Bir çox məktəblər bu tədris ilini yeni və təmirli məktəblərdə keçirsələr də, bəzi məktəblər hələ də təhsili köhnə və təmirsiz şəraitdə davam etdirdi. Bu gün təmirə ehtiyacı olan, qəzalı vəziyyətdə olan məktəb binaları qalmaqdadır. Bu isə tədrisin keyfiyyətinə mənfi təsir edir. Çünki məktəblərdə verilən təhsilin keyfiyyəti qədər onun hansı şəraitdə verilməsi də önəmlidir.
Məktəblərin cari təmiri məsələsi hər zaman gündəmdə olan bir məsələdir. Cari təmir məsələlərinin konkret olaraq hansı dövlət qurumu tərəfindən həyata keçirilməli olduğu qaranlıq qaldığından, bu işlər hər zaman təhsil sistemi üçün müəyyən problem və narazılıqlar yaradır. Hər tədris ili başa çatdıqdan sonra növbəti tədris il üçün məktəblərin cari və əsaslı təmiri, yenidən tikintisi işlərinə başlanılır.
Azərbaycan qanunveciliyinə görə, hər bir vətəndaşın keyfiyyətli və bərabərhüquqlu təhsil almaq hüqüqu var. Təbii ki, ölkədə keyfiyyətli və bərabərhüquqlu təhsil imkanının yaradılması üçün, peşəkar kadr potensialı ilə yanaşı, müasir standatlara cavab verən təhsil müəssisələrinin olması əsas şərtdir.
Qeyd edək ki, son illər Azərbaycanda bu istiqamətdə həyata keçirilən tədbirlər yararsız məktəblərin sayını xeyli azaltsa da, yenə də təmirsiz, tədrisə yararsız məktəblər var. Belə təhsil müəssisələrindən biri də Tovuzun Aşağı Öysüzlü kənd orta məktəbidir. Bu məktəbdə şagirdlərin həyatı təhlükə ilə üz-üzədir. Sosial şəbəkələrdə sözügedən məktəbin fotosu yayılıb. Fotodan məktəbin acınacaqlı vəziyyəti aydın görünür. Həddindən artıq qəzalı vəziyyətdə və hər an uçmaq təhlükəsi ilə olan bu məktəbdə gündəlik tədris prosesi öz axarındadır.
Tovuz rayon Aşağı Öysüzlü kənd sakinləri də məktəbin qəzalı vəziyyətdə olduğunu təsdiqləyir: “Məktəb çox pis vəziyyətdədir, hər an uçmaq təhlükəsi var. Çox qorxuludur”.
Sakinlər və məktəbdə çalışan müəllim heyəti tədris müəssisəsinin təmiri ilə bağlı aidiyyəti qurumlara müraciət etsələr də, onlara heç bir cavab verilməyib.
Tovuz rayon İcra Hakimiyyəti: “Məktəbin təmir olunma məsələsinə icra hakimiyyəti deyil, təhsil şöbəsi baxır”
Tovuz rayon İcra Hakimiyyətindən bildirildi ki, məktəbin təmir olunma məsələsinə icra hakimiyyəti deyil, təhsil şöbəsi baxır.
Təhsil Nazirliyi - Cəsarət Valehov: “Məsələnin üzərində iş gedir, məktəb təmir olunacaq”
Təhsil Nazirliyinin mətbuat xidmətinin rəhbəri Cəsarət Valehov məsələdən xəbərdar olduğunu bildirdi: “Məsələnin üzərində iş gedir. Məktəb təmir olunacaq”.
Günel CƏLİLOVA
