Xəbər verildiyi kimi, Bakının Səbail rayonu, Tərlan Əliyarbəyov 9 ünvanında yerləşən “Location” gecə klubunda güclü partlayış propan qaz balonunun partlaması səbəbindən baş verib. Bunu "Azəriqaz" İstehsalat Birliyinin baş direktoru Ruslan Əliyev təsdiq edib.
İlkin məlumata əsasən, hadisə nəticəsində 1 nəfər ölüb, 31 nəfər isə müxtəlif dərəcəli bədən xəsarətləri alıb. “Location” gecə klubunun kimə məxsus olduğu məlum olub. Əldə etdiyi məlumata görə, gecə klubunun yerləşdiyi mülkiyyət Xətai rayon sakini, 1979-cu il təvəllüdlü Umbayev Ağa Tofiq oğluna məxsusdur. Lakin ümumi sahəsi 170 kv.metr olan mülkiyyəti Rəsul Rəsulov icarəyə götürərək gecə klubu kimi işlədib.
Klubu icarəyə götürən Rəsul Rəsulov İnstaqramda tanınmış bloqerdi. Məlum olur ki, həmin gecə klubunun müştəriləri adətən imkanlı şəxslər olub. Yaralıların kimliyi bəlli olduqda bu mənzərə daha aydın üzə çıxdı. Ancaq hiss edilir ki, zərərçəkən müştərilər kimi ictimailəşdirilən şəxslərin sırasında daha çox xanım adlarına rast gəlinir. Maraqlıdır, xəsarət alan kişilərin kimliyi niyə araşdırılmır? Bəyəm, kişisiz bar olur? Açıqlanan adlara diqqət edək. Türkiyədə yayımlanan məşhur "İşte benim stilim” proqramının üçüncü sezon iştirakçısı, azərbaycanlı model Təranə Rzayeva (Merlin Təranə) baş verən partlayışda ağır yaralanıb. Hadisə zamanı beton parçaları onun üzərinə düşüb. O, hazırda xəstəxanada müalicə olunur. Vəziyyətinin ağır olduğu söylənilir.
Yararlanan digər tanınmış xanımın kimliyinə diqqət edək. Bu şəxs Bakı Lift İdarəsinin keçmiş baş direktoru Qüdrət Şükürovun qızı Aysel Şükürovadır. Vaxtilə dəbdəbəli toyu ilə gündəmə gələn, daha sonra isə ayrılması ilə populyarlaşan və ən nəhayət blogerliklə məşhurluğunu davam etdirən Aysel Şükürova ayağından yaralanıb və vəziyyəti yaxşı deyil. Bəzi iddialara görə, Aysel Şükürova gecə barına dostu Raulun ad günü məclisinə gəlib. Hər halda, bu adlar həmin obyektin müştərilərinin hansı təbəqəyə aid olduğu barədə ciddi mətləbləri üzə çıxarmış olur.
Hətta pandemiya dönəmində belə başqa adla fəaliyyət göstərən bu məkanın kişi müştəriləri də əsasən harın məmur övladları olub. Yəqin ona görədir ki, məmur himayəsində olan bu obyektdə adi texniki təhlükəsizlik şərtlərinə belə əməl olunmayıb.
Rəsmi məlumata görə, gecə partlayan obyektdəki faciəyə propan qaz balonu səbəb olub, qaz sızması nəticəsində partlayış baş verib. Ekspertlər bildirir ki, qaz balonları potensial minadır. Ümumiyyətlə, Bakıda hazırda bir çox obyektlərdə propan qaz balonlarından istifadənin sayı artıb. Bu balonlara nəzarət edən hər hansı rəsmi qurum ümumiyyətlə mövcud deyil? Zirzəmilərdə, dönərxanalarda olan sobalarda bu tip, daha çox Rusiyadan gətirilən, keyfiyyəti bilinməyən qaz balonlarından istifadə olunur. Bu sobalarda istifadə olunan qazın partlama qüvvəsi metan qazından 3-4 dəfə artıq olur. Doldurma qazla çalışan sobalar mütəxəssislər tərəfindən quraşdırılmalıdır. Qanunla qaz balonlarını zirzəmilərdə və obyekt kimi istifadə olunan yarımzirzəmilərdə quraşdırmaq olmaz. Amma bu obyektdə istifadə olunurdu. Kim, hansı qurum icazə verib?
Filan məmurun balasınındır prinsipi ilə yox, standarta, təhlükəsizliyə zəmanət verməyən məkanlar bağlanmalıdır, cəza kəsilməlidir ki, bu cür faciələr yaşanmasın.
Məhəmmədəli QƏRİBLİ
