Hazırda rüşvət ittihamı ilə həbs edilən icra başçılarının məhkəmələri keçirilir. Bu məhkəmələrdə maraqlı faktlar açıqlanır. Bir çox şahidlər açıq şəkildə məhkəmədə icra başçılarına rüşvət verdiklərini etiraf edirlər. Ən maraqlısı budur ki, belə ifadə verənlərin əksəriyyəti hazırda da öz işlərini davam etdirirlər.
Bakı Ağır Cinayətlər Məhkəməsində İmişli rayonunun sabiq icra başçısı Vilyam Hacıyevin cinayət işi üzrə məhkəmə prosesində belə hallara daha çox rast gəlinir.
Hakim Azər Paşayevin sədrliyi ilə keçirilən prosesdə ifadə verən Qaralar kənd bələdiyyəsinin sədri Şıxalı Gülməmmədov bildirib ki, Vilyam Hacıyevi icra başçısı kimi tanıyıb:
"Əvvəllər sahibkar kimi fəaliyyət göstərirdim. 2015-ci ildə bələdiyə sədri seçilmişəm.
Rayonda tədbirlər, quruculuq işləri olanda sahibkar kimi yardım etmişəm. Çünki əvvəl sahibkar olmuşam. Pul verəndə mühasibə vermişəm, Vilyam Hacıyevə yox. Müəyyən miqdarda mən də imkanım çatan qədər kömək edirdim".
Hazırda bələdiyyə sədri işləyən Məni Atakişiyev qeyd edib ki, əvvəllər Pambıq Zavodunun direktoru, şəhər icra nümayəndəsi işləyib:
"Yaxşı münasibətimiz olub Vilyam Hacıyevlə. Duz-çörək kəsmişik. Tanışım var idi, Səadət Şəhpələngova, bağça müdiri işləyirdi, səhv işləyirdi. Vilyam müəllim də onu çıxartmaq istəyirdi. Gəldim Vilyam Hacıyevdən xahiş elədim, eşitdi. O da buna görə mənə 5 min manat verdi, mən də icra hakimiyyətinin mühasibi Cəmilə 5 min manat verdim. Vilyam müəllim, başına dönüm, səni mən həmişə sevmişəm. Amma kişi kimi danışaq da, 5 min manatı vermişəm".
Belə misalları çox çəkmək olar. Əslində rüşvət verməyin özü də cinayət əməli sayılırsa, bu şəxslər necə məsuliyyətdən kənarda qalıb? Bu qəbildən olanların hətta məsuliyyətdən kənar qalmaları ilə yanaşı həm də vəzifələrində qalıb işləmələri nə dərəcədə doğrudur?
Şəmsəddin Əliyev: “Törədilən əməllər həmin şəxslərin vəzifədə qalmasını qadağan edir”
Hüquqşunas Şəmsəddin Əliyev “Bakı-Xəbər”ə açıqlamasında bildirdi ki, rüşvət ittihamı ilə həbs edilən icra başçılarının məhkəməsində rüşvəti verən subyektlər də dindirilir: “Onlar etiraf edir ki, vəzifəyə təyin olunanda rüşvət veriblər. Onlardan bəziləri vəzifədən azad edilsə də, postlarını qoruyub saxlayanlar da var. Cinayət Məcəlləsində rüşvət vermənin özü də cinayət əməli kimi təsnifatlandırılır. Onlar bunu bilə-bilə ediblər. Çünki ödədikləri rüşvətin müqabilində özlərinə vəzifə əldə ediblər. Hər iki tərəfin cinayət məsuliyyəti var. Təəssüf ki, istintaq zamanı onların bəziləri məsuliyyətdən kənarda qalıb. Yalnız dindirilmə ilə kifayətləniblər. Bu da ictimai rəydə çaşqınlıq yaradır. Rüşvət verən bunu zamanında etiraf etsəydi cinayət məsuliyyətindən kənarda qalardı. Ancaq biz görürük ki, bu adamlar əməllərini zamanında etiraf etməyiblər, hətta uzun müddət vəzifədə də işləyiblər. Üstündən xeyli müddət keçsə də, onlarla bağlı qərar qəbul edilməyib. Bu da onları vəzifədə şirnikləşdirə bilər. Düşünürəm ki, bu qəbildən olan hərəkətlər dövlət qulluğu haqqında qanuna da ziddir. Törədilən əməllər həmin şəxslərin vəzifədə qalmasını qadağan edir. Onlar tutduqları postdan azad edilməlidir. Bu digərlərinə görk ola bilər”.
Məhəmmədəli QƏRİBLİ
