlə sığorta şirkətlərinin 90%-i maşını sığortalamır, sığortalayanda da 1 maşının sığortası təqribən 720 manata başa gəlir. Bu isə çox yüksək məbləğdir".
İctimai nəqliyyat şirkətləri iddia edirlər ki, sığorta şirkətləri onlar üçün ciddi problemlər yaradır. Bu səbəbdən də sığorta qurumları ilə avtobus şirkətləri arasında qalmaqal yaranıb. Onlar iddia edirlər ki, 720 manat sığorta haqqı çoxdur. Ümumiyyətlə, bu məbləğdə sığorta haqqı çoxdurmu? Avtobuslar niyə baha sığortalanır?
Sığorta üzrə ekspert İlkin İbrahimov baki-xeber.com-a şərhində bildirdi ki, doğrudur, avtobusların fəaliyyəti ilə bağlı malus sistemi tətbiq olunur: “Ümumiyyətlə, təkcə avtobusların fəaliyyəti ilə deyil, bütövlükdə sığorta sistemində bonus və malus sistemi tətbiq olunur. Yəni il ərzində hadisə baş vermirsə, onda bonus olaraq bir illik 5 faiz endirim tətbiq edilir. Yox, əgər sizin sığorta hadisəniz baş verirsə onda o zaman malus sistemi tətbiq olunur və onun üzərinə sığorta haqqından əlavə 5 faiz pul gəlir. Sığorta haqqından əlavə gələn həmin 5 faiz pul cərimə kimi müəyyən olunur. Bunu motivasiya kimi də deyə bilərik. Yəni sabah sığorta hadisəsi etməsin. Əvvəlki illərdə bu sistemdən yayınmaq olurdu, amma indi heç cür yayınmaq olmur. Sığorta başqa adamın adına edilirdi və o zaman da bu kimi məsələlər ikinci plana keçirdi. Artıq ikinci ildir ki, malus sistemi daha çox tətbiq edilməyə başlayıb. Burada avtobus və taksilərə xüsusi fikir verilir. Yəni heç bir formada sığortalanmamaq məsələsi yoxdur, heç bir avtobus, heç bir avtomobil sığortalanmaya bilməz. Bununla bağlı qanunvericilikdə inzibati tənbeh tədbirləri var. Ona görə də, bəzən sığorta agentlərinə o sığortalanmada mükafat verilmədiyindən onda onlar gedib avtomobillərini birbaşa sığorta qurumlarının özlərində sığortalayırlar. Avtobus şirkətləri sürücülərə daha ciddi fikir versələr, daha uyğun sürücülər seçsələr əlbəttə, sığorta məsələsi daha ucuz başa gələcək. Şirkətlər seçimlərə xüsusi fikir versələr sığorta ilə bağlı heç bir problem yaşamayacaqlar”.
İ.İbrahimovun sözlərinə görə, şirkətlər sığorta ilə bağlı problem yaşamamaq üçün birbaşa sığorta agentlərinə yox, sığorta şirkətlərinə müraciət etməlidirlər. “Sığorta şirkətindən onlar heç bir halda “yox” cavabı ala bilməyəcəklər, sadəcə malus sistemini əlavə olaraq üstünə gələcəklər. Hesab edirəm ki, sığorta şirkətlərinin qərarı ədalətli qərardır” - deyə İ.İbrahimov qeyd etdi.
İradə SARIYEVA
