Son illər ölkədə müvəqqəti dini kəbin, yəni siğə etdirənlərin sayının artması barədə iddialar dolaşır. Məlumatlara görə, dinə az-çox bağlılığı olan bir çox insanlar qarşı cinslə münasibətlərini rəsmiləşdirməkdənsə, daha çox dini çərçivədə pərdələməyə çalışırlar.
Həm də müddətli kəbin kəsdirməyə üstünlük verirlər. Ancaq qanunvericiliyə görə, ancaq “ZAQS”dan sonra dini kəbin kəsilə bilər. Buna baxmayaraq, bu gün sosial şəbəkədə, xüsusilə də İnstagramda evlilik səhifələrində siğə qrupları fəaliyyət göstərir. Həmin səhfələrdə "ailə həyatı qurmaq üçün deyil, siğə ilə münasibət qurmaq istəyirəm", "həyat yoldaşımdan boşanmışam, siğə ilə bir bəylə tanış olmaq istəyirəm", "20 yaşım var, boyum 1.70-dir. Namaz qılıram, siğə ilə münasibət üçün qız axtarıram" kimi izdivac təkliflərə rast gəlmək mümkündür.
Qeyd edək ki, bu cür paylaşımları sosial şəbəkədə qınayanlar, etiraz edənlər üstünlük təşkil edir. Siğə adlı qruplar sosial şəbəkə istifadəçilərinin narazılığına səbəb olur.
Cəmişid Əliyev: “Sosial şəbəkələrdə bu işlə məşğul olanlar qadın alveri ilə məşğul olur”
Ilahiyyatçı Cəmşid Əliyev qeyd etdi ki, İslam dini siğəni birmənalı olaraq qadağan edir: “Qurani-Kərimdə nikahın bir ömürlük və iki insanın bir ömür boyu bir arada yaşamağa qərar verməsi ilə gerçəkləşdirildiyi ifadə edilir. Müvəqqəti nikahı peyğəmbər əfəndimiz qadağan edib. Amma cahiliyyə dövründə müvəqqəti nikah olub, sonra qadağan edilib: “Siğə İslamda haramdır. Siğə hər hansı qadınla müəyyən məbləğin əvəzində, müəyyən bir müddət birlikdə olmaq üçün razılığa gəlməkdir. Hər iki cinsin müəyyən bir məbləğ və müddət ərzində razılığı siğədə kifayətdir. Bundan başqa, kişidən qadının maddi ehtiyaclarını təmin etmək üçün də heç nə istənilmir. Bu ”evlilik"də miras da olmur. Təyin edilən vaxt qurtarandan sonra, adi boşanmadan fərqli olaraq, qadın iddət müddətinin (iddət - əri ölən və ya boşanan qadının yenidən evlənə bilməsi üçün gözləməli olduğu müddət) yarısını - təxminən 45 gün gözləyir, sonra yenidən siğə etdirə bilər. Bütün bunlar da siğənin İslamda haram olduğunu göstərir. İslamda qadınla kişi arasında yeganə yaxınlıq əlaqəsi ancaq kəbinlə, ailə həyatı qurmaqla mümkündür”.
Həmsöhbətimiz onu da əlavə etdi ki, sosial şəbəkədə siğəlik fəaliyyəti ilə məşğul olan qruplar var. Müasir dövrdə belə halların olması düzgün deyil: “Sosial şəbəkələrdə bu işlə məşğul olanlar qadın alveri ilə məşğul olur. Yaxşı olar ki, aidiyyəti qurumlar bu məsələni nəzarətə götürsün. “İnstagram" kimi yerlərdə qrupların belə fəaliyyəti düzgün deyil”.
Fatimə Hacıbəyli: “Qadınları siğə edib alırlar, atandan sonra qadın qalır uşaqlarla ortada”
“Vəfa” Sosial İctimai Birliyinin sədri Fatimə Hacıbəyli qeyd etdi ki, siğə deyilən bir anlayış İslamda yoxdur. Siğə heç şiəlikdə də olmayıb, bu, sonradan şiəliyin içərisinə salınıb: “Bunun hoteldə hansısa yüngül əxlaqlı qadınla bir yerdə qalmaqdan bir fərqi yoxdur. Nikah daimi olmalıdır, o bir əxlaq, etibar məsələsidir. Siğə isə heç bir məntiqə sığmayan, sadəcə İslam adına salınmış məsələdir. İslam dinində daimi nikah var. Bəzən siğədən ikinci şəxsin - məşuqun olmasını pərdələmək üçün istifadə edirlər. Qadınları siğə edib alırlar, atandan sonra qadın qalır uşaqlarla və ya ərə gedə bilmir. Bəlkə də fahişələrin 80 faizi siğə ilə ərə gedən qadınlardır".
Günel CƏLİLOVA
