Böyük zəfərin müjdəçisi olan 2016-cı ilin Aprel döyüşlərində Azərbaycan əsgəri canı və qanı bahasına tarix yazmaqla illərlə davam edən düşmən təxribatlarına layiqli cavab verdi. Bu haqq savaşında şəhidlik zirvəsinə ucalan qəhrəmanların arasında Lənkəran rayonu, Hirkan qəsəbəsində boya-başa çatan Rusif İbrahim oğlu Ağayev da var. İndi lənkəranlılar öz Vətən sevdalı oğlunu bir an belə unutmur, harada bir Günəş müqəddəsliyi var onun sorağını oradan alırlar. Doğma Hirkan kəndinin ən yaraşıqlı yerində onun xatirəsinə bulaq-abidə kompleksi də tikmişlər. Bu günlər kompleksin açılış mərasimi oldu. Lənkəran camaatının əksər hissəsi mərasimdə idi. Hamısı da rəşadət zirvəsində boylanan Rusifin qarşısında qürurlu görünürdü. Tədbirə bir-neçə dəqiqə qalmış kənd sakini Elşad Həsənovla söhbət etdim. O, dedi: - Rusif bizim üçün ölməyib. O, qəlbimizdə yaşayır. Göstərdiyi hünərlə qəsəbəmizi bütün Azərbaycana qəhrəmanlar diyarı kimi tanındı. İndi bizdə böyük də, kiçik də Rusifin adını məhəbbətlə, sevgi dolu ürəklə çəkir...
İlk öncə mərasim iştirakçıları xatirə bulağı önünə tər çiçəklər qoymaqla bir daha şəhidin ruhuna ehtiramlarını bildirdilər. Sonra Lənkəran ŞİH başçısı Taleh Qaraşov çıxış etdi: - 2016-cı ilin Aprel döyüşləri Ali Baş Komandan, cənab İlham Əliyevin mahir sərkərdəlik bacarığı ilə Azərbaycan Milli Ordusunun 44 günlük Vətən müharibəsində qazandığı tarixi Zəfərin əsasını qoydu. Vətənpərvər oğullar Qarabağ torpaqları işğal altında saxlamağa çalışan düşmən qüvvələrini həm cismani, həm də mənəvi cəhətdən sarsıtdılar. Fəqət, Vətən torpaqlarının azad olunması yolunda işğalçı düşmənə qarşı aparılan mübarizə tarixinin parlaq səhifəsi olan bu döyüşlərdə qazanılan qələbədə Lənkəran balası Rusif Ağayev də xüsusi qəhrəmanlıq göstərib. Vətənini sevən, onun yolunda canından keçən qəhrəman övlad tərbiyə etdiyinə görə ata-analar hər kəsə müqəddəsdir, Rusifi və bütün şəhidləri xalqımız ürəyində yaşatmaqla, onlar zaman-zaman unudulmaz.
Mərasimdə çıxış edən şəhid atası və digər natiqlər ölkədə uğurla həyata keçirilən inkişaf kursuna, xalqın rifahı naminə gördüyü işlərə, xüsusilə torpaqların işğaldan azad olunması yolunda canını qurban verən şəhidlərin Vətən qarşısındakı xidmətlərinə yüksək dəyər və xatirələrinin əbədi qalması ilə bağlı davamlı tədbirlərə görə Prezident İlham Əliyevin, Birinci vitse-prezident Mehriban xanım Əliyevanın ünvanına təşəkkür dolu minnətdarlıqlar səslədilər . Mərasimdə məktəblilərin ifasında şəhidlərə həsr olunmuş ədəbi-bədii kompozisiya da qürur verici alındı. Bulağın açılışı şəhidin anım gününə düşdüyü üçün qəsəbədəki uyuduğu müqəddəs torpaq ziyarət olundu, üzərinə tər çiçək dəstələri düzüldü.
Zəfər ORUCOĞLU Azərbaycan Jurnalistlər Birliyinin üzvü
