Saatlı rayonunun Novruzlu kəndi Kür və Araz çaylarının qovuşduğu yerə çox yaxın məsafədə yerləşsə də, kənd sakinləri suya həsrətdir. Uzun illərdir həm içməli, həm də suvarma suyu ilə problem yaşayan kənd sakinləri deyir ki, müraciət etmədikləri qurum qalmayıb, amma nəticə yoxdur. Həftədə 1 saat rayon Su İdarəsi içməli su verir. Yaxınlıqdan su kanalı keçməsinə baxmayaraq, kəndə suvarma suyu verilmir. Bu səbəbdən sakinlər tarpaqlarını əkib-becərə bilmir, ağaclar susuzluqdan yanır.
Sakinlər deyir ki, 1997-ci ildən bu zülmü çəkirlər. Kəndə su vermirlər ki, ağac əksinlər, əkinlərini suvarsınlar. Kənddə elə vətəndaşlar var ki, hektarlarla torpağı var, amma su verilmədiyi üçün ərazini tikan basıb. Su olmadığı üçün zəruri ərzaq məhsulu olan kartof belə əkə bilmirlər. Kəndə neçə il əvvəl su çəkmək adı altında boru çəkilib, amma işlər yarımçıq qalıb. Maşınla su gətirib çənlərə vururlar. Sakinlər deyir ki, yaxınlıqda iki çayın birləşməsinə rəğmən su sarıdan belə əziyyət çəkmələri onlara çox pis təsir edir. Kənddə elə sakin var ki, 80 nar ağacı var, amma suyun olmaması üzündən bar götürə bilmir. Meliorasiya idarəsindən deyirlər ki, sakinlərin suvarma suyu ilə təmin olunması həll ediləcək, amma ortada nəticə yoxdur. Bir sözlə, ölkənin iki ən böyük çayı kəndin yaxınlığından keçsə də Novruzlunun yüzlərlə sakini su üzünə həsrət qalıb.
“Nəticədə, illər boyu sudan əziyyət çəkməyən sakinlər su üzünə həsrət qaldılar”
Məsələyə münasibət bildirən ekspert İlqar Hüseynlinin fikrincə, belə vəziyyətin yaranmasının kökündə Mərkəzi Aranda suyun ədalətli bölünməməsi dayanır: “Problem ondadır ki, Azərbaycanda suyun ədalətli bölgüsü prinsipi əsasən Aran regionunda pozulub. Bundan əvvəl Aran regionunda hektarlarla əkin sahəsi var idi ki, orada əkin heç vaxt aparılmırdı. Həmin ərazilər daha çox heyvandarlıq üçün nəzərdə tutulmuşdu. Son 7 il ərzində həmin ərazilər müəyyən oliqarxlar tərəfindən zəbt olunandan sonra Kür-Araz ovalığındakı ərazilər, o cümlədən Saatlının Novruzlu kəndi sudan bir növ məhrum edildi. Yəni həmin ərazilərə axıdılan su oliqarxların təsərrüfatlarına yönəldildi. Nəticədə, illər boyu sudan əziyyət çəkməyən sakinlər su üzünə həsrət qaldılar. Faktiki olaraq, onların su təminatında ciddi problemlər yaranıb. Hətta ötən il Saatlıda suyun verilməməsi ilə əlaqədar etiraz aksiyası keçirildi. İcra Hakimiyyəti ilə sakinlər arasında qarşıdurma oldu. Buna rəğmən, yenə problem həllini tapmadı. Görünən odur ki, yerli icra qurumları suyu ədalətli bölmək istəmir. Ona görə də rayonda su təminatı ilə bağlı ciddi sosial narazılıqlar var. Nə qədər ki, sözügedən problem həll edilməyib, sosial narazılığın miqyası daha da böyüyə bilər”.
O üzdən ekspert hesab edir ki, problem həll edilməlidir.
Vidadi ORDAHALLI
