300-ə qədər ailənin yaşadığı Oğuz rayonunun Muxas kəndində əvvəlcə işıq dirəklərinin hamısı basdırılıb, sonra yarısı çıxarılaraq aparılıb. Yeni elektrik xəttlərindən isə, ümumiyyətlə əsər-əlamət yoxdur.
Kənd sakinləri uzun müddətdir elektrik dirəklərinin yararsız olmasından əziyyət çəkir. Üç il əvvəl kənddə elektrik dirəklərinin yenilənməsinə başlanılıb, yeni dirəklər basdırılıb. Ancaq sakinlərin sevinci uzun sürməyib. İşıq çəkmək üçün basdırılan dirəklərin bir qismi yerli elektrik şəbəkənin əməkdaşları tərəfindən çıxarılaraq aparılıb. Sakinlər deyir ki, bir maşın elektrik dirəyini gətirdikləri kimi aparıblar. Dirəklər basdırılandan sonra kabellər də gətirilib, amma bəlli olmayan səbəblərdən daha sonra aparılıb. Sakinlər deyir ki, mövcud elektrik dirəkləri ağacdan olduğundan, adi küləkli havada işıqsız qalırlar. Mövcud xətlər keyfiyyətsiz olduğundan tez-tez kəsilmələr baş verir. Kənddə yerləşən çayxananın üzərindən 10 minlik elektrik xətti keçir. Nəzərə alsaq ki, işıq dirəkləri nasazdır, bu, küləkli havada ciddi qəzanın baş verməsi risqini artırır. Məftillərin bir qismi çürüyüb. Oğuz rayon İcra Hakimiyyətindən deyilib ki, məsələ öz həllini tapacaq. Qurum bunu onunla əsaslandırır ki, vəsait ayrılan kimi işıq xətləri yenilənəcək. Ancaq vəsaitin nə zaman ayrılacağı məlum deyil.
“Respublika səviyyəsində kəndlərin keyfiyyətli elektrik təchizatına ayrılan vəsaitlərə nəzarət artırılmalıdır”
Məsələyə münasibət bildirən iqtisad üzrə fəlsəfə doktoru Firdovsi Şahbazovun fikrincə, Muxas kəndində yaşanan problemlər müvafiq qurumların laqeydliyindən və işi düzgün təşkil edə bilməmələrindən qaynaqlanır: “Söhbət əhalisinin sayı çox olan bir kənddən gedir. 300 təsərrüfatı olan kənd o deməkdir ki, orada orta hesabla 1500-1700 nəfər əhali yaşayır. Belə bir kənddə normal elektrik təchizatının olmaması, işlərin yarımçıq səviyyədə həyata keçirilməsi nə deməkdir? Bu o deməkdir ki, kənd sakinlərinin normal elektrik təchizatı ilə təmin olunması yerli icra strukturlarının vecinə deyil. Onlar narahat olsaydılar, belə xoşagəlməz hal yaşanmazdı. Özü də Muxas ucqar kənd deyil deyəsən ki, elektrik dirəklərinin yenilənməsi çətin və çox xərc tələb edən məsələdir. İndiki dövrdə hələ də bir sıra kəndlərdə elektrik dirəklərinin ağacdan olması təəssüf doğurur. Ancaq nə yazıq ki, nəinki Muxasda, bir sıra kəndlərdə də sözügedən problem hələ də qalmaqdadır. Bu baxımdan hesab edirəm ki, respublika səviyyəsində kəndlərin keyfiyyətli elektrik təchizatına ayrılan vəsaitlərə nəzarət artırılmalıdır. Ola bilsin, bu məqsədlə ayrılan vəsait yerli məmurlar tərəfindən mənimsənildiyi üçün kəndin elektrik təchizatı bərbad vəziyyətdədir. Hər şey ola bilər”.
Bu baxımdan ekspert hesab edir ki, məsələ araşdırılmalıdır.
Vidadi ORDAHALLI
