Bakıda "Location" gecə klubunda baş verən partlayışa görə, ikisi klubun rəhbərliyindən olmaqla, üç nəfər həbs olunub.
İstintaq zamanı yanğın təhlükəsizliyi qaydalarının riayət edilməsinə məsul olan iaşə obyektini icarəyə götürmüş “Merser food” MMC-də administrator işləyən Rəsul Rəsulova Cinayət Məcəlləsinin 225.2-ci (yanğın təhlükəsizliyi qaydalarını pozma - ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda), həmin MMC-nin təsisçisi - klubun meneceri Orxan Səfərova Cinayət Məcəlləsinin 314.2-ci (səhlənkarlıq-ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda) maddəsi ilə ittiham elan edilib.
Eyni zamanda, istintaq zamanı qeyd olunan ərazi üzrə yanğın təhlükəsizliyinin təmin edilməsinə məsul olan - Fövqəladə Hallar Nazirliyinin Dövlət Yanğın Nəzarəti Xidmətinin 2-ci Ərazi Dövlət Yanğın Ərazi idarəsinin inspektoru Ruslan Məmmədov tərəfindən vəzifələrin icrası zamanı səhlənkarlığa yol verilməsi müəyyən edildiyindən, sonuncu Cinayət Məcəlləsinin 314.2-ci maddəsi ilə təqsirləndirilən şəxs qismində cəlb olunub.
Partlayış olan obyektin sahibinin tanınmış adam olduğu bildirilir. Bu hadisədə onun məsuliyyət payı varmı?
Vətəndaşların Əmək Hüquqlarının Müdafiəsi Liqasının rəhbəri Sahib Məmmədov “Bakı-Xəbər”ə açıqlamasında bildirdi ki, Vətəndaşların Əmək Hüquqlarının Müdafiəsi Liqasının rəhbəri Sahib Məmmədov “Bakı-Xəbər”ə açıqlamasında bildirdi ki, bu məsələdə sahibkarın da məsuliyyəti az deyil: “Ola bilsin ki, həmin sahibkarın bir neçə yerdə belə restoranı var, birində belə bədbəxt hadisə baş verib. Görünür, istintaq sonrakı mərhələlərdə bunları nəzərə alacaq. Bu işdə təqsirləndirilənlərin sayı azala da, arta da bilər. Sahibkar oranı kiməsə həvalə edib, ayda bir dəfə gəlib ora baş çəkə bilər. Bu heç də o anlama gəlmir ki, bütün məsuliyyət onun üzərinə düşür. Həvalə edilən adam orada gizlin qaz balonu işlədibsə, ilkin olaraq məsuliyyət payı onun üzərinə düşür. O cür yerdə qazdan istənilən formada istifadə etmək qadağandır. Hətta xətlə çəkilsə belə. Buna heç texniki şərt də verilmir. Ehtimal olunur ki, nəzarət orqanı buna göz yumub. Ola bilər ki, istintaqın gedişində məsuliyyətə cəlb edilənlərin dairəsi genişlənsin. Həmin yerdə həm də əməyin mühafizəsi qaydaları pozulub. Nəticədə işçi həlak olub. Bu, ayrıca bir cinayət işidir. Eyni zamanda vətəndaşların əmlakına, avtomobillərinə zərər dəyib. Həmin avtomobillərin eləsi var ki, “kasko” sığortası yoxdur. Onların pulunu da sahibkardan alacaqlar. Sığorta şirkəti də ödədiklərini sahibkardan tələb edəcək. Bir söz də deyim ki, bəzən böyük balıqlar sürüşüb tordan çıxa bilirlər. Gəlin, qabaqcadan mülahizələr irəli sürməyək. Proseslərin gedişini izləyək”.
Məhəmmədəli QƏRİBLİ
